പത്തനംതിട്ട: ഉടമസ്ഥർ വീട് അടച്ചിട്ട് വിദേശത്തേക്ക് പോയി, മോഷ്ടാക്കൾ വാതിൽ കുത്തി തുറന്ന് അകത്തു കയറി. തിരുവല്ല കാരയ്ക്കലിലാണ് അടച്ചിട്ടിരുന്ന വീട് കുത്തി തുറന്ന് അകത്തു കയറി അലമാരയിൽ സൂക്ഷിച്ചിരുന്ന സ്വർണാഭരണങ്ങളും 5000 രൂപയും മോഷ്ടിച്ചത്. പെരിങ്ങര പഞ്ചായത്ത് ഒമ്പതാം വാർഡിൽ കാരയ്ക്കൽ ശ്രീമാധവത്തിൽ മുരളീധരൻ പിള്ളയുടെ വീട്ടിലാണ് മോഷണം നടന്നത്.
വീട്ടുടമസ്ഥനായ മുരളീധരൻ പിള്ളയും ഭാര്യയും കഴിഞ്ഞ മാസം 30ന് കാനഡയിൽ ഉള്ള മകനെയും ഭാര്യയും സന്ദർശിക്കുവാൻ പോയിരിക്കുകയായിരുന്നു. മുരളീധരൻ പിള്ളയുടെ സഹോദരൻ നൽകിയ പരാതിയിൽ സമീപ വീടുകളിലെ സിസിടിവി ക്യാമറകൾ അടക്കം കേന്ദ്രീകരിച്ച് പോലീസ് അന്വേഷണം ആരംഭിച്ചു. കാരക്കൽ,കാവുംഭാഗം, പെരിങ്ങര തുടങ്ങിയ പ്രദേശങ്ങളിൽ അടുത്തിടെ പകലും രാത്രിയിലും മോഷണങ്ങൾ നടന്നിരുന്നു. സ്കൂട്ടറിൽ നിന്നും താക്കോൽ എടുക്കാതെ പാർക്ക് ചെയ്ത ശേഷം ബാങ്കിലേക്ക് കയറി പോയ ഉടമ തിരിച്ചെത്തിയപ്പോൾ വാഹനം ഉണ്ടായിരുന്നില്ല. ഇതിനുള്ളിൽ ഉണ്ടായിരുന്ന ഒന്നര ലക്ഷത്തിലധികം രൂപയും നഷ്ടപ്പെട്ടിരുന്നു. പിന്നീട് ഈ മോഷ്ടാവിനെ പോലീസ് പിടികൂടി. അപ്പോഴേക്കും കൂടുതൽ തുക ചെലവഴിച്ചിരുന്നു. ലോൺ അടക്കാനായുള്ള തുക ആയിരുന്നു വാഹനത്തിന്റെ ബോക്സിൽ വച്ചിരുന്നത്.
Read Latest Local News and Malayalam News
പത്തനംതിട്ട ജില്ലയിലെ മുഴുവൻ വാര്ത്തകളും ഒറ്റ ക്ലിക്കിൽ ഇവിടെ വായിക്കാം