വസ്ത്രത്തിനടിയിലും മലദ്വാരത്തിലും ഒളിപ്പിച്ച് സ്വർണക്കടത്ത്; സത്രീയുൾപ്പെടെ മൂന്ന് പേർ പിടിയിൽ

മലദ്വാരത്തിൽ സ്വർണം കടത്തുകയായിരുന്ന മലപ്പുറം സ്വദേശി ജംഷീദിനെയും കസ്റ്റംസ് പിടികൂടി. 1054 ഗ്രാം സ്വർണ്ണ മിശ്രിതവുമായി ജിദ്ദയിൽ നിന്നാണ് ഇയാൾ എത്തിയത്. മിശ്രിത രൂപത്തിലുള്ള സ്വർണ്ണം മൂന്ന് ക്യാപ്സ്യുളുകളാക്കി ശരീരത്തിൽ ഒളിപ്പിച്ചു കടത്താൻ ശ്രമിച്ച 679 ഗ്രാം സ്വർണ്ണവുമായി കോഴിക്കോട് സ്വദേശി അബ്ദുൽ ശാമിലും പിടിയിലായി. ഇയാൾ ഷാർജയിൽ നിന്നുമാണ് സ്വർണ്ണമായി കരിപ്പൂരിൽ എത്തിയത്.

ഇന്ന് കരിപ്പൂരിൽ പിടിയിലായ മൂന്ന് പേരിൽ ഒരു സ്ത്രീയും ഉൾപ്പെടുന്നുണ്ട്. നാല് കുട്ടികൾക്ക് ഒപ്പം ജിദ്ദയിൽ നിന്ന് എത്തിയ വയനാട് സ്വദേശിനി ബുഷ്‌റയിൽ നിന്ന് വസ്ത്രത്തിനുള്ളിൽ ഒളിപ്പിച്ച നിലയിൽ 1077 ഗ്രാം സ്വർണ്ണ മിശ്രിതവും, ആഭരണ രൂപത്തിലുള്ള 249 ഗ്രാം സ്വർണ്ണവുമാണ് കസ്റ്റംസ് പിടികൂടിയത്. വസ്ത്രത്തിനിടയിൽ ഒളിപ്പിച്ചാണ് ഇവർ സ്വർണം കടത്തിയത്.

മൂന്ന് യാത്രികരിൽ നിന്ന് സ്വർണം പിടികൂടിയതിന് പുറമെ, ജിദ്ദയിൽ നിന്നെത്തിയ സ്‌പൈസ് ജെറ്റ് വിമാനത്തിൽ നിന്നും ഉപേക്ഷിക്കപ്പെട്ട നിലയിൽ 932 ഗ്രാം സ്വർണവും കസ്റ്റംസ് പിടികൂടി. വിമാനത്തിന്‍റെ ഇരുപത്തിയൊന്നാം നമ്പർ സീറ്റിനടിയിൽ നിന്നും ഉപേക്ഷിക്കപ്പെട്ട നിലയിൽ 932 ഗ്രാം സ്വർണവും കസ്റ്റംസ് പിടികൂടിയിട്ടുണ്ട്. എട്ട് സ്വർണക്കട്ടിക്കളാക്കി പൊതികളിൽ ഒളിപ്പിച്ചുവെച്ച നിലയിൽ ആണ് വിമാനത്തിൽ സ്വർണക്കട്ടികൾ ഉണ്ടായിരുന്നത്.

നാല് വ്യത്യസ്ത കേസുകളായി കരിപ്പൂരിൽ ഇന്ന് മാത്രം പിടികൂടിയത് 3 കിലോ 991 ഗ്രാം സ്വർണ്ണമാണ്. ഇതിന് വിപണിയിൽ ഒരു കോടി എൺപത്തിരണ്ട് ലക്ഷത്തി പതിനാറായിരം രൂപ വിലമതിപ്പുണ്ടെന്ന് കസ്റ്റംസ് ഉദ്യോഗസ്ഥർ വ്യക്തമാക്കി. അതേസമയം കരിപ്പൂർ അന്താരാഷ്ട്ര വിമാനത്താവളം കേന്ദ്രീകരിച്ച് അനധികൃത സ്വർണക്കള്ളക്കടത്ത് വർദ്ധിച്ചു വരുന്ന ഒരു സാഹചര്യമാണ് നിലവിലുള്ളത്. ഈ അടുത്തകാലത്ത് വിമാനത്താവളത്തിന് അകത്ത് കസ്റ്റംസും പുറത്ത് പോലീസും നടത്തിയ പരിശോധനയിൽ കോടികളുടെ സ്വർണമാണ് പിടികൂടിയത്. വരും ദിവസവും അനധികൃത സ്വർണകള്ളകടത്ത് തടയിടാൻ പരിശോധന ശക്തമാക്കാനാണ് കസ്റ്റംസിന്‍റെ തീരുമാനം.

Read Latest Local News and Malayalam News