മലപ്പുറം: തിരൂരങ്ങാടി മൂന്നിയൂര് മുട്ടിച്ചിറ ചോനാരിക്കടവ് പാലത്തിന്റെ ഭിത്തി അടര്ന്ന് വീണ് അപകടാവസ്ഥയില്. അശാസ്ത്രിയമായ നിര്മ്മാണമാണ് അപകടാവസ്ഥക്ക് കാരണമെന്നും പരിഹാരം കാണണമെന്നും നാട്ടുകാര്. പാലത്തിന്റെ ഭിത്തിയില് നിന്നും തോട്ടിലേക്കുള്ള ഭാഗം സ്ലാബിന് കമ്പിയില്ലാതെ വെറും സിമന്റിലാണ് പണി തീര്ത്തിട്ടുള്ളത്. 2018 ലാണ് പാലം ഉദ്ഘാടനംചെയ്തത്. വെറും നാല് വര്ഷം കൊണ്ട് ഇടിഞ്ഞു വീഴുന്നത് നിര്മ്മാണത്തിലുള്ള പിഴവുമൂലമാണെന്ന് നാട്ടുകാര് പറയുന്നു.
നാട്ടുകാരുടെ പരാതിയെ തുടര്ന്ന് അന്ന് അധികൃതന് കല്ലും സിമന്റും വെച്ച് അറ്റകുറ്റ പണി നടത്തിയതിന് ശേഷം ഏറെ വൈകാതെയാണ് വീണ്ടും ഈ അവസ്ഥയിലായത്. സ്ത്രീകളും കുട്ടികളും കൃഷിക്കാരുമടക്കം ഏറെ ആളുകള് കുളിക്കാനും അലക്കാനും വരുന്ന ഈ കടവില് പാലം ഈ അവസ്ഥയില് തുടരുന്നതില് നാട്ടുകാര് ഭീതിയിലാണ് എത്രയും പെട്ടെന്ന് പരിഹാരം കാണണമെന്നാണ് നാട്ടുകാരുടെ ആവശ്യം.