പാലക്കാട്ട് ഒരാൾക്ക് കൂടി കൊവിഡ്-19 സ്ഥിരീകരിച്ചു; ജില്ലയില്‍ ഇതുവരെ ആറ് കൊവിഡ് ബാധിതര്‍!

പാലക്കാട്: ജില്ലയിൽ ഒരാൾക്ക് കൂടി കൊവിഡ്-19 സ്ഥിരീകരിച്ചു. ഇതോടെ ജില്ലയിലെ രോഗ ബാധിതരുടെ എണ്ണം മൊത്തം ആറ് ആയതായി ജില്ലാ മെഡിക്കൽ ഓഫീസർ അറിയിച്ചു. മാർച്ച് 20 ന് ദുബായിൽ നിന്നെത്തി വീട്ടിൽ നിരീക്ഷണത്തിലായിരുന്ന ചാലിശ്ശേരി മുക്കൂട്ട സ്വദേശിക്കാണ് ഇന്ന് രോഗം സ്ഥിരീകരിച്ചത്. മാർച്ച് 20ന് രാവിലെ 8.50 നാണ്‌ ഇദ്ദേഹം ദുബായിൽ നിന്നും കോഴിക്കോട് എയർപോർട്ടിൽ എത്തിയത്.

Aloso Read: കണ്ണൂരിൽ പനി ബാധിച്ച് മരിച്ച കുട്ടിയുടെ സ്രവം പരിശോധനക്ക് അയച്ചു

തുടർന്ന് സ്വന്തം വാഹനത്തിൽ വീട്ടിൽ എത്തി. എയർപോർട്ടിൽ നിന്നും വീട്ടിലേക്കുള്ള യാത്രയിൽ വാഹനം നിർത്തുകയോ മറ്റാരുമായും ബന്ധപ്പെടുകയോ ചെയ്തിട്ടില്ല. വീട്ടിൽ എത്തിയത് മുതൽ സന്ദർശകരെയൊന്നും തന്നെ അനുവദിക്കാതെ കർശന നിരീക്ഷണത്തിലായിരുന്നു. മാർച്ച് 28ന് ശാരീരിക അസ്വസ്ഥത അനുഭവപ്പെടുന്നതായി ചാലിശ്ശേരി പ്രാഥമിക ആരോഗ്യകേന്ദ്രത്തിൽ അറിയിക്കുകയും ആരോഗ്യ പ്രവർത്തകർ എത്തി മരുന്ന് നൽകുകയും ചെയ്തിരുന്നു. തുടർന്ന് മാർച്ച് 30ന് ആംബുലൻസിൽ ഒറ്റപ്പാലം താലൂക്ക് ആശുപത്രിയിൽ എത്തി സാമ്പിൾ പരിശോധനയ്ക്ക് അയച്ചു. ശേഷം വീണ്ടും വീട്ടിൽ നിരീക്ഷണത്തിൽ തുടർന്നു. രോഗം സ്ഥിരീകരിച്ചതോടെ ഇദ്ദേഹത്തെ പാലക്കാട് ജില്ലാ ആശുപത്രിയിൽ പ്രവേശിപ്പിച്ചിട്ടുണ്ട്.