കുമ്പനാട് ഫെലോഷിപ്പ് മിഷന്‍ ആശുപത്രിയുടെ ദുരവസ്ഥക്ക് മാറ്റമുണ്ടാകണം; ആവശ്യവുമായി 'സേവ് ഫെലോഷിപ്പ്'

കുമ്പനാട്: മാർത്തോമ്മാ സഭയുടെ മേൽനോട്ടത്തിലുള്ള മധ്യതിരുവിതാംകൂറിലെ പ്രമുഖ ആശുപത്രിയായ കുമ്പനാട് ഫെലോഷിപ്പ് മിഷന്‍ ആശുപത്രി നിലനിര്‍ത്തണമെന്നാവശ്യവുമായി പ്രദേശവാസികളും വിവിധ സംഘടനകളും രംഗത്ത്. ആശുപത്രിയുടെ ദുരവസ്ഥയ്ക്ക് മാറ്റമുണ്ടാകണമെന്നാവശ്യപ്പെട്ട് ജീവനക്കാരും നാട്ടുകാരും ആശുപത്രി സംരക്ഷണ സമിതിയും നിരവധി നിവേദനങ്ങള്‍ നൽകിയിട്ടും സഭാ അധികൃതർ യാതൊരു നടപടിയും അധികൃതർ സ്വീകരിക്കാന്‍ തയാറായിട്ടില്ല.

Also Read: കൊവിഡ് ബാധിതയെ ഫോണിലൂടെ അസഭ്യം പറഞ്ഞെന്ന് പരാതി; യുവാവിനെതിരെ നടപടിയില്ലെന്ന് ആരോപണം

ആശുപത്രി പുതുക്കി പണിയുന്നതിന് 5 ഏക്കറോളം സ്ഥലമാണ് പത്മഭൂഷണ്‍ ഡോ.ഫിലിപ്പോസ് മാര്‍ ക്രിസോസ്റ്റം വലിയ മെത്രാപ്പോലീത്തയും അദ്ദേഹത്തിന്റെ സഹോദരന്‍ ഡോ.ജേക്കബ് ഉമ്മനും തങ്ങള്‍ക്ക് കുടുംബ സ്വത്തായി ലഭിച്ച സ്ഥലം വിട്ടു നല്കിയത്. കൊവിഡ് കാലത്ത് എല്ലാ മേഖലയിലും മാന്ദ്യം അനുഭവപ്പെട്ടത്തിനെ തുടര്‍ന്ന് ആശുപത്രിയുടെ പ്രവര്‍ത്തനവും അവതാളത്തിലായി. ഡോ.ഫിലിപ്പോസ് മാര്‍ ക്രിസോസ്റ്റം വലിയ മെത്രാപ്പോലീത്ത ഇപ്പോള്‍ ചികിത്സയിലുള്ളതും ഫെലോഷിപ്പ് ആശുപത്രിയിലാണ്. ആശുപത്രി സംരക്ഷണത്തിനായി കൊവിഡ് മാനദണ്ഡം പാലിച്ച് സേവ് ഫെലോഷിപ്പ് എന്ന പേരില്‍ ആശുപത്രിയില്‍ സംരക്ഷണത്തിന് നാട്ടുകാരുടെ നേതൃത്വത്തില്‍ ആക്ഷന്‍ കൗണ്‍സില്‍ രൂപീകരിച്ചു.

Also Read: സംവരണവാർഡുകൾ തെരഞ്ഞെടുക്കാനുള്ള നറുക്കെടുപ്പ് നാളെ മുതൽ; തദ്ദേശ തെരഞ്ഞെടുപ്പിന് ഒരുങ്ങാൻ പത്തനംതിട്ട

കോയിപ്രം, ഇരവിപേരൂര്‍, പുറമറ്റം, തോട്ടപുഴശേരി പഞ്ചായത്തുകളിലെ ആളുകളെ പങ്കെടുപ്പിച്ച് കൊവിഡ് മാനദണ്ഡം പാലിച്ച് കുമ്പനാട് വൈഎംസിഎയില്‍ സമരകണ്‍വന്‍ഷനും നടത്തി. ഇതിന്റെ തുടര്‍ച്ചയായി സേവ് ഫെലോഷിപ്പെന്ന കാമ്പെയ്ന്‍ നാലു പഞ്ചായത്തുകളിലെ 2500ലധികം ആളുകളെ പങ്കെടുപ്പിച്ച് ഭീമ ഹര്‍ജിയും തയാറാക്കി. തോമസ് വി. ജോണ്‍ അധ്യക്ഷത വഹിച്ചു. ബിജു വര്‍ക്കി, സുബിന്‍ നീറുംപ്ലാക്കല്‍, ജോസഫ് നെല്ലാനിക്കല്‍, അനീഷ് കുന്നപ്പുഴ, പ്രവീണ്‍ പി ജേക്കബ്, സിസില്‍ ജോര്‍ജ് വര്‍ഗീസ്, തോമസ് ജേക്കബ്, രഞ്ജിത്ത് പി. ചാക്കോ എന്നിവര്‍ പ്രസംഗിച്ചു .