പത്തനംതിട്ട: മധ്യ തിരുവിതാകൂർ കേന്ദ്രീകരിച്ച് മോഷണം നടത്തുന്ന ജപ്പാൻ ബാബു പോലീസ് വലയിലായി. കഴിഞ്ഞ ഡിസംബറിൽ പന്തളത്ത് നടന്ന മോഷണ കേസിൽ പ്രതിയെ തപ്പി ഇറങ്ങിയ പോലീസിന്റെ വലയിൽ ബാബു കുടുങ്ങുകയായിരുന്നു. പന്തളം നഗരത്തിലെ വ്യാപാര സ്ഥാപനങ്ങളിൽ നിന്ന് മോഷണം നടത്തിയ കേസിലാണ് പാലാ കടയംഭാഗം കുരുമ്പിൽ വീട്ടിൽ ജപ്പാൻ ബാബു എന്ന് വിളിക്കുന്ന ബാബു ഏലിയാസിനെ പോലീസ് അറസ്റ്റ് ചെയ്തത്.
ഇതിനിടെ പ്രതി തിരുവല്ലയിൽ ഒളിവിൽ കഴിയുകയാണെന്ന വിവരം ലഭിച്ചു. തുടർന്ന് തിരുവല്ല പോലീസിന്റെ സഹായത്തോടെ തിരുവല്ലയിൽ നിന്നു തന്നെ ഇയാളെ പിടികൂടുകയായിരുന്നു. കാഞ്ഞിരപ്പള്ളി, ചിങ്ങവനം, പാലാ, കോട്ടയം എന്നീ സ്റ്റേഷനുകളിൽ ഇയാൾക്കെതിരേ കേസുകളുണ്ട്. ജില്ലാ പോലീസ് മേധാവി സ്വപ്നിൽ മഹാജന്റെ നിർദേശപ്രകാരം എസ്എച്ച്ഓ എസ്. ശ്രീകുമാറിന്റെ നേതൃത്വത്തിലാണ് ഇയാളെ പിടികൂടിയത്. കെഎസ്ആർടിസി ബസിൽ അടൂർ ചെന്നിറങ്ങിയിട്ട് പന്തളത്തേക്ക് നടന്ന് സൗകര്യപ്രദമായ വീടുകളും കടകളും കണ്ടെത്തിയാണ് മോഷണം നടത്തിയിരുന്നത്. അടൂർ കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
പത്തനംതിട്ട ജില്ലയിലെ മുഴുവൻ വാര്ത്തകളും ഒറ്റ ക്ലിക്കിൽ ഇവിടെ വായിക്കാം
Read Latest Local News and Malayalam News