മാവോവാദി കമാന്ഡര് സാവിത്രിയുമായി തെളിവെടുപ്പ്; ഊരില് പരിചിത മുഖം
മാവോവാദി നേതാവ് സാവിത്രിയെ അട്ടപ്പാടിയില് തെളിവെടുപ്പിനെത്തിച്ചു. പാലയൂര്, ആനവായ് ഊരുകളിലാണ് തെളിവെടുപ്പിനെത്തിച്ചത്. പാലൂരില് ക്ലാസെടുത്തതിനും വനംവകുപ്പിന്റെ കാര് ഷെഡ് കത്തിച്ചതിനുമാണ് അഗളി പോലീസ് ഇവര്ക്കെതിരെ കേസ് രജിസ്റ്റര് ചെയ്തിരിക്കുന്നു. ഊരിലെ സ്ത്രീകളുമായി ബന്ധം സ്ഥാപിച്ചായിരുന്നു ഇവര് പ്രവര്ത്തിച്ചിരുന്നത്.
Lipi 12 Jan 2022, 7:08 pm
ഹൈലൈറ്റ്:
- മാവോവാദി നേതാവ് സാവിത്രിയെ അട്ടപ്പാടിയില് എത്തിച്ചു
- അജിത എന്ന പേരില് പ്രവര്ത്തിച്ച് മാവോവാദി ആശയങ്ങള് പ്രചരിപ്പിച്ചു
- ജില്ലാ പോലീസ് മേധാവിയുടെ സാന്നിധ്യത്തിലായിരുന്നു തെളിവെടുപ്പ്
പാലക്കാട്(Palakkad): മാവോവാദി നേതാവും കര്ണാടക ലോഗ് ഗൗഡ സ്വദേശിയുമായ സാവിത്രിയെ അട്ടപ്പാടിയില് തെളിവെടുപ്പിനെത്തിച്ചു. ജില്ലാ പോലിസ് മേധാവിയുടെ സാന്നിധ്യത്തിലായിരുന്നു തെളിവെടുപ്പ്. പാലയൂര്, ആനവായ് ഊരുകളിലായിരുന്നു തെളിവെടുപ്പ് നടത്തിയത്. 2017-ല് പാലൂര് ഊരിലെത്തി ക്ലാസുകള്ക്ക് നേതൃത്വം നല്കിയതിനും 2014-ല് ആനവായ് അവലോക്കിലുള്ള വനം വകുപ്പിന്റെ ക്യാമ്പ് ഷെഡ് കത്തിച്ചതിനും ഇവര്ക്കെതിരേ അഗളി പോലിസ് കേസ് രജിസ്റ്റര് ചെയ്തിരുന്നു. ഈ കേസുകളിലാണ് തെളിവെടുപ്പ് നടന്നത്.
രാത്രിയോടെ പാലക്കാട് സെഷന്സ് കോടതിയില് ഹാജരാക്കി സാവിത്രിയെ വിയ്യൂര് സെന്ട്രല് ജയിലിലേക്ക് തിരിച്ചയച്ചു. ഡിസംബര് 23-ന് എന്ഐഎ സംഘം സാവിത്രിയെ അട്ടപ്പാടിയിലെ മഞ്ചക്കണ്ടിയില് തെളിവെടുപ്പിന് എത്തിച്ചിരുന്നു. 2013 മുതല് 2017 വരെ അട്ടപ്പാടിയില് ഭവാനി ദളത്തില് പ്രവര്ത്തിച്ചിരുന്നതായി സാവിത്രി നല്കിയ മൊഴിയുടെ അടിസ്ഥാനത്തിലാണ് തെളിവെടുപ്പിനെത്തിച്ചത്. 2021 നവംബര് ഒമ്പതിനാണ് വയനാട് സുല്ത്താന്ബത്തേരിയില് വെച്ച് മാവോവാദി പശ്ചിമഘട്ട സോണല് സെക്രട്ടറിയായ കൃഷ്ണമൂര്ത്തിയെയും കബനി ദളത്തിന്റെ കമാന്ഡറായ സാവിത്രിയെയും എന്ഐഎ അറസ്റ്റ് ചെയ്തത്.
Topic: Palakkad, Maoist Savithri, Attappadi