എക്സൈസിൻ്റെ സിനിമാ സ്‌റ്റൈല്‍ നീക്കം; പിടികൂടിയത് 35 കിലോ കഞ്ചാവും ഹാഷിഷ് ഓയിലും! ഒരാൾ അറസ്റ്റിൽ

പാലക്കാട്: കാറില്‍ കടത്തിയ 35.750 കിലോ കഞ്ചാവും ഒരുകിലോ ഹാഷിഷ് ഓയിലും പിടികൂടി. ഒരാളെ അറസ്റ്റ് ചെയ്തു. ദേശീയപാതയില്‍ സിനിമാ സ്‌റ്റൈല്‍ നീക്കത്തിലൂടെയാണ് എക്‌സൈസ് സംഘം കാര്‍ തടഞ്ഞ് ലഹരി കടത്ത് പിടികൂടിയത്. മലപ്പുറം പുത്തനത്താണി സ്വദേശി സുഹൈല്‍ (26) ആണ് അറസ്റ്റിലായത്.

Also Read: വിവാഹത്തലേന്ന് പ്രതിശ്രുത വരന്‍ മരിച്ച നിലയില്‍, വീടിന് സമീപത്തെ ലോഡ്ജ് മുറിയില്‍ തൂങ്ങി, സംഭവം പാലക്കാട്

തെരഞ്ഞെടുപ്പിനോട് അനുബന്ധിച്ചു പാലക്കാട് എക്‌സൈസ് എന്‍ഫോഴ്‌സ്‌മെൻ്റ് അസിസ്റ്റൻ്റ് എക്‌സൈസ് കമ്മീഷണര്‍ എ രമേശിൻ്റെ നേതൃത്വത്തിലുള്ള എഇസി സ്‌ക്വാഡും കുഴല്‍മന്ദം എക്‌സൈസ് റേഞ്ച് ഓഫീസും സംയുക്തമായാണ് റെയ്ഡ് നടത്തിയത്. സ്‌ക്വാഡ് ഇന്‍സ്‌പെക്ടര്‍ കെ എസ് പ്രശോഭിൻ്റെ നേതൃത്വത്തില്‍ പാലക്കാട് വാളയാര്‍ ടോള്‍ പ്ലാസയില്‍ വാഹനപരിശോധന നടത്തുന്നതിനിടയില്‍ കോയമ്പത്തൂര്‍ ഭാഗത്തുനിന്നും വരുകയായിരുന്ന മാരുതി ആള്‍ട്ടോ കാര്‍ പരിശോധനക്കായി തടഞ്ഞു എങ്കിലും, അപകടകരമായി എക്‌സൈസിനെ വെട്ടിച്ചു രക്ഷപ്പെട്ടു. തുടര്‍ന്ന് ഈ വാഹനത്തെ സിനിമ സ്‌റ്റൈലില്‍ പിന്തുടര്‍ന്ന് പാലക്കാട്- തൃശൂര്‍ ഹൈവേയിലെ കുഴല്‍മന്ദം ജംഗ്ഷനില്‍ വച്ചു കുഴല്‍മന്ദം എക്‌സൈസ് റേഞ്ച് ഇന്‍സ്‌പെക്ടര്‍ ജി സന്തോഷ് കുമാറിൻ്റെയും സംഘത്തിൻ്റെയും സഹായത്തോടെ സാഹസികമായി പിടികൂടി.

Also Read: ചെമ്പന്‍ നിറത്തിലുള്ള കുതിരയെപ്പൂട്ടി അഴകുറ്റ തേരിലേറി റുഖിയാത്ത; പ്രായത്തെ തോല്‍പ്പിക്കുന്ന തെരഞ്ഞെടുപ്പ് ആവേശം

വിശാഖപട്ടണത്തില്‍ നിന്നും മലപ്പുറം ജില്ലയിലെ കോട്ടക്കല്‍ പുത്തനത്താണി ഭാഗങ്ങളില്‍ വിതരണം ചെയ്യുന്നതിന് വേണ്ടിയാണു കഞ്ചാവും ഹാഷിഷ് ഓയിലും കടത്തിയത്. കാർ സീറ്റിൻ്റെ അടിയില്‍ പ്രത്യേക രഹസ്യ അറ ഉണ്ടാക്കി അതിലാണ് കഞ്ചാവും മറ്റും ഒളിപ്പിച്ചിരുന്നത്. പിടികൂടിയ കഞ്ചാവിനും ഹാഷിഷ് ഓയിലിനും വിപണിയില്‍ 35 ലക്ഷത്തോളം രൂപ വിലവരും. പ്രതിയെയും കഞ്ചാവും കഞ്ചാവ് കടത്താന്‍ ഉപയോഗിച്ച മാരുതി കാറും പ്രതിയുടെ മൊബൈല്‍ ഫോണും നിരവധി എടിഎം കാര്‍ഡുകളും കസ്റ്റഡിയില്‍ എടുത്തു. സുഹൈലിന്റെ പേരില്‍ മലപ്പുറം ജില്ലയിലെ വിവിധ എക്‌സൈസ് ഓഫിസുകളിലും കേസ് ഉള്ളതായും ഇയാള്‍ സ്ഥിരമായി കഞ്ചാവും മറ്റു മയക്കുമരുന്നുകളും വന്‍ തോതില്‍ കേരളത്തിലേക്ക് കടത്തി വിൽപന നടത്തിവരികയാണെന്നും ഡെപ്യൂട്ടി എക്‌സൈസ് കമ്മീഷണര്‍ ഷാജി എസ് രാജന്‍ അറിയിച്ചു.


പാലക്കാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ


പാലക്കാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ