പാലക്കാട്(palakkad): വടക്കഞ്ചേരിയില് കോണ്ഗ്രസ് വിട്ടെത്തിയ കുടുംബങ്ങള്ക്ക് സിപിഎമ്മിലേക്ക് ഉജ്വല സ്വീകരണം. മുപ്പത്തിയഞ്ചിലേറെ കുടുംബങ്ങളില്നിന്നായി 89 പേരാണ് സിപിഎമ്മിലെത്തിയത്. വടക്കഞ്ചേരി പഞ്ചായത്തിലെ 13-ാം വാര്ഡായ പാളയത്താണ് കോണ്ഗ്രസില് കൂട്ടക്കൊഴിഞ്ഞുപോക്കുണ്ടായത്. കോണ്ഗ്രസിന്റെ വര്ഗീയ പ്രീണനം, പ്രാദേശിക നേതാക്കളുടെ തൊഴിലാളി വിരുദ്ധ സമീപനം എന്നിവയില് പ്രതിഷേധിച്ചാണ് രാജിയെന്ന് പ്രവര്ത്തകര് പറഞ്ഞു. കഴിഞ്ഞ ദിവസം സംഘ് പരിവാറുകാര് വെട്ടിക്കൊലപ്പെടുത്താന് ശ്രമിച്ച കോണ്ഗ്രസ് ബൂത്ത് പ്രസിഡന്റ് വിഎസ് ശിവദാസ്, ബൂത്ത് വൈസ് പ്രസിഡന്റ് സന്തോഷ് എന്നിവരുടെ നേതൃത്വത്തിലാണ് വര്ഷങ്ങളായി കോണ്ഗ്രസ് പ്രവര്ത്തകരായിരുന്ന കുടുംബങ്ങള് ഇടതുപക്ഷത്തേത്ത് ചേക്കേറിയത്.
പ്രദേശത്ത് ആര്എസ്എസ്സുമായുണ്ടായിരുന്ന അസ്വാരസ്യങ്ങളില് കോണ്ഗ്രസ് പ്രവര്ത്തകര്ക്ക് അനുകൂലമായി നേതൃത്വം ഇടപെടാതിരുന്നതാണ് പ്രശ്നങ്ങളുടെ തുടക്കം. ആര്എസ്എസ്സിനോട് പാലക്കാട്ടെ കോണ്ഗ്രസ് നേതാക്കള്ക്ക് മൃദുസമീപനമാണെന്നും സാധാരണ പ്രവര്ത്തകരുടെ ജീവനുപോലും വിലനല്കുന്നില്ലെന്നും കോണ്ഗ്രസ് വിട്ടെത്തിയവര് കുറ്റപ്പെടുത്തി. സിപിഎം വടക്കഞ്ചേരി ഏരിയ കമ്മിറ്റി ഓഫിസിലാണ് സ്വീകരണ പരിപാടി സംഘടിപ്പിച്ചത്.
കൊവിഡ് നിയന്ത്രണങ്ങളുള്ളതിനാല് മുതിര്ന്ന നേതാക്കളും കോണ്ഗ്രസ് വിട്ടെത്തിയ കുടുംബങ്ങളും മാത്രമാണ് ചടങ്ങില് പങ്കെടുത്തത്. ചടങ്ങ് സിപിഐഎം സംസ്ഥാന കമ്മിറ്റിയംഗം സികെ രാജേന്ദ്രന് ഉദ്ഘാടനം ചെയ്തു. സി തമ്പു അധ്യക്ഷത വഹിച്ചു. സിപിഐഎം ജില്ലാ സെക്രട്ടറി ഇ എന് സുരേഷ് ബാബു രാജിവെച്ചെത്തിയവരെ ചുവപ്പുഹാരമണിയിച്ച് സ്വീ്കരിച്ചു. ജില്ലാ സെക്രട്ടേറിയറ്റ് അംഗം ടിഎം ശശി, ജില്ലാ കമ്മിറ്റി അംഗങ്ങള് സി കെ ചാമുണ്ണി, കെ എന് സുകുമാരന്, ലോക്കല് സെക്രട്ടറി കെ ജയപ്രകാശന്, പി ഗംഗാധരന് എന്നിവര് സംസാരിച്ചു.
Topic: Palakkad, vadakkancherry congress, congress workers joined cpm