തമിഴ്‌നാട്ടിലും കേരളത്തിലും വോട്ട്; അതിര്‍ത്തി ഗ്രാമങ്ങളില്‍ നാലായിരത്തിലേറെ ഇരട്ട വോട്ടര്‍മാര്‍!

പാലക്കാട്: കേരള-തമിഴ്നാട് അതിര്‍ത്തി ഗ്രാമങ്ങളില്‍ രണ്ടുവോട്ടുള്ളവര്‍ വ്യാപകമെന്ന് ആരോപണം. പുതുശേരി പഞ്ചായത്തില്‍ വാളയാര്‍ അതിര്‍ത്തിയിലുള്ള മൂന്ന് വാര്‍ഡുകളില്‍ മാത്രം 370 ഇരട്ടവോട്ടുകളുള്ളവരുണ്ടെന്ന് കണ്ടെത്തിയിട്ടുണ്ട്. പാലക്കാട് ജില്ലയിലെ വിവിധ അതിര്‍ത്തി പഞ്ചായത്തുകളിലായി നാലായിരത്തിലേറെ ഇരട്ട വോട്ടുകളുണ്ടെന്നാണ് നിഗമനം. ഇതില്‍ക്കൂടുതല്‍പ്പേര്‍ സ്ത്രീകളാണ്. പലരും തമിഴ്നാട്ടിലേക്ക് വിവാഹം കഴിഞ്ഞ് പോയവരാണെങ്കിലും ഇരുസംസ്ഥാനങ്ങളിലും വോട്ടുണ്ട്.

Also Read: പ്ലാസ്റ്റിക് കുപ്പിയെന്ന വ്യാജേന കഞ്ചാവ് കടത്ത്; ആന്ധ്രയിലെ മുഖ്യ കച്ചവടക്കാരൻ പാലക്കാട്ട് പിടിയിൽ

കേരളത്തിലും തമിഴ്‌നാട്ടിലും തിരിച്ചറിയല്‍ രേഖകള്‍, ആധാര്‍ കാര്‍ഡ്, റേഷന്‍ കാര്‍ഡ് തുടങ്ങിയവ കൈവശമുള്ളവരാണ് രണ്ടിടത്തും വോട്ടുചെയ്യുന്നത്. മൂന്നുമുന്നണികള്‍ക്കും ഇവര്‍ക്കിടയില്‍ സ്വാധീനമുണ്ട്. ഇരട്ട വോട്ടര്‍മാര്‍ അന്തിമ പട്ടികയില്‍ ഉള്‍പ്പെട്ടിട്ടുണ്ടോയെന്നും പരിശോധിക്കാനും ഇല്ലെങ്കില്‍ പേരുചേര്‍ക്കാനും പ്രാദേശിക നേതാക്കള്‍ത്തന്നെ മുന്നിലുണ്ട്. അന്തിമ വോട്ടര്‍ പട്ടികയിലേക്ക് ഇവര്‍ പരമാവധി പേരെ തിരുകിക്കയറ്റുന്നുവെന്ന ആരോപണവുമുയര്‍ന്നിട്ടുണ്ട്. ബൂത്ത് ലെവല്‍ ഓഫിസര്‍മാര്‍ ഇടപെട്ട് ഇത്തരം വോട്ടര്‍മാരെ കണ്ടെത്തുന്നുണ്ടെങ്കിലും നേതാക്കളുടെ സമ്മര്‍ദത്തിനുവഴങ്ങി ഉള്‍പ്പെടുത്തുകയാണ് പതിവ്. രേഖകള്‍ രണ്ടു സംസ്ഥാനങ്ങളിലായതിനാല്‍ രണ്ടുവോട്ട് ഉണ്ടോ എന്ന് പരിശോധിച്ച് ഉറപ്പുവരുത്തുന്നതിനും സാങ്കേതിക ബുദ്ധിമുട്ടുകളുണ്ട്.

Also Read: ആദ്യം യുഡിഎഫിന് ഭൂരിപക്ഷം, പിന്നാലെ തകര്‍ച്ച; ഇവിടെ രാഷ്ട്രീയ സമവാക്യങ്ങള്‍ തെറ്റും! മുന്നണി ബന്ധങ്ങള്‍ കുഴഞ്ഞു മറിഞ്ഞ കരിമ്പുഴ പഞ്ചായത്ത്

ഏറ്റവും കൂടുതല്‍ ഇരട്ടവോട്ടുകള്‍ രേഖപ്പെടുത്താറുള്ളത് തദ്ദേശ തെരഞ്ഞെടുപ്പുകളിലാണ്. കൊവിഡ് കാലത്തെ നിയന്ത്രണങ്ങള്‍ മറികടന്ന് ഇത്തരം വോട്ടര്‍മാരെ നാട്ടിലെത്തിയ്ക്കാന്‍ മുന്നണികള്‍ പ്രത്യേക സംഘങ്ങളെ നിയോഗിച്ചിട്ടുണ്ട്. പാര്‍ട്ടികള്‍ ചെലവുകള്‍പ്പോലും വഹിച്ചാണ് ഇരട്ട വോട്ടര്‍മാരെ മടക്കിക്കൊണ്ടുവരുന്നത്.


പാലക്കാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ


പാലക്കാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ