സിപിഐ- സി പി എം തർക്കത്തിന് പരിഹാരമായില്ല; കോഴഞ്ചേരിയിൽ സിപിഐ ഒറ്റക്ക് മത്സരിക്കാൻ നീക്കം

കോഴഞ്ചേരി: തദ്ദേശ സ്വയംഭരണ തെരഞ്ഞെടുപ്പിൽ കോഴഞ്ചേരി പഞ്ചായത്തിലെ സീറ്റുതർക്കത്തെ തുടർന്ന് സിപിഎമ്മുമായി പിണങ്ങിയ സിപിഐ ഒറ്റയ്ക്ക് മത്സരിക്കാൻ ഒരുങ്ങുന്നു . ജില്ലതലത്തിൽ വരെ നടന്ന സമവായ ചർച്ചകളും തർക്കപരിഹാര ശ്രമങ്ങളുമെല്ലാം ഫലപ്രാപ്തിയിൽ എത്താതിരുന്നതോടെയാണ് സിപിഐ കടുത്ത തീരുമാനത്തിലേക്ക് നീങ്ങിയിരിക്കുന്നത്. സീറ്റ് വിഭജനത്തിലുണ്ടായ തർക്കം പരിഹരിക്കാൻ തക്കതായ ഒരു ശ്രമങ്ങൾക്കും സിപിഎം വഴങ്ങാത്ത സാഹചര്യമാണ് സിപിഐ യെ ചൊടിപ്പിച്ചതും ഒറ്റയാൾ പോരാട്ടത്തിന് തുടക്കം കുറിക്കാൻ കാരണമായതും.

Also Read: പത്തനംതിട്ടയിൽ വിമതരുടെ ഭീഷണിയിൽ ആടിയുലഞ്ഞ് യുഡിഎഫ്; പ്രശ്ന പരിഹാരത്തിന് നേതാക്കൾ രംഗത്ത്

ജില്ലയിലെ പ്രമുഖ നേതാക്കൾ പ്രശ്ന പരിഹാരത്തിനായി ശ്രമിച്ചെങ്കിലും പ്രാദേശിക നേതാക്കൾ വഴങ്ങാതിരുന്നതാണ് ഒരേ മുന്നണിയിലെ പാർട്ടികൾ തമ്മിൽ മത്സരത്തിനു വഴിയൊരുങ്ങിയിരിക്കുന്നത് . മുന്നണിയിലെ രണ്ടാം കക്ഷിയായ തങ്ങൾക്ക് വിജയസാധ്യത കുറഞ്ഞ സീറ്റുകൾ നൽകിയതും നാല് സീറ്റെന്ന ആവശ്യം സിപിഎം നേതൃത്വം നിരാകരിച്ചതുമാണ് സിപിഐയെ ഏറ്റവും കൂടുതൽ ചൊടിപ്പിച്ചത്. ആകെ 13 വാർഡുള്ള പഞ്ചായത്തിൽ സിപിഎം -അഞ്ച്, സിപിഐ -മൂന്ന്, കേരള കോൺഗ്രസ് -രണ്ട്, എൻസിപി, സിപിഐ (എംഎൽ റെഡ് ഫ്ലാഗ്), ജനതാദൾ തുടങ്ങിയ പാർട്ടികൾക്ക് ഓരോ സീറ്റുകളുമാണ് നിശ്ചയിച്ചിരുന്നത്.

Also Read: പാദങ്ങൾ കഴുകാൻ ഒഴുകുന്ന വെള്ളം... വലിയ നടപ്പന്തലിൽ സാനിറ്റൈസര്‍ നിറച്ച ചവിട്ടി, സാമൂഹിക അകലം പാലിക്കാൻ മാർക്കിംഗ്; കൊവിഡ് ജാഗ്രതയിൽ ശബരിമല, ക്രമീകരണങ്ങൾ ഇങ്ങനെ

സീറ്റ് വിഭജനത്തിൽ തൃപ്തരാകാത്ത സിപിഐ ഒരു സീറ്റുകൂടി ആവശ്യപ്പെട്ടതാണ് തർക്കങ്ങൾക്ക് കാരണമായതെന്നാണ് സിപിഎം നൽകുന്ന വിശദീകരണം. സംസ്ഥാന കമ്മിറ്റിയുടെ അനുമതി വാങ്ങിയാണ് തങ്ങൾ ഒറ്റക്ക് മത്സരിക്കുന്നതെന്ന് സിപിഐ നേതാക്കൾ പറയുന്നുണ്ടെങ്കിലും എൽഡിഎഫ് നേതൃത്വത്തിനു പരാതി നൽകാനാണ് മറ്റ് ഘടക കക്ഷികളുടെ നീക്കം.