സ്റ്റേഷനിലെ നഞ്ചക്ക് അഭ്യാസം
കഴിഞ്ഞ ഏപ്രിൽ 29 ന് ജോലി കഴിഞ്ഞ് ഏനാത്ത് പോലീസ് സ്റ്റേഷനിലിരിക്കുമ്പോഴാണ് സാജൻ കൂടെയുണ്ടായിരുന്ന പോലീസ് സുഹൃത്തുക്കൾക്കു നഞ്ചക്ക് കറക്കുന്നത് കാണിച്ചു കൊടുക്കുന്നത്. ഇതിനിടയിൽ അവിടെ ഉണ്ടായിരുന്ന സാജൻ്റെ സുഹൃത്തായ ഒരു പോലീസ് ഉദ്യോഗസ്ഥൻ ദൃശ്യങ്ങൾ മൊബൈലിൽ പകർത്തി വിവിധ ഗ്രൂപ്പുകളിൽ ഷെയർ ചെയ്തു. ഇതോടെയാണ് ഈ വീഡിയോ ലക്ഷക്കണക്കിന് ആളുകളുടെ ശ്രദ്ധയാകർഷിച്ചത്.
പവർഫുൾ നഞ്ചക്ക്
കരാട്ടെയിലും കുങ്ഫുവിലും ഉപയോഗിക്കുന്ന ഒരു ആയുധമാണ് നഞ്ചക്ക്. ഒരു ചങ്ങലയുടെ രണ്ടറ്റത്തും ലോഹദണ്ഡുകൾ ഘടിപ്പിച്ച രീതിയിലാണ് ഇതിൻ്റെ ആകൃതി. വൻ പ്രഹരശേഷിയുള്ള ഈ ആയുധം ഉപയോഗിക്കാൻ നല്ല പരിശീലനം ആവശ്യമാണ്. പണ്ടു ചൈനയിൽ കറ്റ മെതിക്കാനും മറ്റും ഉപയോഗിച്ചിരുന്ന ഒരു കാർഷിക ഉപകരണം മാത്രമായിരുന്നു 'നിഞ്ചാക്ക്'. ഇതാണ് പിന്നീട് 'നഞ്ചക്ക്' എന്ന പേരിൽ ആയോധനവിദ്യയുടെ ഭാഗമായി മാറിയത്.
കരാട്ടെയിൽ ബ്ലാക്ക് ബെൽറ്റ്, 2003 ൽ പോലീസിലേക്ക്
അടൂർ ഏനാത്ത് പോലീസ് സ്റ്റേഷനിലെ റോഡ് സുരക്ഷ യൂണിറ്റ് ബീറ്റ് രണ്ട് ടീം അംഗമായ സാജൻ ഫിലിപ്പ് കൊല്ലം കുന്നത്തൂര്‍ സ്വദേശിയാണ്. 1999 ൽ കരാട്ടെയിൽ ബ്ലാക്ക് ബെൽറ്റ് നേടിയ സാജൻ കരാട്ടെ പരിശീലകനായി തുടരുമ്പോൾ 2003 ലാണ് പോലീസ് വകുപ്പിൽ ജോലിയിൽ പ്രവേശിക്കുന്നത്. 13 തവണ ഐജിയിൽ നിന്ന് ഗുഡ്സ് സർവീസ് എൻട്രി നേടിയ സാജൻ 2013 ലെ പത്തനംതിട്ട ജില്ലാ പോലീസിന്റെ ക്രിക്കറ്റ് ടീം ക്യാപ്റ്റനാകാനായിരുന്നു. പോലീസ് അസോസിയേഷൻ ജില്ലാ കമ്മിറ്റി അംഗം കൂടിയാണ് സാജൻ. അവിചാരിതമായി കടന്നുവന്ന ഭാഗ്യത്തിൽ അതീവ സന്തോഷവാനാണ് സാജൻ ഫിലിപ്പ്.