പാലക്കാട്(Palakkad): ഭാര്യയെ കഴുത്തറുത്ത് കൊലപ്പെടുത്തിയ സംഭവത്തില് ഭര്ത്താവ് അറസ്റ്റില്. മുതലമട ചെമ്മണാംപതി വടക്കേ കോളനിയില് ജാന്ബീവിയെ (40) യാണ് കഴിഞ്ഞ ശനിയാഴ്ച രാവിലെ പെരുവെമ്പ് മന്ദത്തുകാവ് റോഡില് ചോറക്കോടിനു സമീപം കഴുത്തറുത്ത് കൊന്ന നിലയില് കണ്ടെത്തിയത്. സംഭവത്തില് ഇവരുടെ ഭര്ത്താവ് പല്ലശന അണ്ണാക്കോട് സ്വദേശി അയ്യപ്പന് എന്ന ബഷീര് (46) ആണ് പിടിയിലായത്. മറ്റൊരു യുവാവുമായി ഭാര്യയ്ക്ക് ബന്ധമുണ്ടെന്ന സംശയത്തെ തുടര്ന്നാണ് കൊലപാതകം നടത്തിയതെന്ന് പിടിയിലായ ബഷീര് മൊഴി നല്കി.
കൊലപാതകത്തിന് തലേ ദിവസം തന്നെ ഇവര് റോഡില് വച്ച് പ്രശ്നങ്ങളുണ്ടായിരുന്നു. ജാന്ബീവിയ്ക്ക് മറ്റൊരാളുമായി ബന്ധമുണ്ടെന്ന് ആരോപിച്ച് ബഷീര് പലതവണ പ്രശ്നമുണ്ടാക്കി. മദ്യത്തിന്റെ ലഹരിയില് ഈ തര്ക്കം കൊലപാതകത്തിലേക്ക് എത്തിയെന്നാണ് പ്രതിയുടെ മൊഴി. സംഭവശേഷം ഒളിവില് പോയ പ്രതിയെ തമിഴ്നാട് അതിര്ത്തിയില് നിന്നാണ് പിടികൂടിയതെന്ന് ജില്ലാ പോലീസ് മേധാവി ആര്. വിശ്വനാഥ് പറഞ്ഞു.
ജാന്ബീവിയുടെ കഴുത്ത് അറുത്തുമാറ്റിയ നിലയിലായിരുന്നു. കൊലപാതകത്തിനായി ഇയാള് ഉപയോഗിച്ചിരുന്ന വെട്ടുകത്തി സംഭവ സ്ഥലത്ത് നിന്ന് പോലീസ് കണ്ടെടുത്തു. കൃത്യത്തിന് മുമ്പ് കഴിച്ച മദ്യകുപ്പിയും കണ്ടെത്തി. സംഭവ ശേഷം തമിഴ്നാട്ടിലേക്ക് കടന്ന പ്രതിയ്ക്കായി രണ്ട് ദിവസമായി വ്യാപക തിരച്ചിലാണ് പോലീസ് നടത്തിയത്. പുതുനഗരം ഇന്സ്പെക്ടര് ആദംഖാന്റെ നേതൃത്വംത്തിലുള്ള സംഘമാണ് കേസ് അന്വേഷിച്ചത്.
Topic: Janbeevi, Basheer, Palakkad