പത്തനംതിട്ട(pathanamthitta) : തിരുവല്ല കിഴക്കൻ മുത്തൂരിൽ കഞ്ചാവിൻ്റെ ഉപയോഗവും വിൽപ്പനയും തകൃതിയായി നടക്കുന്നുണ്ടെന്ന് സംബന്ധിച്ച വിവരം എക്സൈസിനും മറ്റു വകുപ്പുകൾക്കും ചോർത്തി നൽകിയതായി ആരോപിച്ച് അയൽവാസിയെ കുത്തിപ്പരുക്കേൽപ്പിച്ച കേസിലെ പ്രതി പിടിയിലായി. തിരുവല്ല കുറ്റപ്പുഴ കണ്ടത്തിൻ കരയിൽ വീട്ടിൽ രാഹുൽ രാജൻ (24) ആണ് പോലീസിൻ്റെ പിടിയിലായത്. തിരുവല്ല കിഴക്കൻ മുത്തൂർ നാട്ടുകടവ് പയ്യാംപ്ലാത്ത് വീട്ടിൽ തോമസ് ജോസഫിനെ (39) കുത്തിപ്പരുക്കേൽപ്പിച്ച കേസിലാണ് രാഹുൽ പിടിയിലായത്. തിരുവല്ല നാട്ടുകടവ് എസ്എൻഡിപി ഗുരുമന്ദിരത്തിന് സമീപം വച്ച് ഇക്കഴിഞ്ഞ തിങ്കളാഴ്ച രാത്രി പത്തു മണിയോടെയായിരുന്നു സംഭവം. ഫ്ളക്സ് മുറിക്കുന്ന കത്തി ഉപയോഗിച്ചായിരുന്നു ആക്രമണം.
നിലവിൽ ഗുരുതരമായ പരുക്കുകളോടെ തോമസ് ജോസഫ് കോട്ടയം മെഡിക്കൽ കോളജിൽ തീവ്രപരിചരണ വിഭാഗത്തിൽ ചികിത്സയിൽ തുടരുകയാണ്. തിരുവല്ല കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
Topic: Pathanamthitta, neighbour attacked, pathanamthitta cannabis case