ഒറ്റപ്പാലം: ഒറ്റപ്പാലത്തിനടുത്ത് വരോട് ചാത്തൻ കണ്ടാർകാവ് ഉത്സവത്തിനിടയിൽ വിവിധ രാഷ്ട്രീയ പാർട്ടികളുടെ നിറങ്ങളുള്ള കൊടികളുമായി കാവിലെത്തിയ കമ്മറ്റികൾക്കെതിരെ പോലീസ് കേസെടുത്തു. ആറു കമ്മറ്റികളിൽനിന്നായി 60 പേർക്കെതിരെയാണ് വിവിധ വകുപ്പുകൾ ചുമത്തി ഒറ്റപ്പാലം പോലീസ് കേസെടുത്തത്. ഉത്സവത്തിനു രാഷ്ട്രീയ പാർട്ടികളുടെ കൊടിതോരണങ്ങൾ ഉപയോഗിക്കുന്നതിനു വിലക്ക് ഏർപ്പെടുത്തിയിരുന്നു. ഇത് ലംഘിച്ചതിനാണ് നടപടി.
ഉത്സവത്തിന് മുന്നോടിയായി ഒറ്റപ്പാലം പോലീസിൻ്റെ നേതൃത്വത്തിൽ ജനപ്രതിനിധികളെയും വിവിധ ആഘോഷ കമ്മിറ്റി ഭാരവാഹികളെയും പങ്കെടുപ്പിച്ചു സർവ്വകക്ഷിയോഗം നടത്തിയിരുന്നു. കൂടുതൽ ബഹളം സൃഷ്ടിക്കുന്ന ഡിജെ, നാസിക് ഡോൾ, രാഷ്ട്രീയ പാർട്ടികളുടെ കൊടിതോരണങ്ങൾ, നിറങ്ങൾ ഏന്തി പൂരപ്പറമ്പിലേക്ക് വരുന്നത് എന്നിവ നിരോധിക്കുന്നതായി യോഗം തീരുമാനമെടുത്തിരുന്നു. ഉത്തരവ് ലംഘിച്ചവർക്കെതിരെയാണ് പോലീസ് കേസെടുത്തത്.
പാലക്കാട് ജില്ലയിലെ മുഴുവൻ വാര്ത്തകളും ഒറ്റ ക്ലിക്കിൽ ഇവിടെ വായിക്കാം
ഒരു വർഷം തടവും 5000 രൂപ പിഴയും അടങ്ങുന്ന കുറ്റമാണ് കമ്മറ്റിക്കാർക്കെതിരെ ചുമത്തിയത്. ഒറ്റപ്പാലം പരിധിയിൽ ഇനി നടക്കാനിരിക്കുന്ന പൂരങ്ങളിലും രാഷ്ട്രീയപാർട്ടികളുടെ നിറങ്ങളോടുകൂടിയ കൊടിയുമായി പൂരപ്പറമ്പിൽ എത്തുന്നവർക്കെതിരെ കർശന നിയമനടപടി സ്വീകരിക്കുമെന്ന് ഒറ്റപ്പാലം പോലീസ് അറിയിച്ചു.
Read Latest Local News and Malayalam News