പാലക്കാട്: കൊവിഡ് അടച്ചിടല്‍ വരുത്തിയ പ്രതിസന്ധിയില്‍ നിന്നും കരകയറാനാവാതെ ആത്മഹത്യയിലേക്ക് നീങ്ങുന്ന വ്യാപാരി സമൂഹം പ്രതീകാത്മകമായി ശവമഞ്ച ഘോഷയാത്ര നടത്തി. വ്യാപാരി വ്യവസായി കോണ്ഗ്രസ് ജില്ലാ കമ്മിറ്റിയുടെ നേതൃത്വത്തിലായിരുന്നു സമരം. വ്യാപാരികളെ ആത്മഹത്യയിലേക്കു നയിക്കുന്ന സര്‍ക്കാരുകളുടെ നിലപാടുകളില്‍ പ്രതിഷേധിച്ചും ഒരു മാസത്തിനകം പതിനൊന്നോളം വ്യാപാരികളുടെ ആത്മഹത്യയില്‍ അനുശോചിച്ചുമായിരുന്നു പ്രതീകാത്മകമായി നഗരത്തില്‍ നടത്തിയ 'ശവ മഞ്ച'ഘോഷ യാത്ര നടത്തിയത്.
Also Read: സൈക്കിളുകള്‍ക്ക് നല്ലകാലം.... പഴയ പതിവുകള്‍ തിരികെ വരുന്നു, വീഡിയോ കാണാം
ജില്ലാ പ്രസിഡന്റ് സി വി സതീഷ് യോഗത്തില്‍ അധ്യക്ഷനായിരുന്നു. ജില്ലാ വര്‍ക്കിംഗ് പ്രസിഡന്റുമാരായ സുധാകരന്‍ പ്ലാക്കാട്ട്, വി ജി ദീപേഷ്, ഭാരവാഹികളായ കെ ആര്‍ ശരരാജ്, ഹരിദാസ് മച്ചിങ്ങല്‍, വി ബി രാജു, പി ബി പ്രശോബ്, ഹക്കീം കല്‍മണ്ഡപം എന്നിവര്‍ സംസാരിച്ചു. വ്യാപാരികളെ ആത്മഹത്യയില്‍ നിന്നും രക്ഷിക്കുക, ആത്മഹത്യചെയ്ത വ്യാപാരികളുടെ കുടുംബങ്ങള്‍ക്ക് മതിയായ നഷ്ടപരിഹാരം നല്‍കുക, കൂടുതല്‍ സമയം തുറന്നു പ്രവര്‍ത്തിക്കുവാന്‍ അനുവദിക്കുക, അടച്ചിടലിനെ തുടര്‍ന്ന് വില്പന സാധനങ്ങള്‍ നശിച്ചു പോയ വ്യാപാരികള്‍ക്ക് നഷ്ടപരിഹാരം നല്‍കുക, പ്രഖ്യാപിച്ച ആനുകൂല്യങ്ങള്‍ നടപ്പാക്കുക തുടങ്ങിയ ആവശ്യങ്ങളും സമരത്തില്‍ ഉന്നയിച്ചു.