മലപ്പുറം: മമ്പാട് നിയന്ത്രണം വിട്ട സ്വകാര്യബസുകൾ കൂട്ടിയിടിച്ച് അപകടം. മഞ്ചേരി ഭാഗത്തുനിന്ന് നിലമ്പൂർ ഭാഗത്തേക്ക് പോവുകയായിരുന്ന ബസും നിലമ്പൂർ ഭാഗത്തുനിന്ന് മഞ്ചേരി ഭാഗത്തേക്ക് പോവുകയായിരുന്ന സ്വകാര്യ ബസും തമ്മിൽ കൂട്ടിയിടിച്ചാണ് അപകടമുണ്ടായത്. അപകടത്തിൽ ഇരു ബസ്സുകളിലും ഉണ്ടായിരുന്ന നിരവധി യാത്രക്കാർക്കാണ് പരിക്കേറ്റത്. പരിക്കേറ്റവരെ നിലമ്പൂർ ജില്ലാ ആശുപത്രിയിൽ പ്രവേശിപ്പിച്ചു. ഇതിൽ ഗുരുതര പരിക്കേറ്റ അഞ്ചു പേരെ മഞ്ചേരി മെഡിക്കൽ കോളജ് ആശുപത്രിയിലും ഒരാളെ കോഴിക്കോട് മെഡിക്കൽ കോളേജ് ആശുപത്രിയിലും പ്രവേശിപ്പിച്ചു.
അപകടം നടന്ന ഉടൻ തന്നെ പ്രദേശവാസികളുടെ നേതൃത്വത്തിലാണ് രക്ഷാപ്രവർത്തനം നടത്തിയത്. തുടർന്ന് കിട്ടിയ വാഹനങ്ങളിലാണ് നാട്ടുകാർ പരിക്കേറ്റവരെ നിലമ്പൂർ ജില്ലാ ആശുപത്രയിൽ എത്തിച്ചത്. ഇരു ബസുകളുടേയും അമിതവേഗതയാണ് അപകടത്തിന് ഇടയാക്കിയതെന്നാണ് പ്രാഥമിക നിഗമനം. അപകടത്തിൽ ഇരു ബസുകളുടേയും മുൻഭാഗം പൂർണ്ണമായും തകർന്നിട്ടുണ്ട്. ഈ റോഡിൽ പതിവായി സ്വകാര്യബസുകൾ മത്സര ഓട്ടം നടത്തുന്നതായി വ്യാപക പരാതി ഉണ്ടായിരുന്നു.
Read Latest Local Newsand Malayalam News
ഇതിനു പിന്നാലെയാണ് ഇത്തരത്തിൽ ഒരു അപകടം മമ്പാട് ഭാഗത്ത് നടന്നത്. അപകടത്തിൽ പ്രധാനമായും യാത്രക്കാർക്ക് കൈകാലുകൾക്ക് തലക്കുമാണ് പരിക്കേറ്റത് ആരുടെയും നില ഗുരുതരമല്ല. അതേസമയം അപകടം നടന്നതോടെ മണിക്കൂറുകളാണ് നിലമ്പൂർ മമ്പാട് പാതയിൽ ഗതാഗതം തടസ്സപ്പെട്ടത്. എങ്ങനെയാണ് അപകടമുണ്ടായത് എന്നതടക്കമുളള കാര്യങ്ങൾ പോലീസ് അന്വേഷിച്ച് വരികയാണ്.