പാലക്കാട്: ജില്ലയില് മഴക്കെടുതി രൂക്ഷമാവുന്നു. പട്ടാമ്പി ഓങ്ങല്ലൂര് പോക്കുപടിയില് വീട് തകര്ന്ന് വയോധികന് മരിച്ചു. അട്ടപ്പാടിയില് പുഴകള് കരകവിഞ്ഞു. ജില്ലയില് ഉടനീളം വൈദ്യുതി ലൈനുകള്ക്ക് വ്യാപകനാശം സംഭവിച്ചിട്ടുണ്ട്. മലയോര മേഖലയായ അട്ടപ്പാടിയിലേക്കുള്ള വൈദ്യുതി വിതരണം തടസപ്പെട്ടിട്ട് അഞ്ചുദിവസമായി. നെല്ലിയാമ്പതിയിലേക്കുള്ള വൈദ്യുതി വിതരണം മൂന്നുദിവസം മുമ്പ് തടസപ്പെട്ടതാണ്.
വെള്ളിയാഴ്ച പുലര്ച്ചെ മൂന്നുമണിയോടെയാണ് ഓങ്ങല്ലൂര് പോക്കുടിയില് വീട് തകര്ന്ന് വയോധികന് ദാരുണാന്ത്യം സംഭവിച്ചത്. പോക്കുപ്പടി കൂടമംഗലത്ത് മച്ചിങ്ങത്തൊടി മൊയ്തീന്(മാനു-70) ആണ് മരിച്ചത്. വീട്ടില് ഉണ്ടായിരുന്ന മറ്റുള്ളവര് നിസാര പരിക്കുകളോടെ രക്ഷപ്പെട്ടു. നാട്ടുകാരും പട്ടാമ്പി പോലീസും റവന്യൂ അധികാരികളും ജനപ്രതിനിധികളും സ്ഥലം സന്ദര്ശിച്ചു.
Also Read: പക്ഷിപഠന കേന്ദ്രവും ഗ്രന്ഥശാലയുമായി ഇന്ദുചൂഡന് ജന്മനാട്ടില് സ്മാരകം
ഒരാഴ്ചക്കാലമായി കോരിച്ചൊരിയുന്ന മഴയും കാറ്റും അട്ടപ്പാടിയില് വന് നാശനഷ്ടം വിതയ്ക്കുകയാണ്. അട്ടപ്പാടിയിലെ ശിരുവാണി, ഭവാനി, വരഗാര് പുഴകള് കരകവിഞ്ഞു. വരഗാര് നിറഞ്ഞ് ഒഴുകിയതോടെ പുതൂര് പഞ്ചായത്തിലെ ഇടവാണി, ഭൂതയാര്, ചെമ്പവട്ടക്കാട് എന്നീ ആദിവാസി ഊരുകള് ഒറ്റപ്പെട്ടു. ഒരു കോടിയിലധികം രൂപയുടെ കൃഷിനാശമാണ് അട്ടപ്പാടിയില് മാത്രം ഇതുവരെ ഉണ്ടായിട്ടുള്ളത്.
അട്ടപ്പാടിയിലേക്കുള്ള വൈദ്യുതി വിതരണം തടസപ്പെട്ടിട്ട് അഞ്ച് ദിവസം പിന്നിട്ടു. 33 കെ.വി ടവറുകള് അടക്കം 25 ഓളം വൈദ്യുതി പോസ്റ്റുകള് തകര്ന്നു വീണു. വിവിധയിടങ്ങളിലായി മരം കടപുഴകി വീണ് പത്ത് വീടുകളുടെ മേല്ക്കൂര തകര്ന്നു. അഗളി, ഷോളയൂര് എന്നിവിടങ്ങളില് മരം കടപുഴകി റോഡില് പതിച്ച് ഗതാഗതം ഏറെനേരം തടസ്സപ്പെട്ടു. മലയോര മേഖലയായ നെല്ലിയാമ്പതിയില് മണ്ണിടിഞ്ഞ് ഗതാഗത തടസമുണ്ടായി.
ജില്ലയില് ലഭിച്ചത് 103.71 മില്ലിമീറ്റര് മഴ
ഓഗസ്റ്റ് ആറ് രാവിലെ എട്ട് മുതല് ഇന്ന് (ഓഗസ്റ്റ് ഏഴ്) രാവിലെ എട്ട് വരെ ജില്ലയില് ലഭിച്ചത് 103.71 മില്ലിമീറ്റര് മഴ. ജില്ലയിലെ ആറു താലൂക്കുകളിലായി ലഭിച്ച ശരാശരി മഴയാണിത്. മണ്ണാര്ക്കാട് താലൂക്കില് 108.6 മില്ലിമീറ്റര്, പട്ടാമ്പിയില് 82.65, ആലത്തൂരില് 119, ഒറ്റപ്പാലം 120.8, ചിറ്റൂര് 63, പാലക്കാട് 128.2 മില്ലിമീറ്റര് മഴയാണ് ലഭിച്ചത്.
കണ്ട്രോള് റൂം നമ്പര് 1077
ജില്ലയില് കാലവര്ഷം ശക്തിപ്രാപിച്ചതിനെ തുടര്ന്ന് കാലവര്ഷവുമായി ബന്ധപ്പെട്ട അന്വേഷണങ്ങള്ക്കായി കണ്ട്രോള് റൂം തുറന്നു. സിവില് സ്റ്റേഷനിലെ അടിയന്തിര പ്രതികരണ കേന്ദ്രത്തില് തുറന്ന കണ്ട്രോള്റൂമില് അന്വേഷണങ്ങള്ക്കായി 1077എന്ന നമ്പറില് ബന്ധപ്പെടാമെന്ന് ജില്ലാ കലക്ടര് അറിയിച്ചു. ജില്ലയില് അടുത്ത രണ്ടാഴ്ച അതിശക്തമായ മഴയ്ക്ക് സാധ്യതയുണ്ടെന്ന് മുന്നറിയിപ്പ് ലഭിച്ചതിനെത്തുടര്ന്നാണ് കണ്ട്രോള് റൂം തുറന്നത്. കൂടാതെ കൊവിഡ്, കാലവര്ഷം എന്നിവയുമായി ബന്ധപ്പെട്ട സംശയങ്ങള്ക്ക് എല്ലാ താലൂക്കുകളിലും കണ്ട്രോള് റൂം നിലവിലുണ്ട്.