വീണയ്ക്കെതിരെ വ്യക്തിഹത്യ
ആദ്യമായി ആറന്മുള മണ്ഡലത്തിൽ വീണ ജോർജ് മത്സരിക്കാൻ എത്തിയപ്പോൾ തന്നെ പാർട്ടിയേക്കാൾ സീറ്റിനെ സ്നേഹിച്ച ചിലർ വീണ ജോർജിനെതിരെ വ്യക്തിഹത്യ ആരംഭിച്ചതാണെന്നും കഴിഞ്ഞ തെരഞ്ഞെടുപ്പിൽ മാത്രമല്ല ഈ തെരഞ്ഞെടുപ്പിലും വീണയെ അവർ തോൽപിക്കാൻ ശ്രമിച്ചെന്നും ഉദയഭാനു പറഞ്ഞു. വീണയെ തോൽപിക്കാൻ ശ്രമിച്ച കുലംകുത്തികളെ മുൻപ് തന്നെ പാർട്ടി തിരിച്ചറിഞ്ഞിട്ടുണ്ട്. മൂന്നുവർഷത്തിനുശേഷം നടക്കുന്ന അടുത്ത സമ്മേളനത്തിൽ ഈ കുലംകുത്തികളാരും പാർട്ടിയിൽ ഉണ്ടാകില്ല എന്നും പാർലമെൻ്ററി മോഹവുമായി ആറന്മുള സീറ്റിൽ കണ്ണുവെച്ച ചില ജില്ല നേതാക്കളാണ് ഈ പ്രശ്നത്തിൻ്റെ പിന്നിലെന്നും അദ്ദേഹം വ്യക്തമാക്കി.
ദൈവ നാമത്തിൽ സത്യപ്രതിജ്ഞ
ദൈവനാമത്തിൽ വീണ ജോർജ് സത്യപ്രതിജ്ഞ നടത്തിയതിനെതിരെ ഉണ്ടായ വിമർശനത്തിലും വീണ ജോർജിനെ പിന്തുണച്ച് ഉദയഭാനു രംഗത്തെത്തി." വിശ്വാസികൾക്ക് പാർട്ടി ഒരിക്കലും എതിരല്ല. എതിരാവുകയുമില്ല " ജനപ്രതിനിധിയായ ശേഷമാണ് വീണ ജോർജ് പാർട്ടി അംഗത്വത്തിൽ വന്നത്. പാർട്ടി പ്രവർത്തനങ്ങളുമായി ബന്ധപ്പെട്ട് പ്രവർത്തിക്കാൻ കുടുതൽ സമയമെടുക്കും എന്നത് സ്വാഭാവികമാണ് .അത് ഇത്ര വിവാദമാക്കേണ്ട കാര്യമില്ല.
വാർത്തകൾ ചോർത്തുന്നു
പാർട്ടിക്കുള്ളിൽ എടുക്കുന്ന തീരുമാനങ്ങൾ ഉൾപ്പടെയുള്ളവ പാർട്ടിയിൽ ഉള്ളവർ തന്നെ ചില മാധ്യമങ്ങൾക്ക് ചോർത്തി കൊടുക്കുന്നതായും ഇവർ ആരൊക്കെയെന്ന് ബോധ്യപ്പെട്ടുവെന്നും കെ പി ഉദയഭാനു പറഞ്ഞു. അതേസമയം ഏരിയ സമ്മേളനങ്ങളിൽ വീണ ജോർജിനെതിരെ ഉയർന്ന വിമർശന ശരങ്ങൾ ജില്ല സമ്മേളനത്തിലും സജീവ ചർച്ചയ്ക്ക് വഴിവെക്കുമെന്ന സൂചനകളും പുറത്തു വരുന്നുണ്ട്.