തിരുമൂലപുരം ശുദ്ധജല വിതരണ പദ്ധതി വൈകുന്നതിനെതിരെ പ്രതിഷേധം; ദേശീയപാത അതോറിറ്റി അനുമതി നൽകണമെന്ന് അധികൃതർ

തിരുവല്ല: തിരുവല്ല തിരുമൂലപുരം ശുദ്ധജല വിതരണ പദ്ധതിയുടെ പ്രവർത്തനം വൈകുന്നതിനെതിരെ പ്രതിഷേധം ശക്തമാകുന്നു. തിരുവല്ല നഗരസഭയിലെ ഉയർന്ന പ്രദേശങ്ങളിലെ ശുദ്ധജലക്ഷാമം പരിഹരിക്കാനായി ജലവിതരണ വകുപ്പ് നേരിട്ട് നടപ്പാക്കുന്ന പദ്ധതിയാണ് തിരുമൂലപുരം ശുദ്ധജല വിതരണ പദ്ധതി. ദേശീയപാത അതോറിറ്റിയുടെ അനുമതി ലഭിക്കാത്തതാണ് പദ്ധതി വൈകാൻ കാരണമായതെന്നാണ് അധികൃതർ പറയുന്നത്.

Also Read: ആറന്മുളയിൽ പീഡനത്തിന് ഇരയായ പെൺകുട്ടിക്ക് സർക്കാർ ജോലി നൽകണം; ചൊവ്വാഴ്ച ആക്ഷൻ കൗൺസിൽ ധർണ

കിഫ്ബിയിൽ നിന്നുള്ള 58 കോടി രൂപ ചെലവിട്ട് നടപ്പാക്കുന്ന ഈ പദ്ധതി ആരംഭിച്ചിട്ട് വർഷങ്ങൾ കഴിഞ്ഞു. ജലവിതരണം ആരംഭിക്കാനായി എംസി റോഡ് കുഴിച്ച് പൈപ്പുകൾ തമ്മിൽ ബന്ധിപ്പിക്കുന്നതിനായി അനുമതി തേടി ദേശീയപാത അതോറിറ്റിക്ക് നാലുമാസം മുമ്പ് ജല അതോറിറ്റി അപേക്ഷ നൽകിയതാണ്.എന്നാൽ ഇക്കാര്യത്തിൽ ഇതുവരെയും തീരുമാനമാകാത്തതാണ് പദ്ധതിയുടെ പ്രവർത്തനത്തെ ബാധിച്ചിരിക്കുന്നത്.

കെഎസ്ടിപി നിർമാണം പൂർത്തിയാക്കിയ റോഡ് പൊതുമരാമത്ത് വകുപ്പിന് കൈമാറിയിരുന്നു. എന്നാൽ കൊല്ലം- തേനി ദേശീയപാതയുടെ ഭാഗമായി നാലുമാസം മുമ്പ് പൊതുമരാമത്ത് വകുപ്പിൽ നിന്നും ദേശീയപാത വിഭാഗം റോഡ് ഏറ്റെടുത്തു. ചെങ്ങന്നൂർ- കോട്ടയം ഭാഗത്ത് പൂർത്തിയാക്കാനുള്ള നിർമാണ പ്രവർത്തനങ്ങൾക്കായി കെഎസ്ടിപി റോഡ് തിരികെ ആവശ്യപ്പെട്ടതിനാലാണ് റോഡ് കുഴിക്കാൻ അനുമതി ലഭിക്കാത്തതെന്നാണ് ദേശീയപാത അതോറിറ്റിയുടെ വാദം.

Also Read: എംസി റോഡ് മരണക്കെണിയാകുന്നു; ബൈക്ക് അപകടത്തിൽ അടൂർ സ്വദേശി മരിച്ചു

മാസങ്ങൾക്ക് മുമ്പ് നിർമാണം പൂർത്തിയായ ജലസംഭരണിയിലേക്ക് വിവിധ ഭാഗങ്ങളിൽ നിന്നുള്ള പൈപ്പുകൾ കൂട്ടിയോജിപ്പിക്കുന്ന പണികൾ മാത്രമാണ് ഇനി ബാക്കി നിൽക്കുന്നത്. പദ്ധതിയുടെ പൂർത്തീകരണം വേഗത്തിലാക്കാനായി ദേശീയപാത അതോറിറ്റി ഉദ്യോഗസ്ഥരെയും ജലവിതരണ വകുപ്പ് ഉദ്യോഗസ്ഥരെയും ഉൾപ്പെടുത്തിയുള്ള ചർച്ച വൈകാതെ വിളിച്ചുകൂട്ടി തീരുമാനം എടുക്കുമെന്നാണ് അധികൃതർ വ്യക്തമാക്കുന്നത്.

പത്തനംതിട്ട ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ

പത്തനംതിട്ട ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ