അട്ടപ്പാടിയില്‍ കാട്ടാനകള്‍ വിലസുന്നു; ഒടുവിലത്തെ ഇര ഊരുമൂപ്പന്‍

പാലക്കാട്: അട്ടപ്പാടിയില്‍ ജനജീവിതം ഭീതിയിലാഴ്ത്തി കാട്ടാനകള്‍ വിലസുന്നു. വ്യാപക കൃഷിനാശം വരുത്തിയും വീടുകള്‍ തകര്‍ത്തും വിലസുന്ന കാട്ടാനകളുടെ ഒടുവിലത്തെ ഇര ഊരുമൂപ്പന്‍. വണ്ണാന്തുറ ഊര് മൂപ്പന്‍ നഞ്ചമൂപ്പനെ (71) ആണ് ആനയുടെ ആക്രമണത്തില്‍ കൊല്ലപ്പെട്ട നിലയില്‍ കണ്ടെത്തിയത്. വണ്ണാന്തറ കൃഷിസ്ഥലത്തോട് ചേര്‍ന്ന കാട്ടിലാണ് മൃതദേഹം കണ്ടത്. ശനിയാഴ്ച ആടുമേയ്ക്കുന്നതിനായി പോയതായിരുന്നു. രാത്രിയില്‍ ആനയുടെ മുൻപില്‍ നിന്നും തലനാരിഴക്കാണ് പലരും രക്ഷപ്പെടുന്നത്.

Also Read: കൊവിഡ് ഭീതിയൊഴിയാതെ പട്ടാമ്പി; പരിശോധനകള്‍ തുടരുന്നു

ഒരു മോഴയാനയുടെ ആക്രമണത്തില്‍ മൂന്നുമാസത്തിനിടെ 19 വീടുകള്‍ തകര്‍ത്തു. ഒരു ക്ഷീര സംഭരണ വിപണന കേന്ദ്രവും ആന തകര്‍ത്തു. ഷോളയൂര്‍ മേഖലയില്‍ വ്യാപക കൃഷിനാശമാണ് ആനകള്‍ വരുത്തുന്നത്. വീടിൻ്റെ ജനലും, വാതിലും തകര്‍ത്ത് ഭക്ഷ്യവസ്തുക്കള്‍ എടുക്കുന്നതാണ് മോഴആനയുടെ രീതി. ഷോളയൂര്‍, വെച്ചപ്പതി, കടമ്പാറ, കത്താളക്കണ്ടി, വര ശുപാടി സ്ഥലങ്ങളിലാണ് മോഴയാന ഭീതി വിതച്ച് വിഹരിക്കുന്നത്. വീടുകള്‍ ഉന്തിയിടുന്നത് സ്ഥിരമാക്കിയതിനാലാണ് ജനങ്ങള്‍ ആനക്ക് 'ബുള്‍ഡോസര്‍' എന്ന പേരും നല്‍കി. വെച്ചപ്പതിയിലെ വീടിൻ്റെ ചുമര്‍ തകര്‍ത്തപ്പോള്‍ വീടിനോട് ചേര്‍ന്നുള്ള ചായ്പില്‍ ഉണ്ടായിരുന്ന 40 വളര്‍ത്തു കോഴികളും ചത്തു.

Also Read: ഗജവീരന്‍ കോങ്ങാട് കുട്ടിശങ്കരന്‍ ഇനി ഓർമ്മ; ചരിഞ്ഞത് ലക്ഷണമൊത്ത കൊമ്പൻ

ഷോളയൂര്‍ മേഖല മുതല്‍ പെട്ടിക്കല്‍, കോട്ടമല ഭാഗം വരെ വിഹരിക്കുന്നത് അഞ്ച് കാട്ടാനകളാണ്. മോഴക്കൊപ്പം 'അണ്ണന്‍ തമ്പി' എന്ന് വിളിപ്പേരുള്ള രണ്ട് ആനകളും ഒരുകുട്ടി കൊമ്പനും ഉണ്ട്. അണ്ണന്‍ തമ്പിമാരുടെ ആക്രമണത്തില്‍ വലയലൂരില്‍ വെച്ച് ഒരു ബൈക്ക് യാത്രികന് പരിക്കേറ്റു. മോഴ ആനയെ പിടികൂടി വനം വകുപ്പിൻ്റെ കേന്ദ്രത്തിലെത്തിക്കുന്നതിനുള്ള നടപടികള്‍ക്കായി ഡിവിഷണല്‍ ഫോറസ്റ്റ് ഓഫീസര്‍ സര്‍ക്കാരിലേക്ക് അനുമതിക്കായി അപേക്ഷ സമര്‍പ്പിച്ചുള്ളതായി അഗളി ഫോറസറ്റ് റേഞ്ച് ഓഫീസര്‍ കെ ടി ഉദയന്‍ പറഞ്ഞു.

Also Read: മോഷ്ടിച്ച ബൈക്ക് സ്റ്റാര്‍ട്ടായില്ല; അത് നിര്‍ത്തി കിടന്നുറങ്ങി!! മറ്റൊന്നിൽ യാത്ര ചെയ്യുന്നതിനിടെ പോലീസ് പിടിയിലായി