അട്ടപ്പാടിയിൽ സ്ഥാനാർത്ഥിക്ക് കൊവിഡ്; ഷോളയൂരിൽ കോൺഗ്രസിന് തലവേദനയായി വിമതർ

അഗളി: അട്ടപ്പാടിയിൽ സ്ഥാനാർത്ഥിക്ക് കൊവിഡ് സ്ഥിരീകരിച്ചു. സാമ്പാർക്കോട് ഊര് കേന്ദ്രീകരിച്ച് നടത്തിയ കൊവിഡ് പരിശോധനയിലാണ് സ്ഥാനാർത്ഥിക്ക് കൊവിഡ് പോസിറ്റീവായത്. ഷോളയൂർ ഗ്രാമപഞ്ചായത്തിലെ 14-ാം വാർഡ് വണ്ണാന്തറയിലെ ഇടതുപക്ഷ ജനാധിപത്യ മുന്നണിയുടെ സ്ഥാനാർത്ഥിക്കാണ് രോഗബാധ കണ്ടെത്തിയത്. ആർടിപിസിആർ പരിശോധന നടത്തുന്നതിനു വേണ്ടി സ്രവം അയച്ചിട്ടുണ്ട്. ഫലം നെഗറ്റീവ് ആണെങ്കിൽ പ്രചരണങ്ങൾക്കിറങ്ങാം. അല്ലാത്ത പക്ഷം ക്വാറൻ്റൈനും ചികിത്സയും നിർബന്ധമാണ്. ക്വാറൻ്റൈൻ വാസം തന്റെ തിരഞ്ഞെടുപ്പ് പ്രവർത്തനങ്ങളെ ബാധിക്കില്ലെന്നും ബദൽ സംവിധാനങ്ങൾ സുഹൃത്തുക്കളുടേയും പ്രവർത്തകരുടേയും സഹായത്തോടെ ഒരുക്കിയിട്ടുണ്ടെന്നും സ്ഥാനാർത്ഥി പ്രതികരിച്ചു.

Also Read: മകള്‍ക്ക് കന്നിയങ്കം, അച്ഛന് അഞ്ചാമൂഴം!!! ഒരേ വാര്‍ഡില്‍ അങ്കം നയിക്കാന്‍ ഭാര്യയും ഭര്‍ത്താവും

അട്ടപ്പാടിയിലാകെ കോൺഗ്രസിന് വിമതശല്ല്യമുണ്ടെങ്കിലും തെരഞ്ഞെടുപ്പിൽ പരസ്യമായി എതിർത്തു മത്സരിക്കുന്നത് ഷോളയൂർ പഞ്ചായത്തിലാണ്. യുവാക്കൾക്ക് സീറ്റ് നിഷേധിച്ചതിൽ പ്രതിഷേധിച്ച് കോൺഗ്രസിൽ നിന്നും രാജിവെച്ച മൈനോരിറ്റി കോൺഗ്രസ് മണ്ഡലം പ്രസിഡന്റിന്റെ പിതാവാണ് പതിനൊന്നാം വാർഡ് ചുണ്ടകുളത്ത് കോൺഗ്രസിനെതിരെ മത്സരരംഗത്തുള്ളത്. ആദിവാസി കോൺഗ്രസിന്റെ ജില്ലാ പ്രസിഡന്റും മുൻ പഞ്ചായത്ത് അധ്യക്ഷനുമായി സേവനമനുഷ്ഠിച്ച അംഗത്തിന് സീറ്റ് നിഷേധിച്ചതിൽ പ്രതിഷേധിച്ച് കോൺഗ്രസിൽ നിന്നും രാജിവെച്ച അംഗം ഒമ്പതാം വാർഡ് കോഴിക്കൂടത്തിൽ സ്വതന്ത്രനായി മത്സരിക്കുന്നുണ്ട്.

കേസ് വിവരങ്ങൾ മറച്ചു വെച്ചതു കാരണം ആനക്കട്ടി ബ്ലോക്ക് ഡിവിഷനിലേക്ക് മത്സരിക്കാൻ ഉദ്ദേശിച്ച കോൺഗ്രസ് സ്ഥാനാർത്ഥിയായ മണ്ഡലം പ്രസിഡന്റിന്റെ നാമനിർദ്ദേശ പത്രിക തള്ളിപ്പോയതും കോൺഗ്രസിന് തിരിച്ചടിയായി. ഇവരുടെ ഡമ്മി സ്ഥാനാർത്ഥിയായ പിതാവിനു തന്നെയാണ് ഇതോടെ നറുക്ക് വീണിരിക്കുന്നത്. കോൺഗ്രസ് ഉപസമിതിയുടെ അംഗീകാരത്തോടെ നാമനിർദ്ദേശ പത്രിക സമർപ്പിച്ച് ചിറ്റൂർ ബ്ലോക്ക് വാർഡിൽ പ്രചരണം നടത്തിയ വനിതാ സ്ഥാനാർത്ഥിയെ ഡിസിസി വെട്ടിമാറ്റി പകരം ഷോളയൂർ മണ്ഡലം കോൺഗ്രസ് വനിതാ അധ്യക്ഷയെ മത്സരരംഗത്തേക്ക് കൊണ്ടുവന്നതും അണികളെ രണ്ടു തട്ടിലാക്കി. വെട്ടിമാറ്റിയ വനിതാ സ്ഥാനാർത്ഥി ഇവിടെ സ്വതന്ത്രയായി മത്സരിക്കുന്നു.

Also Read: അരങ്ങിൽ കൈയ്യടി നേടിയ നാടക പ്രതിഭകൾ തെരഞ്ഞെടുപ്പ് ഗോദയിലും; പാലക്കാട് അങ്കത്തിനൊരുങ്ങി പത്തോളം നാടക് അംഗങ്ങള്‍

ഷോളയൂർ പഞ്ചായത്ത് 5-ാം വാർഡ് കടമ്പാറയിലും കോൺഗ്രസിനു വിമത സ്ഥാനാർത്ഥിയുണ്ട്. ഷോളയൂർ മണ്ഡലം പ്രസിഡന്റിന്റേത് ഏകാധിപത്യപരമായ പ്രവർത്തനങ്ങളാണ് മണ്ഡലത്തിൽ കോൺഗ്രസിന്റെ തിരഞ്ഞെടുപ്പ് പ്രവർത്തനങ്ങൾ പുറകോട്ടടിക്കാൻ കാരണമെന്ന് ആരോപിച്ചു കൊണ്ട് ഒരു വിഭാഗം മുതിർന്ന നേതാക്കൾ പ്രവർത്തനങ്ങളിൽ നിന്നും വിട്ടുനിൽക്കുക കൂടി ചെയ്തതോടെ ഷോളയൂർ മണ്ഡലത്തിലെ കോൺഗ്രസിന്റെ നില പരുങ്ങലിലാണ്.