ഫ്ലക്സുകളിൽ നിന്ന് ഗ്രോബാഗുകൾ; മാതൃകയായി ഇരവിപേരൂരിലെ ഹരിത കർമ്മ സേന

തിരുവല്ല: തെരഞ്ഞെടുപ്പ് പ്രചരണത്തിന് ഉപയോഗിച്ച ബാനറുകൾ എല്ലാം ശേഖരിച്ച് പച്ചക്കറി വളർത്തുന്ന ഗ്രോബാഗാക്കി മാറ്റാനുള്ള ശ്രമത്തിലാണ് ഇരവിപേരൂർ ഗ്രാമപഞ്ചായത്തിലെ ഹരിതകർമ സേനയും കാർഷികകർമ സേനയും. പൂർണമായും ഹരിതചട്ടം പാലിച്ച് നടത്തിയ തെരഞ്ഞെടുപ്പിൽ ഫ്ലക്സ് ബോർഡുകൾ നിരോധിച്ചെങ്കിലും തുണി ബാനറായിരുന്നു അതിനു പകരമായി സ്ഥാനാർത്ഥികളും മുന്നണികളും രംഗത്തിറക്കിയത്.

Also Read: കുഴിയെടുത്തപ്പോള്‍ അസാമാന്യ വലുപ്പം; ഒട്ടേറെ പേര്‍ ചേര്‍ന്ന് വലിച്ചെടുത്തു, ഭീമന്‍ കാച്ചിലിന് തൂക്കം 100 കിലോ

എന്നാൽ തുണിയിൽ തീർത്ത ഫ്ലക്സുകൾ എന്ന പേരിൽ ഭൂരിപക്ഷം പേരും രംഗത്തിറക്കിയ ബാനറുകൾ
പോളി എതിലിൻ അടിസ്ഥാനമാക്കിയതോ പോളിസ്റ്ററോ ആയ വസ്തുക്കളായിരുന്നു എന്ന് പിന്നീടാണ് മനസ്സിലാക്കിയത്. പ്ലാസ്റ്റിക്കിൻ്റെ പകരക്കാരനായി എത്തിയ ഇത്തരം ഫ്ളക്സുകൾ ഒന്നും തന്നെ മണ്ണിൽ
അലിയുന്നവയല്ല എന്നതാണ് യാഥാർത്ഥ്യം. എന്നാൽ സാധാരണ ഫ്ലക്സിൽ നിന്ന് വ്യത്യസ്തമായി
രൂപാന്തരപ്പെടുത്തി ഗ്രോബാഗാക്കി മാറ്റാൻ ഇത്തരം ഫ്ലക്സുകൾ എളുപ്പമാണെന്നാണ് ഇരവിപേരൂരിലെ ഹരിതകർമസേനാംഗങ്ങൾ പറയുന്നത്.

ആറ് അടി നീളവും മൂന്ന് അടി വീതിയുമുള്ള ബാനർ ഉപയോഗിച്ച് നാല് ഗ്രോബാഗുകൾ വരെ
ഉണ്ടാക്കിയെടുക്കാൻ സാധിക്കും. ഹരിത കർമ്മ സേനാംഗങ്ങൾ ഇത്തരം ഫ്ലക്സുകളിൽ നിന്ന് നിർമ്മിച്ച
ഏതാനം ഗ്രോബാഗുകളുടെ മാതൃക ഹരിതകർമ സേന പ്രസിഡൻറ് ഫിലോമിന ഷാജി ഇരവിപേരൂർ
ഗ്രാമപഞ്ചായത്ത് സെക്രട്ടറിക്ക് എസ് സുജാകുമാരിക്ക് കൈമാറി. പഞ്ചായത്തിലുടനീളമുള്ള
പോളി എതിലിനിൽ നിർമ്മിച്ച ബാനറുകൾ ഹരിതകർമ സേനക്ക് കൈമാറണമെന്ന് ഗ്രാമപഞ്ചായത്ത്
സെക്രട്ടറി എസ്. സുജാകുമാരി അറിയിച്ചു.

Also Read: ശബരിമല ദര്‍ശനത്തിന് വ്യാജ പാസുമായെത്തിയ 3 പേര്‍ പിടിയിൽ

ഇത്തരം ബാനറുകൾ ഒരിക്കും അലക്ഷ്യമായിവലിച്ചെറിയുകയോ കത്തിക്കുകയോ ചെയ്യരുതെന്നും അത് മണ്ണിനും സമൂഹത്തിനും ഗുണത്തേക്കാളേറെ ദോഷം മാത്രമേ ചെയ്യുകയുള്ളുവെന്ന് ഗ്രാമപഞ്ചായത്ത് സെക്രട്ടറി പറഞ്ഞു. വരും ദിവസങ്ങളിൽ ജനങ്ങളുടെ സഹകരണത്തോടെ തന്നെ പോളി എതിലിൻ ബാനറുകൾ ശേഖരിച്ച് പ്രകൃതിക്ക് ഗുണകരമാകുന്ന രീതിയിൽ കൂടുതൽ ഗ്രോബാഗുകൾ നിർമ്മിക്കാനുള്ള ശ്രമത്തിലാണ് ഹരിത കർമ്മ സേനാംഗങ്ങൾ.