നടപടിയുമായി പഞ്ചായത്ത്
1968 മുതല് പ്രവര്ത്തിച്ചുവരുന്ന സൊസൈറ്റിയുടെ കീഴില് റെയില്വേ ജീവനക്കാര്ക്കും വിരമിച്ചവര്ക്കും വേണ്ടിയാണ് റെയില്വേ കോളനിയില് 1986ല് ഇന്ത്യന്ഗ്യാസ് ഏജന്സി ആരംഭിച്ചത്. സൊസൈറ്റിക്ക് കീഴില് 3200 ഉപഭോക്താക്കളുണ്ട്. ഇക്കഴിഞ്ഞ ഒന്നിന് റെയില്വേയുടെ ഉടമസ്ഥതയില് പ്രവര്ത്തിക്കുന്ന ഗ്യാസ് ഗോഡൗണിന് പഞ്ചായത്ത് ലൈസന്സ് ഇല്ലെന്നുകാണിച്ച് പഞ്ചായത്ത് സെക്രട്ടറി സ്റ്റോപ്പ് മെമ്മോ നല്കിയിരുന്നു.
പാചക വാതക വിതരണം അവശ്യസര്വീസായതിനാല് വിതരണത്തിന് ആദ്യം തടസം സൃഷ്ടിച്ചിരുന്നില്ല. ഇതിനകം പഞ്ചായത്ത് ലൈസന്സിനും ഫയര് എന്ഒസിക്കുമായി സൊസൈറ്റി നടപടികളാരംഭിക്കുകയും ചെയ്തു. ഫയര് എന്ഒസി ലഭിക്കുന്നതിനായി 16,540 രൂപ ഫീസും ഒടുക്കി.
35 വര്ഷമായി പ്രവര്ത്തിക്കുന്ന ഗോഡൗണ്
ഫയര് എന്ഒസി ലഭിക്കുന്ന മുറയ്ക്ക് ലൈസന്സ് അനുവദിച്ചു നല്കണമെന്ന് പഞ്ചായത്തിനും അപേക്ഷ നല്കി. എന്നാല് സ്റ്റോപ്പ് മെമ്മോ നിലനില്ക്കെ സ്ഥാപനം എട്ടാംതിയതി തുറന്ന് പ്രവര്ത്തിച്ചതായും അതിനാല് സ്ഥാപനം അടച്ചുപൂട്ടണമെന്നും ആവശ്യപ്പെട്ട് ഒരു പഞ്ചായത്തംഗം പരാതിപ്പെട്ടു. ഇതേതുടര്ന്ന് യാതൊരു കാരണവശാലും സ്ഥാപനം പ്രവര്ത്തിപ്പിക്കരുതെന്ന് കാണിച്ച് പഞ്ചായത്ത് വീണ്ടും സൊസൈറ്റിക്ക് നോട്ടീസ് നല്കിയിരിക്കയാണ്. ഇതിനെ തുടര്ന്ന് പാചക വാതക വിതരണം നിര്ത്തിവെച്ച് ഗോഡൗണ് അടച്ചുപൂട്ടി. 35 വര്ഷമായി യാതൊരു പ്രശ്നവുമില്ലാതെ പ്രവര്ത്തിച്ചുവരുന്ന സ്ഥാപനം അടച്ചുപൂട്ടിയതോടെ 3200 ഉപഭോക്താക്കളാണ് വെട്ടിലായത്. മറ്റ് ഏജന്സികളില് നിന്നും ഇവര്ക്ക് പാചക വാതകം ലഭിക്കില്ല. നിലവിലെ സാഹചര്യത്തില് പാചക വാതകമില്ലാതെ പ്രയാസത്തിലാണെന്ന് സുരഭി സമയം മലയാളത്തോട് പ്രതികരിച്ചു.
അടച്ചിടല് നീണ്ടേക്കും?
പാചകവാതകത്തിനായി മുന്നൂറിലധികം ബുക്കിങ് ഇതിനകം വന്നുകഴിഞ്ഞതായി സൊസൈറ്റി നടത്തിപ്പുകാര് പറയുന്നു. ദിവസേന സിലിണ്ടര് ബുക്കിങ് കൂടി വരികയാണ്. പാചക വാതകം ലഭിക്കാതെ വന്നതോടെ പലരും സൊസൈറ്റിയില് അന്വേഷിച്ചെത്തുന്നുണ്ട്. അടച്ചിടല് എത്രദിവസം നീളുമെന്നതിലും വ്യക്തതയില്ല. പാചക വാതക വിതരണം അവശ്യ സര്വീസായതിനാല് യാതൊരു മുന്നൊരുക്കവുമില്ലാതെയുള്ള അടച്ചിടല് നടപടിയില് പ്രതിഷേധം ശക്തമാണ്. പാചക വാതകം കിട്ടാതായതോടെ റെയില്വേ ജീവനക്കാരായ ഉപഭോക്താക്കള് ഡിവിഷണല് റെയില്വേ മാനേജരെ നേരില്കണ്ട് പരാതി അറിയിച്ചു.
ജില്ലാ കളക്ടര്ക്ക് പരാതി
ഗ്യാസ് വിതരണം തടസപ്പെടുത്തരുതെന്ന് ആവശ്യപ്പെട്ട് ഉപഭോക്താക്കള് ജില്ലാ കലക്ടര്ക്കും പരാതി നല്കി. നേരത്തെ ഈ സൊസൈറ്റിയുടെ സെക്രട്ടറിയായിരുന്നയാളെ സാമ്പത്തിക ക്രമക്കേട് കണ്ടെത്തി പുറത്താക്കിയിരുന്നു. ഇയാളുമായി അടുത്തബന്ധമുള്ളവരാണ് ഇപ്പോള് സ്ഥാപനത്തിനെതിരെ രംഗത്തുള്ളതെന്ന് ആക്ഷേപമുണ്ട്. അതിനിടെ പഞ്ചായത്ത് അംഗത്തിന്റെ ധിക്കാരപരമായ ആവശ്യമാണ് സ്ഥാപനം അടച്ചിടാന് ഇടയാക്കിയതെന്ന ആരോപിച്ച് കോണ്ഗ്രസ് മണ്ഡലം കമ്മിറ്റി അകത്തേത്തറ ഗ്രാമപഞ്ചായത്ത് ഓഫീസിന് മുന്നില് പ്രതിഷേധ ധര്ണ നടത്തി. ജില്ലാ ജനറല് സെക്രട്ടറി സി. ബാലന് ഉദ്ഘാടനം ചെയ്തു.