പുതുശ്ശേരിയില്‍ ഡിവൈഎഫ്‌ഐ പ്രവര്‍ത്തകന് വെട്ടേറ്റു

പാലക്കാട്(Palakkad): പുതുശ്ശേരി ആലമ്പള്ളത്ത് ഡി.വൈ.എഫ്.ഐ. പ്രവര്‍ത്തകനുനേരെ വധശ്രമം. പുതുശ്ശേരി നീലിക്കാട് മണികണ്ഠന്റെ മകന്‍ അനു (25)വിനു നേരെയാണ് ആക്രമണം ഉണ്ടായത്. രണ്ടു ബൈക്കുകളിലായെത്തിയവരാണ് അനുവിനെ വെട്ടിക്കൊലപ്പെടുത്താന്‍ ശ്രമിച്ചത്. തിങ്കളാഴ്ച വൈകീട്ട് അഞ്ചരമണിയോടെയാണ് സംഭവം. ആക്രമണത്തിനു പിന്നില്‍ ആര്‍.എസ്.എസ്. ബി.ജെ.പി. പ്രവര്‍ത്തകരാണെന്ന് സി.പി.എം. ആരോപിച്ചു. ഡി.വൈ.എഫ്.ഐ നീലിക്കാട് യൂണിറ്റ് പ്രസിഡന്റും സി.പി.എം മലയങ്കാവ് ബ്രാഞ്ച് അംഗവുമാണ് അനു. സുഹൃത്തിന്റെ വീടിന് മുന്നില്‍ റോഡരികില്‍ നില്‍ക്കുകയായിരുന്ന അനുവിനെ യാതൊരു പ്രകോപനവുമില്ലാതെ ബൈക്കിലെത്തിയ സംഘം വെട്ടുകയായിരുന്നു എന്നാണ് പറയുന്നത്. കൈകൊണ്ട് തടയാന്‍ ശ്രമിച്ച അനുവിന്റെ കൈയ്യിലും ചെവിയിലും പരിക്കേറ്റിട്ടുണ്ട്. വാള്‍ തിരിച്ച് പിടിച്ച് അനുവിന്റെ കാലില്‍ അടിച്ചും പരിക്കേല്‍പ്പിച്ച സംഘം പ്രദേശത്ത് ഭീതിപരത്തിയാണ് പോയതെന്ന് നാട്ടുകാര്‍ പറഞ്ഞു.

Also Read: 2 മാസത്തിനകം അഭ്യസ്ഥവിദ്യരുടെ കണക്കെടുക്കും; എല്ലാവർക്കും ജോലിയെന്ന് മന്ത്രി

ബഹളം കേട്ട് നാട്ടുകാര്‍ ഓടിക്കൂടിയതോടെയാണ് അക്രമികള്‍ പിന്‍വാങ്ങിയത്. പരിക്കേറ്റ അനുവിനെ പാലക്കാട് ജില്ലാ ആശുപത്രിയില്‍ പ്രവേശിപ്പിച്ചു. സംഭവത്തില്‍ പുതുശ്ശേരി സ്വദേശികളായ ആറ് ആര്‍.എസ്.എസ്-ബി.ജെ.പി. പ്രവര്‍ത്തകര്‍ക്കെതിരെ കസബ പൊലീസ് കേസെടുത്തിട്ടുണ്ട്. പുതുശ്ശേരി മേഖലയില്‍ നേരത്തെ സി.പി.എം- ബി.ജെ.പി. സംഘര്‍ഷം പതിവായിരുന്നു. പോലീസ് ശക്തമായ നടപടി സ്വീകരിച്ചതിനുശേഷം അടുത്തകാലത്തായി ഇവിടെ കാര്യമായ അക്രമസംഭവങ്ങളൊന്നും റിപ്പോര്‍ട്ട് ചെയ്യപ്പെട്ടിരുന്നില്ല. നിലവിലെ ആക്രമണം രാഷ്ട്രീയവിരോധമാണോ എന്നത് പരിശോധിച്ചുവരികയാണെന്ന് പോലീസ് പറഞ്ഞു.

Topic: Palakkad, DYFI leader attacked, Puthussery DYFI