മീൻ പിടിക്കാൻ മതിൽ ചാടിയിറങ്ങിയത് സുരേഷിൻ്റെ വൈദ്യുതിക്കെണിയിലേക്ക്, പിടഞ്ഞു മരിച്ച പോലീസുകാരെ മാറ്റിയിട്ടതും ഇയാൾ; ഇരട്ട മരണത്തിൽ അറസ്റ്റ്

കെഎപി ക്യാമ്പിലെ ഹവിൽദാർമാരായ എലവഞ്ചേരി കുളമ്പളക്കോട് കുഞ്ഞുവീട്ടിൽ മാരിമുത്തുചെട്ടിയാരുടെ മകൻ അശോക് കുമാർ (35), തരൂർ അത്തിപ്പൊറ്റ കുണ്ടുപറമ്പ് വീട്ടിൽ പരേതനായ കെ സി മാങ്ങോടന്റെ മകൻ എം മോഹൻദാസ് (36) എന്നിവരെയാണ് വ്യാഴാഴ്ച രാവിലെ ഒമ്പതുമണിയോടെ ക്യാമ്പിന് പുറകുവശത്തുള്ള വയലിൽ മരിച്ച നിലയിൽ കണ്ടെത്തിയത്. പോസ്റ്റുമോർട്ടത്തിൽ ഇരുവരുടെയും മരണകാരണം ഷോക്കേറ്റതാണെന്ന് തെളിഞ്ഞു.

ക്യാമ്പിന്റെ ചുറ്റുമതിലിന് പിറകിൽ 200 മീറ്റർ അകലെയാണ് മൃതദേഹങ്ങൾ കിടന്നിരുന്നത്. രണ്ട് മൃതദേഹങ്ങളും തമ്മിൽ ഏകദേശം 60 മീറ്ററോളം അകലമുണ്ടായിരുന്നു. ഇരുവരുടെയും ശരീരത്തിൽ പൊള്ളലേറ്റ പാടുകളും കണ്ടിരുന്നു. ഇരുവരുടെയും കൈകാലുകളിലാണ് കാര്യമായി പൊള്ളലേറ്റിരുന്നത്. സംഭവസ്ഥലത്തെ സാഹചര്യത്തെളിവുകൾ പരിശോധിച്ച് വ്യാഴാഴ്ച തന്നെ വാർക്കാടുള്ള സുരേഷ് ഉൾപ്പെടെ ചിലരെ പോലീസ് കസ്റ്റഡിയിലെടുത്തിരുന്നു. ചോദ്യംചെയ്യലിൽ പങ്കില്ലെന്ന് കണ്ടവരെ വിട്ടയച്ചാണ് സുരേഷിന്റെ അറസ്റ്റ് രേഖപ്പെടുത്തിയത്.

ബുധനാഴ്ച വൈകീട്ട് സുരേഷ് പന്നിയെ പിടികൂടാനായി വീടിന് സമീപമുള്ള വാഴത്തോട്ടത്തിൽ വൈദ്യുതി കെണി സ്ഥാപിച്ചിരുന്നു. പുലർച്ചെ ഒന്നരയോടെ കെണിയിൽ പന്നി കുടുങ്ങിയതായി സംശയിച്ച് നോക്കാനെത്തിയപ്പോഴാണ് രണ്ടുപേർ കുടുങ്ങി മരിച്ച നിലയിൽ കണ്ടത്. തുടർന്ന് വൈദ്യുതി ലൈൻ ഓഫ് ചെയ്ത് മരിച്ചവരിൽ ഒരാളെ എടുത്ത് വാഴത്തോട്ടത്തിനോട് ചേർന്നുള്ള മറ്റൊരാളുടെ ഉടമസ്ഥതയിലുള്ള വയലിൽ കൊണ്ടിട്ടു. ഭാരക്കൂടുതൽ ഉണ്ടായിരുന്നതിനാൽ മോഹൻദാസിനെ ഒറ്റചക്രമുള്ള ഇരുമ്പ് കൈവണ്ടിയിൽ കയറ്റി വയലിൽ മറ്റൊരിടത്തും കൊണ്ടിടുകയായിരുന്നു എന്നാണ് ജില്ലാ പോലീസ് മേധാവി ആർ വിശ്വനാഥ് പറയുന്നത്.

പോലീസുകാർ രാത്രി മീൻ പിടിക്കാനിറങ്ങിയെന്നാണ് എസ്പി വിശദീകരിക്കുന്നത്. ക്യാമ്പിന്റെ ചുറ്റുമതിലിൽ നിന്നും സുരേഷിന്റെ പറമ്പിലേക്ക് ചാടിയിറങ്ങുമ്പോഴാണ് അപകടമുണ്ടായതെന്നും പോലീസ് പറയുന്നു. ഹേമാംബിക നഗർ ഇൻസ്‌പെക്ടർ എ സി വിപിന്റെ നേതൃത്വത്തിലുള്ള പ്രത്യേക സംഘമാണ് കേസ് അന്വേഷിക്കുന്നത്. സുരേഷിനെതിരെ ഇന്ത്യൻ ശിക്ഷാനിയമം 304 വകുപ്പുപ്രകാരമാണ് കേസെടുത്തിട്ടുള്ളത്. പ്രതിയെ സംഭവസ്ഥലത്തെത്തിച്ച് തെളിവെടുക്കുമെന്ന് പോലീസ് അറിയിച്ചു.