പത്തനംതിട്ട: കൊവിഡ് രോഗവ്യാപനത്തോടെ പ്രതിസന്ധിയിലായ ടൂറിസം മേഖലയെ പുനരുജ്ജീവിപ്പിക്കുന്നതിന്റെ ഭാഗമായി കൊവിഡാനന്തര ടൂറിസം എന്ന രീതിയില് ഗ്രാമീണ ടൂറിസം പദ്ധതിയുമായി ജില്ലാ ടൂറിസം പ്രമോഷന് കൗണ്സില്.ഒരു തദ്ദേശ സ്വയംഭരണ പ്രദേശത്തോ, നിശ്ചിത മേഖലയിലേയോ ആളുകളുടെ വിനോദ ആവശ്യങ്ങള് പരിഗണിച്ച് അതേസ്ഥലത്ത് തന്നെ തദ്ദേശീയ ടൂറിസം കേന്ദ്രം വികസിപ്പിക്കുക എന്നതാണ് ഗ്രാമീണ ടൂറിസം കൊണ്ട് അര്ത്ഥമാക്കുന്നത്.
Also Read: ക്രിസോസ്റ്റം തിരുമേനിക്ക് ക്രൂര പീഡനം; ആരോപണം പിന്വലിച്ച് മുന് ഡ്രൈവര്, മാപ്പപേക്ഷ കത്ത് !
കൊവിഡ് സാഹചര്യത്തില് വരുന്ന രണ്ട് വര്ഷക്കാലത്തേക്ക് വിനോദ സഞ്ചാര സാധ്യതകള് പരിമിതമാണെന്നിരിക്കെ ആഭ്യന്തര ടൂറിസത്തിന്റെ സാധ്യതകള് പ്രോത്സാഹിപ്പിക്കേണ്ടതുണ്ട്. അത് തന്നെയാണ് ജില്ലയ്ക്കുള്ളില് നില്ക്കുന്ന ഈ പദ്ധതിയുടെ പ്രസക്തിയും. നഗരവത്കരണം അധികം കടന്നുചെന്നിട്ടില്ലാത്ത പത്തനംതിട്ട ജില്ലയിൽ ഗ്രാമങ്ങളും വന മേഖലകളും ജലാശയങ്ങളുമാണ് ഇതിലൂടെ പ്രധാനമായും ലക്ഷ്യം വയ്ക്കുന്നത്. ഇത്തരത്തില് ഒരു പ്രദേശത്തെ ജനങ്ങള്ക്ക് ആസ്വദിക്കാവുന്ന കേന്ദ്രങ്ങള് കണ്ടെത്തി തല്സ്ഥിതി നിലനിര്ത്തി ആവശ്യമായ പ്രാഥമിക സൗകര്യങ്ങള് ഒരുക്കി നല്കുക മാത്രമാണ് ചെയ്യേണ്ടത്.
Also Read: ഫാം ഉടമ മത്തായിയുടെ മരണം; രണ്ട് വനം വകുപ്പ് ഉദ്യോഗസ്ഥർക്ക് സസ്പെൻഷൻ
ഇതിനോടനുബന്ധിച്ച് ചെറിയ ഭക്ഷണ കേന്ദ്രങ്ങളും ചെറിയ ടൂറിസം ആക്ടിവിറ്റികള് എന്നിവ ഉള്പ്പെടുത്തുന്നത് ജനപ്രീതി വര്ധിപ്പിക്കുകയും വരുമാനമാര്ഗം ഉണ്ടാകാൻ സഹായിക്കുകയും ചെയ്യും. ചെറിയ തരത്തിലുള്ള ട്രക്കിംഗ്, ആറിലൂടെയുള്ള വഞ്ചി സവാരി, രാത്രികളില് ക്യാമ്പ് ഫയര്, കൊവിഡ് 19 പ്രോട്ടോകോൾ പാലിച്ചു കൊണ്ട് ചെറിയ ഒത്തുകൂടല് തുടങ്ങിയവക്കുള്ള സൗകര്യം ഒരുക്കുന്നതോടുകൂടി ആഭ്യന്തര ടൂറിസം കേന്ദ്രങ്ങള് വികസിക്കുകയും സാധാരണ ജനങ്ങള്ക്ക് തൊഴിലവസരങ്ങള് സൃഷ്ടിക്കപ്പെടുകയും ജീവിത നിലവാരം ഉയരുകയും ചെയ്യുമെന്നാണ് അധികൃതരുടെ കണക്കുകൂട്ടൽ.