പാലക്കാട്: മാലിന്യ പ്രശ്‌നം പരിഹരിക്കാന്‍ പുതിയ കണക്കെടുപ്പുമായി പാലക്കാട് നഗരസഭ. നിലവിലെ വ്യവസ്ഥപ്രകാരം വീടുകളില്‍ നിന്നും സ്ഥാപനങ്ങളില്‍ നിന്നുമുള്ള മാലിന്യം ഹരിതകര്‍മ്മ സേനയ്ക്കാണ് കൈമാറേണ്ടത്. ജൈവമാലിന്യങ്ങളും അജൈവ മാലിന്യങ്ങളും സ്വീകരിക്കുന്നതിന് ഓരോ കെട്ടിട ഉടമയും ഹരിതകര്‍മ്മസേനക്ക് നല്‍കേണ്ടത് മാസം 150 രൂപയാണ്. അജൈവമാലിന്യം മാത്രം നല്‍കാന്‍ മാസം 100 രൂപയും. ഉറവിട മാലിന്യസംസ്‌കരണ ഉപാധികള്‍ സ്ഥാപിച്ചവരാണ് അജൈവമാലിന്യം മാത്രം നല്‍കുന്നത്.
ഇവരുടെ പേര്, കെട്ടിടനമ്പര്‍, ഫോണ്‍നമ്പര്‍ തുടങ്ങിയവ നഗരസഭ ശേഖരിച്ചിട്ടുണ്ട്. ഇവരെകൂടി നഗരസഭയുടെ മാലിന്യ നിര്‍മ്മാര്‍ജ്ജന പ്രക്രിയയുടെ ഭാഗമാക്കുന്നതിനുള്ള തുടര്‍നടപടികള്‍ സ്വീകരിക്കുമെന്ന് സ്മിതേഷ് പറഞ്ഞു. നഗരസഭയ്ക്ക് കീഴില്‍ വരുന്ന 61,000 ത്തില്‍ അധികം കെട്ടിടങ്ങളിലാണ് ഇതിനകം പരിശോധന പൂര്‍ത്തിയാക്കിയത്. മാലിന്യം പൊതുഇടങ്ങളില്‍ വലിച്ചെറിയുന്നത് തടയാനാണ് ലക്ഷ്യമിടുന്നത്. ഓരോ കെട്ടിടത്തില്‍ നിന്നും മാലിന്യം ഹരിത കര്‍മസേനയ്ക്ക് കൈമാറിയാല്‍ പൊതുഇടങ്ങളില്‍ വലിച്ചെറിയുന്ന മാലിന്യം കുറയുമെന്നാണ് കരുതുന്നത്. ഓരോ കെട്ടിടവും മാലിന്യം ഹരിതകര്‍മ്മ സേനയ്ക്ക് കൈമാറണമെന്നും അതിന് തയ്യാറാകാത്തവര്‍ക്കെതിരെ നടപടിയെടുക്കാനും നിര്‍ദേശമുണ്ട്.
ശുചിത്വ നഗരം സുന്ദര നഗരം എന്ന ആക്ഷന്‍ പ്ലാന്‍ മുന്‍നിര്‍ത്തിയാണ് നഗരസഭ ആരോഗ്യവിഭാഗം പ്രവര്‍ത്തിക്കുന്നതെന്നും സ്മിതേഷ് പറഞ്ഞു. മാലിന്യ ശേഖരണവും നിര്‍മാര്‍ജനവുമാണ് ലക്ഷ്യം. ഇതുമായി നഗരവാസികളെയെല്ലാം സഹകരിപ്പിക്കാന്‍ 27 ന് വീടുകള്‍ തോറും കയറാനും പദ്ധതിയുണ്ട്.