ജോലിയും ചിഹ്നവും ക്യാമറ; പരിചയപ്പെടുത്താനും എളുപ്പം, പാലക്കാട് പ്രതീക്ഷയോടെ വണ്‍ ഇന്ത്യ വണ്‍ പെന്‍ഷന്‍ സംഘടന

പാലക്കാട്: വണ്‍ ഇന്ത്യ വണ്‍ പെന്‍ഷന്‍ സംഘടന തിരഞ്ഞെടുപ്പ് രാഷ്ട്രീയത്തില്‍ കന്നിയങ്കമാണ്. നെന്മാറ ബ്ലോക്ക് പഞ്ചായത്ത് പതിമൂന്നാം വാര്‍ഡായ മംഗലം ഡിവിഷനില്‍ ഇവരുടെ സ്ഥാനാര്‍ത്ഥിയാണ് സന്തോഷ് സെബാസ്റ്റിയന്‍. പ്രചരണത്തിനിറങ്ങുമ്പോഴെല്ലാം സന്തോഷിന്‍റെ നെഞ്ചോടു ചേര്‍ന്നൊരു ക്യാമറയുണ്ടാകും. ഫോട്ടോഗ്രഫിയില്‍ കാല്‍ നൂറ്റാണ്ട് പിന്നിട്ട സന്തോഷിന്‍റെ തിരഞ്ഞെടുപ്പു ചിഹ്നം കൂടിയാണ് ഈ ക്യാമറ. ചിഹ്നവും ആളെയും പരിചയപ്പെടുത്താന്‍ മറ്റൊരു വഴി സന്തോഷിന് ആവശ്യമില്ല. വണ്‍ ഇന്ത്യ വണ്‍ പെന്‍ഷന്‍ സംഘടനയെപ്പോലെ സന്തോഷും തിരഞ്ഞെടുപ്പ് രാഷ്ട്രീയത്തില്‍ ആദ്യം കൈവെയ്ക്കുകയാണ്.

Also Read: ജവാന്‍റെ ജീവന്‍ രക്ഷിയ്ക്കാനായി നല്‍കിയത് വലത് കൈ... അതേ ജവാന്‍റെ കൈപിടിച്ച് കേരളത്തിന്‍റെ മരുമകളായി, ഇപ്പോള്‍ ബിജെപി സ്ഥാനാര്‍ത്ഥി, അമ്പരപ്പിക്കും ജീവിത കഥ

ഫോട്ടോ ഗ്രാഫറായുള്ള ഇരുപത്തിയഞ്ചു വര്‍ഷക്കാലത്തുണ്ടായ സുഹൃത്തുക്കളും ബന്ധങ്ങളുമാണ് സന്തോഷിന്‍റെ ഊര്‍ജം. രാഷ്ട്രീയ വ്യക്തതയില്ലാത്തവരെന്ന വിമര്‍ശനങ്ങളെ അതിജീവിച്ചാണ് പ്രചരണം. ധനികരെന്നോ ദരിദ്രനെന്നോ വ്യത്യാസമില്ലാതെ അറുപതു തികഞ്ഞ എല്ലാവര്‍ക്കും പതിനായിരം രൂപ പെന്‍ഷന്‍ എന്ന സംഘടനയുടെ ആശയമാണ് സന്തോഷിനെ ആകര്‍ഷിച്ചത്. പ്രചാരണ വിഷയവും വാഗ്ദാനവും ഇതുതന്നെയാണ്. വോട്ടര്‍മാര്‍ക്കിടയില്‍ സംഘടനയുടെ ആശയത്തിനും ലക്ഷ്യത്തിനും വലിയ സ്വീകാര്യതയുണ്ടെന്ന് സന്തോഷ് പറഞ്ഞു.

Also Read: തലശേരി നഗരം മിനി അധോലോകമോ? പട്ടാപ്പകൽ മുളക് പൊടിയെറിഞ്ഞും കവർച്ച, പിന്നില്‍ കുഴൽപ്പണ - സ്വർണക്കടത്ത് സംഘം?

സുഹൃത്തുക്കള്‍ക്കും സംഘടനാ പ്രവര്‍ത്തകര്‍ക്കുമൊപ്പമാണ് പ്രചരണത്തിനിറങ്ങുന്നത്. ഒപ്പം ക്യാമറയുമുണ്ടാവും. മുന്നണികളുടെ അഡ്ജസ്റ്റ്‌മെന്‍റ് രാഷ്ട്രീയത്തിനെതിരേ നാട്ടുകാര്‍ വോട്ടുചെയ്യുമെന്നാണ് ഒഐഒപി പ്രവര്‍ത്തകര്‍ പറയുന്നത്. കിഴക്കഞ്ചേരി പഞ്ചായത്തില്‍ പതിനൊന്നാം വാര്‍ഡ്, വടക്കഞ്ചേരിയി ആറാം വാര്‍ഡ് എന്നിവിടങ്ങളിലും വണ്‍ ഇന്ത്യ വണ്‍ പെന്‍ഷന്‍കാര്‍ക്ക് സ്ഥാനാര്‍ത്ഥിയുണ്ട്. കിഴക്കഞ്ചേരി കോട്ടക്കുളത്ത് കേരളാ കോണ്‍ഗ്രസ് നേതാവായിരുന്ന വില്‍സണ്‍ കണ്ണാടനാണ് സ്ഥാനാര്‍ത്ഥി. മൂന്നര പതിറ്റാണ്ടുകാലം കേരള കോണ്‍ഗ്രസിന്‍റെ വിവിധ ഘടകങ്ങളില്‍ പ്രവര്‍ത്തിച്ച വില്‍സന്റെ സ്വാധീനം വണ്‍ ഇന്ത്യ വണ്‍ പെന്‍ഷന്‍ മൂവ്‌മെന്‍റിന് പ്രതീക്ഷ നല്‍കുന്നുണ്ട്.

പാലക്കാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ

പാലക്കാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ