ഓണത്തിന് കോടിപതിയായി പത്തനംതിട്ട കെഎസ്ആർടിസി; വരുമാനത്തിൽ നേട്ടം, കോയമ്പത്തൂരിലേക്ക് പുതിയ സർവ്വീസ്

പത്തനംതിട്ട: കോയമ്പത്തൂരിലേക്ക് പുതിയ സർവീസുമായി കെഎസ്ആർടിസി പത്തനംതിട്ട ഡിപ്പോ. അടുത്തിടെ അന്തർ സംസ്ഥാന സ്വകാര്യ സർവീസ് പത്തനംതിട്ടയിൽനിന്നും കോയമ്പത്തൂരിലേക്ക് ആരംഭിച്ചത് വിവാദമായിരുന്നു. നിരവധി നിയമ പ്രശനങ്ങളിലൂടെ കടന്നു പോകുന്ന സ്വകാര്യ സർവീസിന് പിന്നാലെയാണ് ഇപ്പോൾ കെഎസ്ആർടിസി സ്വിഫ്റ്റ് സൂപ്പർ ഫാസ്റ്റ് സർവീസ് തുടങ്ങിയത്.Also Read: തിരുവോണത്തിന് വീട്ടില്‍ ബീഫും മീനും വിളമ്പുമെന്ന വ്യാജ പ്രചരണം; പരാതിയുമായി സിപിഎം നേതാവ് പികെ ശ്രീമതി

പത്തനംതിട്ടനിന്നും ആരംഭിച്ച് കോഴഞ്ചേരി - തിരുവല്ല - ചങ്ങനാശ്ശേരി - കോട്ടയം - പെരുമ്പാവൂർ - തൃശ്ശൂർ - പാലക്കാട് വഴിയാണ് സർവീസ്. രാവിലെ 08.10 പത്തനംതിട്ട, 09.35 കോട്ടയം, ഉച്ചക്ക് 01.15 തൃശ്ശൂർ, 02.50 പാലക്കാട്, വഴി വൈകിട്ട് 4 ന് കോയമ്പത്തൂർ എത്തും. കോയമ്പത്തൂർ - പത്തനംതിട്ട മടക്കയാത്ര പാലക്കാട് - തൃശ്ശൂർ - പെരുമ്പാവൂർ - കോട്ടയം - ചങ്ങനാശ്ശേരി - തിരുവല്ല വഴി തന്നെയാണ്. രാത്രി 08:45 ന് കോയമ്പത്തൂർ നിന്നും പുറപ്പെട്ട് 10.10 പാലക്കാട്,11.50 തൃശ്ശൂർ, പുലർച്ചെ 03.05 കോട്ടയം വഴി 04.25 പത്തനംതിട്ട എത്തും. കെഎസ്ആർടിസി സ്വിഫ്റ്റ് സർവീസുകളുടെ ടിക്കറ്റുകൾ മുൻകൂട്ടി ബുക്കു ചെയ്യുന്നതിനും സൗകര്യമുണ്ട്.



ഇക്കഴിഞ്ഞ ഓണ വാരത്തിൽ പത്തനംതിട്ട കെഎസ്ആർടിസി ഡിപ്പോയ്ക്ക് മികച്ച വരുമാനം ലഭിച്ചു. ഓഗസ്റ്റ് 25 മുതൽ സെപ്റ്റംബർ ഒന്നുവരെയുള്ള ദിവസങ്ങളിൽ പത്തനംതിട്ട കോടി പതിയായി. ഒരു കോടി രൂപയാണ് ടിക്കറ്റ് ഇനത്തിൽ ലഭിച്ചത്. ഈ ദിവസങ്ങളിലെല്ലാം 10 ലക്ഷം രൂപയ്ക്കു മുകളിൽ ആയിരുന്നു വരുമാനം. 25ന് 11 ലക്ഷത്തിൽ തുടങ്ങി, 31ന് 14 ലക്ഷവും ഒന്നിന് 13.75 ലക്ഷവും വരുമാനം ലഭിച്ചു. ഗവി അടക്കമുള്ള വിനോദ സഞ്ചാര കേന്ദ്രങ്ങളിലേക്കും പത്തനംതിട്ടനിന്നും സർവീസ് നടത്തിയിരുന്നു. ഈ ദിവസങ്ങളിൽ ശബരിമല സർവീസും പത്തനംതിട്ട-വഴിക്കടവ്, പത്തനംതിട്ട-തിരുനെല്ലി, പത്തനംതിട്ട-മംഗലാപുരം സർവീസുകളും ക്രമമായി നടത്തിയെന്ന നേട്ടവുമുണ്ട്. വരും ദിവസങ്ങളിൽ പുതിയ ദീർഘ ദൂര സർവീസുകൾ ആരംഭിക്കാനും പദ്ധതിയുണ്ട്.