പത്തനംതിട്ട: അടൂരിൽ വീണ്ടും തീപിടുത്തം. അടൂർ തുവയൂർ തെക്ക് മഹർഷിമംഗലം മഹാദേവ ക്ഷേത്രത്തിന് സമീപം രഞ്ജിത് ഭവനം രവീന്ദ്രൻ ആചാരിയുടെ വീട്ടിലെ സ്വീകരണ മുറിയിലെ വൈദ്യുതി ഉപകരണങ്ങൾക്ക് തീ പിടിച്ചു. അപകട സമയം വീട്ടിൽ ആളുണ്ടായിരുന്നില്ല. വലിയ പൊട്ടിത്തെറി കേട്ട് സമീപ വാസികൾ അടൂർ ഫയർ ഫോഴ്സിൽ വിവരം അറിയിച്ചു. വീടിന് സമീപം ഉണ്ടായിരുന്ന രവീന്ദ്രൻ ആചാരിയുടെ ഭാര്യ വസന്ത എത്തിയപ്പോൾ വീടിൻ്റെ മുൻ ഭാഗത്തുള്ള മുറിയിൽ തീ ആളി പടരുന്നതാണ് കണ്ടത്. തുടർന്ന് നാട്ടുകാർ ചേർന്ന് സമീപത്ത് നിന്നും വെള്ളം കോരി ഒഴിച്ച് തീ കെടുത്തിയെങ്കിലും മുറിയ്ക്കുള്ളിൽ ഉണ്ടായിരുന്ന ടെലിവിഷൻ, സോഫാ സെറ്റി, വയറിംഗുകൾ,മറ്റ് ഉപകരണങ്ങൾ എന്നിവ പൂർണമായും കത്തി നശിച്ചു. വീടിന്റെ ഭിത്തിക്കും കേടുപാടുകൾ സംഭവിച്ചിട്ടുണ്ട്.
സ്റ്റേഷൻ ഓഫീസർ വി വിനോദ് കുമാറിന്റെ നേതൃത്വത്തിൽ അടൂരിൽ നിന്നും അഗ്നിശമന സേന എത്തി സ്ഥിതിഗതികൾ നിയന്ത്രണ വിധേയമാണെന്ന് ഉറപ്പ് വരുത്തി. മുറിയക്കുള്ളിൽ കത്തിച്ച് വച്ചിരുന്ന നിലവിളക്കിൽ നിന്നാകാം തീ പടർന്നത് എന്നാണ് ഫയർ ഫോഴ്‌സിന്റെ പ്രാരംഭ നിഗമനം. രണ്ട് ലക്ഷത്തിലധികം രൂപയുടെ നഷ്ടം ഉണ്ടായിട്ടുണ്ടെന്നാണ് പ്രാഥമിക വിലയിരുത്തൽ. അപകട സമയം വീടിനുള്ളിൽ ആളില്ലാതിരുന്നതും പ്രദേശവാസികളുടെ സമയോചിത ഇടപെടലും മൂലമാണ് ഒരു വലിയ അപകടം ഒഴിവായത്.
പത്തനംതിട്ട ജില്ലയിലെ മുഴുവൻ വാ‍ര്‍ത്തകളും ഒറ്റ ക്ലിക്കിൽ ഇവിടെ വായിക്കാം
അസി. സ്റ്റേഷൻ ഓഫീസർ കെ സി റജി കുമാർ, ഗ്രേഡ് അസി. സ്റ്റേഷൻ ഓഫീസർ ഷാനവാസ്, ഫയർ & റസ്ക്യൂ ഓഫീസർമാരായ പ്രദീപ്, ലിജി കുമാർ , അനീഷ് കുമാർ ,രവി, ഭാർഗ്ഗവൻ, പ്രകാശ് എന്നിവർ രക്ഷാപ്രവർത്തനത്തിനായി എത്തിച്ചേർന്നു. അടുത്തിടെ അടൂർ പ്രദേശങ്ങളിൽ സ്ഥിരമായി വാഹനം അഗ്നിക്ക് ഇരയായിരുന്നു. ഈ സംഭവത്തിൽ ഒരാൾ പോലീസിന്റെ പിടിയിലായിട്ടുണ്ട്.