പോലീസ് സ്റ്റേഷന് മുന്നിലൂടെ ആടിനെ ആക്രമിച്ച് പാഞ്ഞത് പുലി!! മൂന്ന് നാൾ കഴിഞ്ഞ് വീണ്ടുമെത്തുമെന്ന് വനം വകുപ്പ്

മലമ്പുഴയിൽ ജനവാസ മേഖലയിലെത്തി ആടിനെ ആക്രമിച്ചത് പുലി തന്നെയെന്ന് നിഗമനം. മലമ്പുഴ പോലീസ് സ്റ്റേഷന് മുന്നിലെ ക്യാമറയിൽ പതിഞ്ഞ ദൃശ്യങ്ങൾ പരിശോധിച്ചതിലൂടെയാണ് ഇവിടെ എത്തിയത് പുലിയാണെന്ന അനുമാനത്തിലേക്ക് വനം വകുപ്പ് അധികൃതർ എത്തിയത്. തിങ്കളാഴച രാത്രി പത്തരയോടെയാണ് ജലസേചന വകുപ്പിന്റെ ക്വാർട്ടേഴ്സിൽ ആട്ടിൻകുട്ടിയെ ആക്രമിച്ചത്. സമീപത്ത് താമസിക്കുന്ന നിർമാണ തൊഴിലാളി കുമാരന്റെ ഒരാഴ്ച മാത്രം പ്രായമുള്ള ആട്ടിൻകുട്ടിയാണ് വന്യജീവിയുടെ ആക്രമണത്തിന് ഇരയായത്.

സംഭവമറിഞ്ഞ് വനപാലകരും വാച്ചർമാരും സ്ഥലം പരിശോധിച്ചെങ്കിലും പുലിയുടെ കാൽപ്പാടുകളോ ആടിന്റെ അവശിഷ്ടങ്ങളോ കണ്ടെത്താൻ കഴിഞ്ഞിരുന്നില്ല. അതേ സമയം മലമ്പുഴ പോലീസ് സ്റ്റേഷനിലെ സി.സി.ടി.വി ദൃശ്യങ്ങളിൽ വന്യ ജീവിയുടെ നീക്കം പതിഞ്ഞിരുന്നു. രണ്ട് സെക്കന്റിനിടെ പാഞ്ഞു പോകുന്ന ജീവി പുലിയാണെന്ന് ദൃശ്യത്തിൽ വ്യക്തമല്ല. എന്നാൽ, ജീവിയുടെ വലിപ്പവും ചലനങ്ങളും വേഗതയും പുലിയുടേതിന് സമാനമാണെന്ന് വനം വകുപ്പ് പറയുന്നു.

ചൊവ്വാഴ്ച മുതൽ രാത്രി പത്തു മണിവരെ ഇവിടെ വനപാലകർ പട്രോളിങ് തുടങ്ങി. ഒരു തവണ ഇര തേടി എത്തിയ പുലി മൂന്നുനാൾ കഴിഞ്ഞ് പ്രദേശത്ത് വീണ്ടും എത്തുന്നത് പതിവാണെന്ന് പറയുന്നു. അതിനാൽ പ്രദേശവാസികൾ കൂടുതൽ ജാഗ്രത പാലിക്കണമെന്ന് നിർദ്ദേശിച്ചിട്ടുണ്ട്. ജനവാസ മേഖലയിൽ പുലിയെത്തിയത് നാട്ടുകാരെ ഭീതിയിലാഴ്ത്തി. ഇരുട്ടു വീണാൽ ജനം പുറത്തിറങ്ങാൻ ഭയപ്പെട്ടു തുടങ്ങി. കഴിഞ്ഞ മാസം മലമ്പുഴ കവയിലെ പാറയിൽ കരിമ്പുലിയും പുള്ളിപുലിയും നിൽക്കുന്ന ദൃശ്യം ഒരു ഫോട്ടോഗ്രാഫർ പകർത്തിയിരുന്നു.