കഞ്ചിക്കോട്ടെ ആക്രിക്കച്ചവടക്കാരൻ്റെ മരണം കൊലപാതകം; വാരിയെല്ലുകള്‍ തകര്‍ന്ന നിലയിൽ, ആന്തരാവയവങ്ങള്‍ക്ക് ക്ഷതം! പോസ്റ്റുമോര്‍ട്ടം റിപ്പോര്‍ട്ട് പുറത്ത്

പാലക്കാട്: കഞ്ചിക്കോട് വ്യവസായ മേഖലയില്‍ പൂട്ടിക്കിടന്ന കമ്പനി പരിസരത്ത് ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തിയ തമിഴ്‌നാട് സ്വദേശിയുടെ മരണം കൊലപാതകമെന്ന് സ്ഥിരീകരിച്ചു. പോസ്റ്റുമോര്‍ട്ടം റിപ്പോര്‍ട്ടിലെ സൂചനകളാണ് സംഭവം കൊലപാതകമാണെന്ന് വ്യക്തമാക്കുന്നത്. കോയമ്പത്തൂര്‍ സ്വദേശിയായ മൂര്‍ത്തി(55) എന്ന് വിളിക്കുന്നയാളെയാണ് കഴിഞ്ഞ 24നു രാവിലെ പൂട്ടിക്കിടക്കുന്ന ഹോളോബ്രിക്‌സ് നിര്‍മാണ കമ്പനി പരിസരത്ത് മരിച്ചയില്‍ കണ്ടെത്തിയത്.

Also Read: ഒരു കാലി ചായ കുടിക്കണമെങ്കിൽ 10 രൂപ, ഇവിടെ 6 രൂപയ്ക്ക് 150 മില്ലി ബ്രൂ കോഫി!! പക്ഷേ നമുക്ക് കിട്ടില്ല..!

മൃതദേഹത്തിൻ്റെ ശരീരത്തിന് പുറത്ത് കാര്യമായ മുറിവുകളോ ചതവുകളോ കണ്ടെത്തിയിരുന്നില്ലെങ്കിലും വാരിയെല്ലുകള്‍ തകര്‍ന്നതായും, ആന്തരാവയവങ്ങള്‍ക്ക് ക്ഷതമേറ്റിരുന്നതായും പോസ്റ്റുമോര്‍ട്ടം റിപ്പോര്‍ട്ടില്‍ തെളിഞ്ഞു. ഇരുമ്പ് വടിയോ ഇഷ്ടികയോ കൊണ്ടുള്ള ആക്രമണമാകാം ഇതിന് കാരണമെന്നാണ് പോലീസിൻ്റെ പ്രാഥമിക നിഗമനം. ആക്രിക്കച്ചവടക്കാരനായ ഇയാള്‍ കഴിഞ്ഞ അഞ്ച് വര്‍ഷത്തോളമായി പൂട്ടിയിട്ട ഈ കമ്പനി പരിസരത്താണ് താമസിക്കുന്നത്. ഇയാളെകുറിച്ചോ ബന്ധുക്കളെകുറിച്ചോ കാര്യമായ വിവരങ്ങളൊന്നും പോലീസിനും ലഭിച്ചിട്ടില്ല. രാത്രികാലങ്ങളില്‍ ഇയാള്‍ക്കൊപ്പം മദ്യപിക്കാന്‍ പലരും ഇവിടെ വരാറുണ്ടെന്നും അവര്‍ തമ്മില്‍ ബഹളമുണ്ടാവാറുണ്ടെന്നും നാട്ടുകാര്‍ മൊഴി നല്‍കിയിട്ടുണ്ട്.

Also Read: സീപ്ലെയിന്‍, സ്‌കൈ സൈക്കിള്‍, സ്‌കൈ സര്‍ഫിങ്... സാഹസിക സവാരി പേരിന് മാത്രമോ? പോത്തുണ്ടി ഡാമിലെത്തുന്ന സഞ്ചാരികൾക്ക് നിരാശ

ഇത്തരത്തില്‍ ഇവിടെ വന്നുപോകാറുള്ളവരെ കേന്ദ്രീകരിച്ചാണ് നിലവില്‍ അന്വേഷണം നടക്കുന്നത്. മരണം നടന്ന പ്രദേശത്ത് പിടിവലി നടന്നതിൻ്റെ ലക്ഷണങ്ങളും പോലീസ് കണ്ടെത്തിയിരുന്നു. മദ്യപിച്ചിരിക്കുന്നതിനിടെ ഉണ്ടായ തര്‍ക്കമാകാം മരണത്തില്‍ കലാശിച്ചതെന്ന് പോലീസ് കരുതുന്നു. ഇയാളുടെ ബന്ധുക്കളെ ബന്ധപ്പെടാനും പോലീസ് ശ്രമിക്കുന്നുണ്ട്. പ്രദേശത്തെ സിസിടിവി ദൃശ്യങ്ങള്‍ ഉള്‍പ്പെടെ പരിശോധിക്കുകയാണെന്ന് കേസ് അന്വേഷിക്കുന്ന വാളയാര്‍ ഇന്‍സ്‌പെക്ടര്‍ കെ സി വിനു അറിയിച്ചു.



പാലക്കാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ


പാലക്കാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ