പണം ചോദിച്ചെത്തുന്നത് നിരവധി പേർ, കൊടുക്കാൻ നിവൃത്തിയില്ലാതെ ബാങ്ക്; മൈലപ്ര സഹകരണ ബാങ്ക് മുൻ സെക്രട്ടറി പ്രതി, തട്ടിപ്പിന്‍റെ ചുരുളഴിക്കാൻ ക്രൈം ബ്രാഞ്ച്

കേസുകളും അന്വേഷണവും നടക്കുമ്പോഴും നിരവധി നിക്ഷേപകരാണ് ദിവസേന ബാങ്കിൽ എത്തി പണം ആവശ്യപ്പെടുന്നത്. സി.പി.എം ഏരിയ കമ്മറ്റി അംഗമായ ബാങ്ക് പ്രസിഡണ്ട് രാജി വയ്ക്കണമെന്ന് പാർട്ടി ആവശ്യപ്പെട്ടെങ്കിലും നടക്കാതെ വന്നതോടെ ലോക്കൽ സെക്രട്ടറി സാജു മണിദാസ് രാജിവച്ചു. ഇത്തരത്തിൽ നിരവധി പ്രശ്നങ്ങളാണ് ബാങ്കിന് മുൻപിൽ ദിവസേനെ അരങ്ങേറുന്നത്. സാമ്പത്തിക കുറ്റകൃത്യങ്ങൾ അന്വേഷിക്കുന്ന അടൂരിലെ ക്രൈംബ്രാഞ്ച് തിരിമറിയുമായി ബന്ധപ്പെട്ട കണക്കുകൾ പരിശോധിച്ചു തുടങ്ങിയിട്ടുണ്ട്. അതിനിടെ, മുൻ സെക്രട്ടറി ജോഷ്വാ മാത്യുവിനെ പ്രതിയാക്കി ക്രൈംബ്രാഞ്ച് എഫ്ഐആർ തയ്യാറാക്കി.

4 കോടി രൂപയുടെ തട്ടിപ്പാണ് ക്രൈംബ്രാഞ്ച് ആദ്യ ഘട്ടത്തിൽ അന്വേഷിക്കുന്നത്. മൊത്തം 33 കോടിയോളം രൂപയുടെ സാമ്പത്തിക തിരിമറി നടന്നതായാണ് സഹകരണ അസിസ്റ്റന്‍റ് റജിസ്ട്രാറുടെ അന്വേഷണത്തിൽ കണ്ടെത്തിയിരുന്നത്. പണം തിരികെ ലഭിക്കാനായി ബാങ്കിനു മുൻപിൽ വീണ്ടും നിക്ഷേപകരുടെ പ്രതിഷേധം ശക്തമാകുന്നതിനിടെ ജപ്തിയിൽ എത്തിയ വായ്പകൾ തിരിച്ചുപിടിക്കാൻ ജാമ്യവസ്തുക്കളുടെ ലേലം പ്രഖ്യാപിച്ചിരുന്നെങ്കിലും നടന്നില്ല. ഭൂമി ലേലത്തിലൂടെ വിറ്റഴിക്കാൻ സഹകരണ വകുപ്പ് നടത്തിയ ശ്രമം ലേലം പിടിക്കാൻ ആരും വരാത്തത് മൂലമാണ് നടക്കാതെ പോയത്.

കുറഞ്ഞത് 100 പേർ എങ്കിലും ഓരോ ദിവസവും പണം പിൻവലിക്കാനായി ബാങ്കിൽ എതുന്നുണ്ട് . നിക്ഷേപം എത്ര ആയാലും പരമാവധി 2000 മുതൽ 5000 രൂപ വരെ മാത്രമേ ഇപ്പോൾ നല്കാൻ കഴിയൂ എന്നാണ് ജീവനക്കാർ പറയുന്നത്. ഇത് പ്രതിഷേധത്തിനും വാക്കേറ്റത്തിനും വരെ കാരണമാകുന്നുണ്ട്. ബാങ്ക് സെക്രട്ടറിയെ ഭരണ സമതി സസ്‌പെൻഡ് ചെയ്തിരുന്നു. എന്നാൽ ഇത് കൊണ്ട് മാത്രം കാര്യമില്ലെന്നാണ് സഹകാരികൾ പറയുന്നത്. ബാങ്കിന്റെ അവസ്ഥ മോശമാണെന്ന് കാണിച്ച് ലഭിച്ച പരാതികളിൽ സഹകരണ നിയമം അനുസരിച്ച് ജോയിന്റ് റജിസ്ട്രാർ നടത്തിയ അന്വേഷണത്തിൽ പ്രാഥമിക ഘട്ടത്തിൽ തന്നെ ക്രമക്കേടുകൾ നടന്നതായി കണ്ടെത്തിയിരുന്നു. ഇതേ തുടർന്ന് ബാങ്ക് ഭരണസമിതി പിരിച്ചുവിടാൻ നോട്ടീസ് നൽകിയെങ്കിലും ഇത് നൽകാതെ ഭരണസമിതി ഹൈക്കോടതിയിൽ നിന്നു സ്റ്റേ ഉത്തരവ് വാങ്ങി.

സ്റ്റേ ഉത്തരവിനെതിരെ സഹകരണ ജോയിന്‍റ് റജിസ്ട്രാർ അപ്പീൽ നൽകിയതും കോടതിയുടെ പരിഗണനയിൽ ഉണ്ട്. കഴിഞ്ഞ 20 വർഷമായി 29 കോടി രൂപയുടെ നഷ്ടമാണു ബാങ്കിനുണ്ടായതെന്നും ഏത് അന്വേഷണവും സ്വാഗതം ചെയ്യുന്നതായും ബാങ്ക് പ്രസിഡന്‍റ് ജെറി ഈശോ ഉമ്മൻ പറയുന്നു. 15 കോടി രൂപയോളം പലിശ ഇനത്തിൽ ഈടാക്കിയിട്ടുണ്ട്. യഥാർത്ഥത്തിൽ 14 കോടി രൂപയുടെ നഷ്ടമാണുള്ളത്. പരിഭ്രാന്തി പരത്തി ചിലർ പ്രശ്നനങ്ങൾ ഉണ്ടാക്കുകയാണ്. ബാങ്കിന്റെ ഉടമസ്ഥതയിലുള്ള ഫാക്ടറിക്ക് നിയമാനുസൃതം 33 കോടി രൂപ നൽകിയിട്ടുണ്ട്. ലോക്ക്ഡൗൺ, കൊവിഡ് എന്നിവ കാരണം തിരിച്ചടവുകളിൽ ഉണ്ടായ കാലതാമസമാണ് പ്രതിസന്ധി ഉണ്ടെന്ന് പറയാൻ കാരമെന്നുമാണ് ഭരണസമിതിയുടെ വാദം. പണം കിട്ടുന്ന മുറയ്ക്ക് എല്ലാവരുടെയും പണം തിരികെ നൽകുമെന്ന് ഭരണസമിതി പറയുമ്പോഴും കഷ്ടപ്പെട്ടു സമ്പാദിച്ച പണം തിരികെ ലഭിക്കാൻ വേണ്ടി ബാങ്കിന് മുന്നിൽ എത്തുന്നവരുടെ നിര പിന്നെയും കൂടുകയാണ്.