പത്തനംതിട്ട( Pathanamthitta): ഗ്രാമ പഞ്ചായത്ത് സെക്രട്ടറിക്ക് എംഎംഎൽഎയുടെ പരസ്യ ശാസന, ഒറ്റ രാത്രി കൊണ്ട് കോന്നി നാരായണപുരം ചന്ത ക്ലീൻ. കോന്നി എംഎൽഎ അഡ്വ.കെ.യു ജനീഷ്കുമാറിന്റെ നേരിട്ടുള്ള ഇടപെടലിൽ കോന്നി നാരായണപുരം ചന്തയിലെ ദുർഗന്ധം വമിപ്പിക്കുന്ന മാലിന്യങ്ങൾ സംസ്കരിച്ചു. കോന്നി ചന്തയിൽ പുതിയ ഗേറ്റും സിസിടിവിയും ഉടൻ സ്ഥാപിക്കുമെന്ന് പഞ്ചായത്ത് അധികൃതർ ഉറപ്പ് നൽകി. വെള്ളമില്ലാത്തതിനാൽ പ്രവർത്തനക്ഷമമല്ലാതായി കിടക്കുന്ന ടോയ്ലെറ്റുകൾ വൃത്തിയാക്കി ഉപയോഗ യോഗ്യമാക്കുമെന്നും മത്സ്യമാർക്കറ്റിനുള്ളിൽ തന്നെ വിപണനം നടത്തുന്നതിനുള്ള ക്രമീകരണം ഒരുക്കുമെന്നും മാലിന്യപ്രശ്നം ശാശ്വതമായി പരിഹരിക്കുന്നതിനു വേണ്ടി പഞ്ചായത്ത് തലത്തിൽ പ്രത്യേക യോഗം വിളിക്കുമെന്നും എംഎൽഎ അറിയിച്ചു.
സത്യാവസ്ഥ നേരിട്ട് ബോധ്യപ്പെടാൻ യോഗം അവസാനിച്ച ഉടൻ തന്നെ കോന്നി ചന്തയിൽ അഡ്വ. കെ.യു. ജനീഷ്കുമാർ എംഎൽഎ മിന്നൽ പരിശോധന നടത്തിയതിനെ തുടർന്നാണ് മാലിന്യങ്ങൾ കുന്നുകൂടി അതിരൂക്ഷഗന്ധം പടർത്തി പ്രദേശവാസികൾക്ക് ബുദ്ധിമുട്ടുണ്ടാക്കുന്നതായി എംഎൽഎ നേരിൽക്കണ്ട് ബോധ്യപ്പെട്ടത്. ഇതേ തുടർന്നാണ് എത്രയും വേഗം ചന്ത വൃത്തിയാക്കാനും മാലിന്യങ്ങൾ യഥാവിധി സംസ്കരിക്കാനും എംഎൽഎ പഞ്ചായത്ത് അധികൃതർക്ക് പരസ്യ ശാസനം നൽകിയത്. ഇതിനെ തുടർന്നാണ് പഞ്ചായത്ത് ഡെപ്യൂട്ടി ഡയറക്ടർ കെ.ആർ സുമേഷ്,കോന്നി പഞ്ചായത്ത് സെക്രട്ടറി ജയബാലൻ എന്നിവരുടെ നേതൃത്വത്തിൽ ചന്തയിലെ മാലിന്യ സംസ്കരണം ഒറ്റ രാത്രിയിൽ പൂർത്തിയാക്കിയത്.
Topic: Pathanamthitta News, Janeesh Kumar MLA, Konni market waste issue