പ്രളയ ഭീഷണിയിൽ പത്തനംതിട്ട; മണിയാർ ഡാമിൻ്റെ ഷട്ടർ ഉയർത്തി, വീഡിയോ കാണാം

പത്തനംതിട്ട: ജില്ലയിൽ മഴ കനത്ത സാഹചര്യത്തിൽ പത്തനംതിട്ട മണിയാർ അണക്കെട്ടിന്റെ ഷട്ടറുകൾ ഉയർത്തി. 4 ഷട്ടറുകൾ 20 സെന്റിമീറ്റർ വീതമാണ്‌ ഉയർത്തിയിരിക്കുന്നത്. മണിയാർ ഡാമിലെ ജലനിരപ്പ് നിയന്ത്രിക്കാനാണ് പരമാവധി സംഭരണശേഷിയിലെത്തുന്നതിന് മുൻപ് തന്നെ ഷട്ടറുകൾ തുറന്നതെന്ന് ജില്ലാ ഭരണകൂടം വ്യക്തമാക്കി . പമ്പ, അച്ചൻകോവിൽ, മണിമല ആറുകളിൽ ജലനിരപ്പ് ഉയരുന്ന പശ്ചാത്തലത്തിൽ നദികളുടെ തീരത്ത് താമസിക്കുന്നവർക്ക് ജില്ലാ ഭരണകൂടം കനത്ത ജാഗ്രത നിർദ്ദേശമാണ് നൽകിയിരിക്കുന്നത് .

മൂഴിയാർ ഡാം തുറക്കും; അതീവ ജാഗ്രത നിർദ്ദേശം

അതേ സമയം ജില്ലയിലെ കല്ലൂപ്പാറ സ്റ്റേഷനിൽ ജലനിരപ്പ് അപകട നിലയിലെത്തിയിരിക്കുന്നതിനാൽ മണിമലയാറിൽ കേന്ദ്ര ജലകമ്മീഷൻ പ്രളയ മുന്നറിയിപ്പ് പുറപ്പെടുവിച്ചു. തുമ്പമൺ സ്റ്റേഷനിൽ ജലനിരപ്പ് അപകട നിലയിലെത്തിയിരിക്കുന്നതിനാൽ അച്ചൻകോവിലാറിലും പ്രളയ മുന്നറിയിപ്പ് പുറപ്പെടുവിച്ചു. മണിമലയാർ, അച്ചൻകോവിലാർ എന്നിവയുടെ കരകളിൽ താമസിക്കുന്നവർ അതീവ ജാഗ്രത പാലിക്കണമെന്നും അധികൃതർ മുന്നറിയിപ്പ് നൽകി . ആവശ്യമെങ്കിൽ സുരക്ഷിതമായ ക്യാമ്പുകളിലേക്ക് ജനങ്ങളെ മാറ്റാനുള്ള തയ്യാറെടുപ്പുകൾ പൂർത്തിയാക്കിയതായി പത്തനംതിട്ട ജില്ലാ കലക്ടർ നരി സിംഹഗാരി തേജ് ലോഹിത് റെഡ്ഢി വ്യക്തമാക്കി.