അയോഗ്യത 6 വർഷത്തേക്ക്
2015-20 വർഷം തെള്ളിയൂർ ഡിവിഷൻ പ്രതിനിധിയിരുന്ന കേരള കോൺഗ്രസ് അംഗം സൂസൻ ജോർജിനെയാണ് ആറുവർഷം തെരഞ്ഞെടുപ്പിൽ മത്സരിക്കുന്നതിൽ നിന്ന് സംസ്ഥാന തെരഞ്ഞെടുപ്പ് കമ്മീഷൻ അയോഗ്യയാക്കിയത്. കഴിഞ്ഞ ഭരണസമിതിയിൽ തുടക്കത്തിൽ യുഡിഎഫ്- ആറ്, എൽഡിഎഫ്- ആറ്, ബിജെപി- ഒന്ന് എന്നായിരുന്നു 13 അംഗ ഭരണസമിതിയിലെ കക്ഷിനില. ഇരുമുന്നണികൾക്കും സീറ്റ് തുല്യമായപ്പോൾ യുഡിഎഫിലെ നിർമല മാത്യൂസും കേരള കോൺഗ്രസിലെ അക്കാമ്മ ജോൺസണും നറുക്കെടുപ്പിലൂടെ പ്രസിഡന്റും വൈസ് പ്രസിഡന്റുമായി.
സംഭവങ്ങൾക്ക് തുടക്കം ഇങ്ങനെ
ആദ്യ രണ്ടര വർഷം ആയപ്പോഴേക്കും സൂസൻ ജോർജ് വൈസ് പ്രസിഡന്റ് സ്ഥാനത്തേക്ക് അവകാശവാദമുന്നയിച്ചു. എന്നാൽ മുന്നണിക്ക് വ്യക്തമായ ഭൂരിപക്ഷം ഇല്ലാത്തതിനാൽ വൈസ് പ്രസിഡന്റ് അക്കാമ്മ ജോൺസൺ തുടരാൻ യുഡിഎഫ് തീരുമാനിക്കുകയായിരുന്നു. എന്നാൽ ഇത് അംഗീകരിക്കാൻ സൂസൻ തയ്യാറായില്ല. എൽഡിഎഫ് കൊണ്ടുവന്ന അവിശ്വാസപ്രമേയത്തെ ഇവർ പിന്തുണച്ചു. അവിശ്വാസപ്രമേയത്തിൽ യുഡിഎഫിനെ പിന്തുണയ്ക്കണമെന്ന് നിർദേശിച്ച് കേരള കോൺഗ്രസ് ജില്ലാ പ്രസിഡന്റ് വിക്ടർ ടി തോമസ് വിപ്പ് നൽകിയെങ്കിലും ഇവർ കൈപ്പറ്റിയില്ല.
തെരഞ്ഞെടുപ്പ് കമ്മീഷന് പരാതി
വീടിന്റെ ഭിത്തിയിൽ വിപ്പ് പതിച്ചെങ്കിലും ഇത് അവഗണിച്ച് സൂസൻ ജോർജ് എൽഡിഎഫിനെ പിന്തുണച്ചു. തെരഞ്ഞെടുപ്പിൽ കൃഷ്ണ കുമാർ പ്രസിഡന്റായി. വൈസ് പ്രസിഡഡന്റ് ആയി സൂസൻ ജോർജും തെരഞ്ഞെടുക്കപ്പെട്ടു. ഇതിനെതിരെ പുറത്തായ പ്രസിഡന്റ് നിർമല മാത്യൂസ് തെരഞ്ഞെടുപ്പ് കമ്മീഷനെ സമീപിച്ചു. ഇതേ തുടർന്നാണ് ആറു വർഷം അയോഗ്യത കൽപ്പിച്ചു ഉത്തരവായത്. കാലാവധി മുഴുവൻ പൂർത്തിയാക്കി ഇപ്പോൾ ഒന്നര വർഷം കൂടി കഴിഞ്ഞപ്പോഴാണ് അയോഗ്യത വന്നത്. ഇത്തവണയും രണ്ട് യുഡിഎഫ് അംഗങ്ങൾ കോയിപ്പുറം ബ്ലോക്കിൽ കൂറുമാറുകയും ഭരണമാറ്റം സംഭവിക്കുകയും ചെയ്തിട്ടുണ്ട്.
പത്തനംതിട്ട ജില്ലയിലെ മുഴുവൻ വാ‍ര്‍ത്തകളും ഒറ്റ ക്ലിക്കിൽ ഇവിടെ വായിക്കാം