ശ്രദ്ധേയമായി 'മൈക്കൽ ഹെൻറി: സഫയർ സ്വോർഡ്'
കാലിഫോർണിയൻ ബാലൻ്റെ കഥ
'മൈക്കൽ ഹെൻറി: സഫയർ സ്വോർഡ്' എന്ന ഈ പുസ്തകം പറയുന്നത്, ഒരു കാലിഫോർണിയൻ ബാലനായ മൈക്കലിൻ്റെ സാഹസിക യാത്രയാണ്. കുഞ്ഞുന്നാളിൽ തന്നെ മാതാപിതാക്കൾ നഷ്ടപ്പെട്ട മൈക്കൽ, മുത്തശിക്കൊപ്പം കാലിഫോർണിയയിൽ താമസിക്കുന്ന ഒരു സാധാരണക്കാരനായ കുട്ടിയാണ്. ഒരു രാത്രിയിൽ മുത്തശി പറഞ്ഞ കഥയിലൂടെ അവൻ ഒരു ബഹിരാകാശ യാത്രികനാകാൻ ആഗ്രഹിച്ചു. ഇതിനിടയിൽ തൻ്റെ അച്ഛൻ മറ്റൊരു ഗ്രഹത്തിൽ നിന്നുള്ള ആളാണെന്നും കുറച്ചു പേർ ചേർന്ന് അവൻ്റെ അച്ഛനെ അവിടെ തടവിലാക്കിയിരിക്കുകയാണെന്നും അവൻ അറിഞ്ഞു. ഇക്കാര്യം മനസിലാക്കിയ മൈക്കൽ ആ ഗ്രഹത്തിലേക്ക് പോയി അച്ഛനെ തിന്മയുടെ ഇരുട്ടിൽ നിന്നും മോചിപ്പിക്കാൻ പദ്ധതിയിടുന്നു. തുടർന്ന് അവൻ്റെ സുഹൃത്തുക്കളോടൊപ്പം മനുഷ്യത്വത്തെ രക്ഷിക്കാൻ മറ്റൊരു പ്രപഞ്ചത്തിലേക്കുള്ള യാത്ര നടത്തുന്നതും തുടർന്നുള്ള സംഭവ വികാസങ്ങളും ചേർന്ന സാഹസിക കഥയാണ് ഈ പുസ്തകം പറയുന്നത്.'തിന്മയുടെ അന്ധകാരം പ്രപഞ്ചത്തിലൂടെയും എല്ലാ വിള്ളലുകളിലൂടെയും ഓരോ ആത്മാവിലൂടെയും ഒഴുകുന്നു'. ആ തിന്മയ്ക്കെതിരായ നന്മയുടെ വിജയത്തെക്കുറിച്ചാണ് പുസ്തകം അടിവരയിടുന്നത്.
2019 മുതൽ പുസ്തകത്തിൻ്റെ പണിപ്പുരയിൽ
2019 ജൂലൈയിലാണ് ഇവർ മൈക്കിലിൻ്റെ കഥ എഴുതാൻ തുടങ്ങിയത്. പുസ്തകം പൂർത്തിയാക്കാൻ ഏകദേശം ആറു മാസമെടുത്തു. ഒടുവിൽ 2020 മാർച്ചോടെ പുസ്തകം പൂർത്തിയായി. തുടർന്ന് എഡിറ്റിംങ് നടത്തിയതിനു ശേഷം സ്ക്രിപ്റ്റ് കമ്പ്യൂട്ടറിൽ ടൈപ്പ് ചെയ്തു. ഇതിനിടയിൽ ഉർവ്വശി ശാപം ഉപകാരമെന്ന പോലെ ഡെസ്ക്ടോപ്പിലേക്ക് കഥ കോപ്പി ചെയ്യുമ്പോൾ അബദ്ധവശാൽ കുറച്ച് പേജുകൾ കാണാതാവുകയും ചെയ്തു. എന്നാൽ അതോടെ ഇവരുടെ കഥ അൽപം പരിഷ്ക്കരിക്കാനും കുറച്ച് മാറ്റങ്ങൾ വരുത്താനും സാധിച്ചു. ഇതിനൊക്കെ പിന്തുണയുമായി മാതാപിതാക്കളും അധ്യാപകരും സുഹൃത്തുക്കളും കൂടെ നിന്നതോടെ ജോലി എളുപ്പമായി.
ആമസോൺ കിൻഡലിൽ പുസ്തകം ലഭ്യം
എഴുത്തുകാരനായ മാത്യു റയ്ലിയുടെ ആരാധകരാണ് ഇവർ മൂവരും. അദ്ദേഹത്തിൻ്റെ രചനകളാണ് ഇവർക്ക് പ്രചോദനമായത്. ഡാന് ഒരു റോബോട്ടിക്സ് എഞ്ചിനീയറാകാനാം ഡെറിക്കിന് ആർമി ഓഫീസറാകാനും ശ്രീരാമിന് സിഎക്കാരനാകാനുമാണ് ആഗ്രഹം. അതിനൊപ്പം എഴുത്തും കൊണ്ടു പോകാനാണ് ഇവരുടെ തീരുമാനം. മൈക്കൽ എൻട്രിയുടെ സാഹസ പ്രവർത്തനങ്ങൾ നിറഞ്ഞ ഈ പുസ്തകം ഇപ്പോൾ ആമസോൺ കിൻഡലിലും ഗൂഗിൾ പ്ലേ ബുക്കുകളിലും ലഭ്യമാണ്. അതോടൊപ്പം ഇരുന്നൂറോളം രാജ്യങ്ങളിലും പുസ്തകം ലഭിക്കും. മികച്ച പ്രതികരണമാണ് നോവലിനെക്കുറിച്ച് ലഭിക്കുന്നത്. പുസ്തക പ്രകാശന ചടങ്ങിൽ സെൻ്റ് തോമസ് ചർച്ച് പെണ്ണുക്കര വികാരി റവ. തോമസ് സഖറിയ വികാരി, എൻസിപി സംസ്ഥാന ജനറൽ സെക്രട്ടറി മാത്യുസ് ജോർജ്, ഡോ. നെബുലാൽ (സെൻ്റ് തോമസ് കോളേജ് കോഴഞ്ചേരി) എന്നിവർ സന്നിഹിതരായിരുന്നു.