പാലക്കാട് കിഴക്കഞ്ചേരി പഞ്ചായത്തില്‍ മീനുകള്‍ ചത്ത് പൊങ്ങുന്നു, വെള്ളത്തിന് നിറവ്യത്യാസം, ആശങ്കയില്‍ ജനങ്ങള്‍

പാലക്കാട്: കിഴക്കഞ്ചേരി പഞ്ചായത്തിലെ പുഴകളിലെ വിവിധ കടവുകളിലും , കറ്റുകുളങ്ങര ക്ഷേത്ര കുളത്തിലും മീനുകള്‍ ചത്തു പൊങ്ങിയത് ജനങ്ങളിൽ പരിഭ്രാന്തി പരത്തി. കിഴക്കഞ്ചേരി പഞ്ചായത്തിലെ ഇളവംപാടം, പൊട്ടംകുഴി, മമ്പാട്, പുന്നപ്പാടം, ചാട്ടുകോട് തുടങ്ങിയ മേഖലയിൽ രണ്ട് കിലോമീറ്ററോളം ദൂരത്താണ് മീനുകൾ ചത്ത് പൊന്തിയത്. ഞായറാഴ്ച രാവിലെ കുളിക്കാൻ പോയവരാണ് സംഭവം കാണുന്നത്.പുഴയിലെ വെള്ളത്തിന് നിറ വ്യത്യാസവും ദുർഗന്ധവും അനുഭവപ്പെട്ടിരുന്നു.

Also Read:അതിവർഷമുണ്ടായാൽ ഇക്കുറിയും കണ്ണൂരുകാർ കരയും... രണ്ട് പ്രളയങ്ങളിൽ പാഠം പഠിക്കാതെ അധികൃതർ

കിഴക്കഞ്ചേരി പഞ്ചായത്തിലെ ദുരിഭാഗം പ്രദേശങ്ങളിലേക്കും കുടിവെള്ളം വിതരണം ചെയ്യുന്ന മമ്പാട് പമ്പ് ഹൗസിന് സമീപത്തുൾപ്പെടെ മീനുകൾ ചത്തത് നാട്ടുകാരിൽ ആശങ്ക ഉളവാക്കി.സംഭവമറിഞ്ഞ് വടക്കഞ്ചേരി എസ് ഐ എ അജീഷ്, മംഗലംഡാം അഡീഷണൽ എസ് ഐ കെ എസ് സുന്ദരൻ, എന്നിവരുടെ നേതൃത്വത്തിലുള്ള പോലീസ് സംഘവും, കിഴക്കഞ്ചേരി ഹെൽത്ത് ഇൻസ്പെക്ടർ കെ എ ലോബോ, പഞ്ചായത്ത് വൈസ് പ്രസിഡൻ്റ് പി എം കലാധരൻ എന്നിവരുടെ നേതൃത്വത്തിലുള്ള സംഘം സ്ഥലതെത്തി പരിശോധന നടത്തി.

Also Read: ജില്ലയില്‍ നിരീക്ഷണത്തിലുള്ളത് 7157 പേര്‍; വീടുകളിലും കൊവിഡ് കെയര്‍ സെന്‍ററിലുമായി 249 പ്രവാസികള്‍

പുഴയിലെ വെള്ളം പരിശോധനക്കായി എടുത്തിട്ടുണ്ട്. ഇന്ന് പാലക്കാട് കൽമണ്ഡപത്തുളള കേന്ദ്രത്തില്‍ പരിശോധന നടത്തും . മമ്പാട് കറ്റുകുളങ്ങര ക്ഷേത്രക്കുളത്തും മീനുകൾ ചത്ത് പൊന്തിയനിലയിൽ കണ്ടെത്തിയിട്ടുണ്ട്. ആരെങ്കിലും വിഷം കലർത്തി മീൻപിടിച്ചതാവാമെന്നാണ് സംശയിക്കുന്നതെന്ന് പോലീസ് പറഞ്ഞു.