മൃതദേഹം മാറിയ സംഭവം: പിരിച്ചുവിടല്‍ നടപടിക്കെതിരെ സമരവുമായി നഴ്‌സുമാര്‍

പാലക്കാട്: ജില്ലാ ആശുപത്രിയില്‍ മൃതദേഹം മാറി നല്‍കിയ സംഭവത്തില്‍ പിരിച്ച് വിട്ട താത്ക്കാലിക നഴ്‌സുമാരെ തിരിച്ചെടുക്കണമെന്നാവശ്യപ്പെട്ട് നഴ്‌സുമാരും ജീവനക്കാരും പ്രതിഷേധ സമരം നടത്തി. സംഭവത്തില്‍ യഥാര്‍ഥ കുറ്റക്കാരെ ശിക്ഷിക്കാതെ നഴ്‌സുമാരെ ബലിയാടാക്കാനുള്ള തീരുമാനം പുനപരിശോധിക്കാത്തപക്ഷം പണിമുടക്ക് ഉള്‍പ്പെടെ സമരം പരിപാടിയുമായി മുന്നോട്ട് പോകാനാണ് തീരുമാനമെന്ന് നഴ്‌സുമാര്‍ പറയുന്നു.

Also Read: നിലമ്പൂരിലേക്ക് ട്രെയിന്‍ ഓടിച്ചേക്കും

പാലക്കാട് മൂത്താന്തറയില്‍ കൊവിഡ് ബാധിച്ച് മരിച്ച വയോധികയുടെ മൃതദേഹത്തിന് പകരം അട്ടപ്പാടിയില്‍ മുങ്ങിമരിച്ച യുവതിയുടെ മൃതദേഹം മാറി നല്‍കിയത് വിവാദമായിരുന്നു. സംഭവത്തില്‍ ആറു താല്‍ക്കാലിക ജീവനക്കാരെ പിരിച്ചുവിടുകയും ഒരു സ്ഥിരം ജീവനക്കാരനെ സസ്‌പെൻഡ് ചെയ്യുകയുമാണ് ഉണ്ടായത്. ജില്ലാ ആശുപത്രിയില്‍ അട്ടപ്പാടി സ്വദേശിയായ ആദിവാസി യുവതിയുടെ മൃതദേഹം മാറി നല്‍കിയ സംഭവത്തില്‍ സ്വീകരിച്ച നടപടിയില്‍ അപാകതയുണ്ടായതായും മേധാവികള്‍ പറഞ്ഞതനുസരിച്ച് മാത്രമാണ് പ്രവര്‍ത്തിച്ചതെന്നും നഴ്‌സുമാര്‍ ആരോപിക്കുന്നു. ജില്ലാ മെഡിക്കല്‍ ഓഫീസറുടെ നേതൃത്വത്തില്‍ അന്വേഷണം നടത്തിയാണ് നടപടി സ്വീകരിച്ചത്.

Also Read: ദേശീയപാതയ്ക്കരികിൽ കടകള്‍ കേന്ദ്രീകരിച്ച് കവര്‍ച്ച; അന്തര്‍സംസ്ഥാന മോഷണ സംഘം പിടിയില്‍

അതേസമയം മോര്‍ച്ചറിയുടെ ചുമതലയുള്ള ആര്‍എംഒ ഉള്‍പ്പെടെയുള്ളവര്‍ക്കെതിരെ നടപടിയെടുക്കാതെ സ്ഥിരം ജീവനക്കാരെ രക്ഷിക്കാനുള്ള ശ്രമം നടത്തുന്നതായാണ് ആരോപണം. ആശുപത്രി സൂപ്രണ്ടിൻ്റെ നടപടി ഏകപക്ഷീയമാണെന്നും തീരുമാനം പിന്‍വലിക്കണമെന്നും ആവശ്യപ്പെട്ടാണ് ആശുപത്രിക്ക് മുന്നില്‍ നഴ്‌സുമാരും ജീവനക്കാരും സൂചന സമരം നടത്തിയത്. അതേസമയം അന്വേഷണ റിപ്പോര്‍ട്ടിൻ്റെ പകര്‍പ്പ് ആരോഗ്യ വകുപ്പിന്റെ പരിഗണനയിലുണ്ടെന്നും കൂടുതല്‍ നടപടിക്ക് സാധ്യതയുണ്ടെന്നാണ് ആശുപത്രി സൂപ്രണ്ട് പറയുന്നത്.

പാലക്കാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ