പത്തനംതിട്ട : സംസ്ഥാനത്തെ പ്രളയബാധിത പ്രദേശങ്ങളുടെ പുനര്‍ നിര്‍മ്മാണത്തിന്റെ ഭാഗമായി സുസ്ഥിര ഉപജീവന പ്രവര്‍ത്തനങ്ങള്‍ നടപ്പിലാക്കുന്നതിനായി സംസ്ഥാന സര്‍ക്കാര്‍ തെരഞ്ഞെടുത്ത 14 ബ്ലോക്കുകളില്‍ ജില്ലയില്‍ നിന്നും പുളിക്കീഴ് ബ്ലോക്ക് തെരഞ്ഞെടുക്കപ്പെട്ടു. സംസ്ഥാന സര്‍ക്കാര്‍ റീബില്‍ഡ് കേരള ഇനിഷ്യേറ്റീവിന്റെ നേതൃത്വത്തില്‍ കുടുംബശ്രീ മുഖേന എസ്.വി.ഇ.പി പദ്ധതിയുടെ മാതൃകയില്‍ ആണ് 5.5 കോടിരൂപയോളം ചെലവഴിച്ച് 'സംരംഭകവികസന പദ്ധതി' ബ്ലോക്കിലെ ഗ്രാമ പഞ്ചായത്തുകളില്‍ നടപ്പിലാക്കുന്നത്. എസ്.വി.ഇ.പി പദ്ധതി പ്രകാരം ഒരു ബ്ലോക്ക് പ്രദേശത്ത് സുസ്ഥിരമായ വരുമാനദായക സംരംഭങ്ങള്‍ ആരംഭിക്കുകയാണ് ലക്ഷ്യം.
Also Read: ചാരായം വാറ്റ് എക്സൈസ് സംഘത്തെ അറിയിച്ച യുവാക്കളെ കള്ളക്കേസിൽ കുടുക്കാൻ ശ്രമമെന്ന് ആരോപണം
കുടുംബശ്രീ അംഗങ്ങള്‍ക്കും കുടുംബാംഗങ്ങള്‍ക്കുമാണ് പദ്ധതിയിലൂടെ സ്വന്തമായി ഒരു ഉപജീവന മാര്‍ഗം ആരംഭിക്കുവാന്‍ സാധ്യമാകുന്നത്. സ്വന്തമായി സംരംഭങ്ങള്‍ ആരംഭിക്കുവാനും വിജയകരമായി നടത്തുവാനും ഗ്രാമീണ ജനതയ്ക്ക് ആവശ്യമായ പരിശീലനങ്ങള്‍, ശേഷിവികസനം, മാര്‍ഗനിര്‍ദ്ദേശങ്ങള്‍, വായ്പയും മറ്റു ധനസഹായങ്ങള്‍, സാങ്കേതിക പിന്തുണകള്‍ എന്നിവ എസ്.വി.ഇ.പി മുഖേന ലഭ്യമാകുന്നു. ആരംഭിക്കുന്ന സംരംഭത്തിന്റെ പദ്ധതി തുകയ്ക്ക് അനുസൃതമായി വ്യക്തിഗത സംരംഭങ്ങള്‍ക്ക് പരമാവധി 50,000 രൂപയും ഗ്രൂപ്പ് സംരംഭങ്ങള്‍ക്ക് പരമാവധി 10,0000 വായ്പയായി നല്‍കും.
Also Read: ഉത്രവധക്കേസ്; സൂരജ് മാത്രം പ്രതി, സമർപ്പിച്ചത് ആയിരം പേജുള്ള കുറ്റപത്രം
നിലവില്‍ എസ്.വി.ഇ.പി നടപ്പിലാക്കുന്ന ബ്ലോക്കുകളില്‍ പദ്ധതിക്ക് നല്ല സ്വീകാര്യതയാണ് ലഭ്യമാകുന്നത്. ബ്ലോക്ക് പരിധിയിലെ ഗ്രാമപഞ്ചായത്തുകളിലെ കുടുംബശ്രീ സി.ഡി.എസ് ചെയര്‍പേഴ്സണ്‍ സൂക്ഷമസംരംഭ ഉപസമിതി കണ്‍വീനര്‍ എന്നിവര്‍ ചേര്‍ന്നു രൂപീകരിക്കുന്ന കമ്മിറ്റിയാണ് പദ്ധതി നടപ്പിലാക്കുന്നതും ഉപജീവന സാധ്യതകള്‍ മെച്ചപ്പെടുത്തുന്നതിന് ആവശ്യമായ പ്രവര്‍ത്തനങ്ങള്‍ക്ക് നേതൃത്വം നല്‍കുന്നതും. ദേശീയ ഗ്രാമീണ ഉപജീവന മിഷന്റെ നേതൃത്വത്തില്‍ കേന്ദ്ര-സംസ്ഥാന സര്‍ക്കാരുകള്‍ സംയുക്തമായി നടപ്പിലാക്കുന്ന സ്റ്റാര്‍ട്ടപ്പ് വില്ലജ് എന്റര്‍പ്രണര്‍ഷിപ്പ് പദ്ധതി കേരളത്തിലെ 14 ബ്ലോക്കുകളില്‍ നടപ്പിലാക്കി വരുന്നുണ്ട്.