പത്തനംതിട്ട: പത്തനംതിട്ട നഗരസഭയുടെ പ്രാഥമികാരോഗ്യകേന്ദ്രം ഒടുവിൽ സ്വന്തം കെട്ടിടത്തിൽ പ്രവർത്തനം ആരംഭിച്ചു. മുൻപ് തന്നെ നിർമ്മാണം പൂർത്തികരിച്ചു എങ്കിലും അടിസ്ഥാന സൗകര്യങ്ങൾ ഒരുക്കാത്തതിനാൽ ആശുപത്രിയുടെ പ്രവർത്തനം ഇതു വരെ വാടക കെട്ടിടത്തിലായിരുന്നു. ഇതിനാണ് ഇപ്പോൾ മാറ്റം ഉണ്ടായിരിക്കുന്നത്. രണ്ടായിരത്തി പതിമൂന്നിൽ ഉമ്മൻ ചാണ്ടി സർക്കാരിൽ ആരോഗ്യ വകുപ്പ് മന്ത്രിയായിരുന്ന വി.എസ്.ശിവകുമാറിന് അന്നത്തെ നഗരസഭാധ്യക്ഷൻ എ.സുരേഷ് കുമാർ നിവേദനം നൽകിയതിനെ തുടർന്നാണ് പത്തനംതിട്ടയിൽ ആരോഗ്യ കേന്ദ്രം അനുവദിച്ചത്.
ഇതോടെ ഈ ആശുപത്രി മാത്രം തേടിയെത്തുന്ന രോഗികൾക്കും അവരുടെ ബന്ധുക്കൾക്കും ഇത് വളരെ സഹായകമായി. ജില്ലയിലെ കിഴക്കൻ മേഖലയിൽ താമസിക്കുന്നവർക്ക് കൂടി ഈ സൗകര്യം പ്രയോജനപ്പെടുത്തുന്നതിനായി 2016ൽ കുമ്പഴയിലേ വാടക കെട്ടിടത്തിലേക്ക് ഈ ആശുപത്രിയുടെ പ്രവർത്തനം മാറ്റുകയായിരുന്നു. വർഷങ്ങൾക്ക് ശേഷം രണ്ടായിരത്തി ഇരുപതിലാണ് കുമ്പഴ ഓപ്പൺ സ്റ്റേജിന് സമീപം ആശുപത്രിക്ക് കെട്ടിടം പണിതത് . വർഷങ്ങളായി നഗരസഭ വാടക നൽകാതെ വന്നതോടെ കെട്ടിട ഉടമ ആരോഗ്യ കേന്ദ്രം മാറ്റണമെന്നാവശ്യപ്പെട്ട വിവാദങ്ങളും ഇതിനിടെ കൊടുമ്പിരി കൊണ്ടു.
തദ്ദേശ ഭരണ തിരഞ്ഞെടുപ്പു പ്രഖ്യാപിച്ചതോടെ ആരോഗ്യകേന്ദ്രത്തിന്റെ ഉദ്ഘാടനം നടത്താൻ കഴിഞ്ഞ ഭരണസമിതി ശ്രമിച്ചിരുന്നു. അടിസ്ഥാന സൗകര്യങ്ങൾ ഒരുക്കാതെയാണ് ഉദ്ഘാടനം എന്ന് ആരോപിച്ച് അന്നത്തെ പ്രതിപക്ഷം ചടങ്ങ് അലങ്കോലപ്പെടുത്തിയിരുന്നു. പുതിയ ഭരണസമിതി അധികാരത്തിലെത്തിയ ശേഷമാണ് ആശുപത്രിക്ക് ആവശ്യമായ അടിസ്ഥാന സൗകര്യങ്ങൾ ഒരുക്കി നൽകിയത്.