ആശ്വസിക്കാം! പാലക്കാട് രണ്ട് പേർ കൂടി കൊവിഡ് മുക്തരായി; ചികിത്സയിൽ ഇനി രണ്ട് പേർ മാത്രം!!

കാവിൽപ്പാട്, ഈസ്റ്റ് ഒറ്റപ്പാലം, സ്വദേശികളാണ് ആശുപത്രി വിട്ടത്. മാർച്ച് 27 ന് രോഗം സ്ഥിരീകരിച്ച ഈസ്റ്റ് ഒറ്റപ്പാലം സ്വദേശിയും ഏപ്രിൽ നാലിന് രോഗം സ്ഥിരീകരിച്ച കാവിൽപ്പാട് സ്വദേശിയുടെയും പരിശോധനാഫലം നെഗറ്റീവ് ആയിരുന്നു. ഈസ്റ്റ് ഒറ്റപ്പാലം, കാവിപ്പാട് സ്വദേശികളുടെ രണ്ടാമത്തെ പരിശോധനാ ഫലവും നെഗറ്റീവ് ആയതിനെ തുടർന്നാണ് ഇവരെ ആശുപത്രിയിൽ നിന്നും ഡിസ്ചാർജ് ചെയ്യുന്നതെന്ന് ആരോഗ്യ വകുപ്പ് അധികൃതർ അറിയിച്ചു. ഇവരുടെ രണ്ടുപേരുടെയും പ്രാഥമിക സമ്പർക്ക പട്ടികയിൽ ഉണ്ടായിരുന്ന ആർക്കും രോഗബാധയില്ലെന്നും സ്ഥിരീകരിച്ചിട്ടുണ്ട്.

ഇന്ന് രണ്ട് പേർ കൊവിഡ് ഭേദമായി ആശുപത്രി വിട്ടതോടെ ജില്ലയിൽ രോഗം ബാധിച്ച് ചികിത്സയിൽ കഴിയുന്നവരുടെ എണ്ണം രണ്ടായി. ഇന്നലത്തെ കണക്കുകൾ പ്രകാരം, ജില്ലയിൽ 14,216 പേരാണ് നിരീക്ഷണത്തിലുള്ളത്. ഇതിൽ 14180 പേർ വീടുകളിലും 27 പേർ പാലക്കാട് ജില്ലാ ആശുപത്രിയിലും 5 പേർ ഒറ്റപ്പാലം താലൂക്ക് ആശുപത്രിയിലും 4 പേർ മണ്ണാർക്കാട് താലൂക്ക് ആശുപത്രിയിലുമാണ് നിരീക്ഷണത്തിലുള്ളത്. ഇവരുടെ ആരോഗ്യ നിലയിൽ ആശങ്കപ്പെടേണ്ട സാഹചര്യമില്ലെന്ന് ഡിഎംഒ അറിയിച്ചിരുന്നു.

തിങ്കളാഴ്ച പാലക്കാട് ജില്ലയിൽ ഒരാൾക്ക് കൂടി കൊവിഡ്-19 രോഗബാധ സ്ഥിരീകരിച്ചിരുന്നു. മാർച്ച് 22 ന് ഖത്തറിൽ നിന്നെത്തിയ പട്ടാമ്പി താലൂക്കിലെ മുപ്പത്തിരണ്ടുകാരനായ ചാത്തന്നൂർ സ്വദേശിക്കാണ് കൊവിഡ്-19 ബാധ സ്ഥിരീകരിച്ചത്. വിദേശത്തു നിന്നെത്തി രണ്ടാം ദിവസം ശാരീരിക പ്രശ്നം അനുഭവപ്പെട്ടിട്ടും ഇയാളുടെ പരിശോധന നടത്താൻ വൈകിയത് ഗുരുതര വീഴ്ചയാണെന്ന ആരോപണം ഉയരുന്നുണ്ട്. ഇദ്ദേഹത്തിൻ്റെ റൂട്ട് മാപ്പ് ജില്ലാ ഭരണകൂടം പുറത്തുവിട്ടിട്ടുണ്ട്. അതേസമയം ജില്ലയിൽ ഇതുവരെ എട്ടു പേർക്കാണ് രോഗം സ്ഥിരീകരിച്ചത്. അതിൽ ആറു പേരും രോഗ മുക്തരായി.