ശബ്ദമാധുര്യം കൊണ്ട് ശ്രദ്ധേയൻ... കണ്ണുകളുടെ കാഴ്ച്ച കവർന്ന് ഗ്ലോക്കോമ! തളരാതെ ഗായകൻ സുമേഷ് അയിരൂർ

ഡസ്കിൽ താളമിട്ട് സുമേഷ് പാടിയ പാട്ട് നവമാധ്യമങ്ങളിൽ വൈറലായിരുന്നു. മലയാള സിനിമയിലെ പ്രശസ്ത ഗായകരുടെ ശബ്ദത്തിൽ പാട്ടുകൾ പാടാൻ കഴിയുമെന്നുള്ളതാണ് സുമേഷിൻ്റെ മറ്റൊരു പ്രത്യേകത. നിരവധി ഗായകരെ വിവിധ വേദികളിൽ സുമേഷ് അനുകരിച്ചിട്ടുണ്ട്. ഗാനഗന്ധർവ്വൻ യേശുദാസും മലയാളികളുടെ സ്വന്തം ശ്രീക്കുട്ടൻ എന്ന എം ജി ശ്രീകുമാർ ഉൾപ്പടെ നിരവധി പേരെയാണ് സുമേഷ് വേദികളിൽ അവതരിപ്പിക്കുന്നത്. അത്രയ്ക്ക് മനോഹരമായ, കാതിന് ഇമ്പമാർന്നതാണ് സുമേഷിൻ്റെ ആലാപനശൈലി.

ഗ്ലോക്കോമ എന്ന രോഗം സുമേഷിൻ്റെ കണ്ണുകളുടെ കാഴ്ച കവർന്നെടുത്തിരിക്കുകയാണ്. സുമേഷിൻ്റെ കണ്ണുകളുടെ കാഴ്ച അനുദിനം ഗ്ലോക്കോമ ഇല്ലാതാക്കുകയാണ്. എന്നാൽ ആ ദുഖം തനിക്ക് ദൈവം നൽകിയ സംഗീതം എന്ന വരദാനത്തിലൂടെ മറക്കുകയാണ് ഈ ഗായകൻ. അസുഖത്തെ കുറിച്ച് ഓർമ്മിപ്പിച്ചാൽ സുമേഷ് പറയുന്നത് ചുവടെ...

'എന്റെ കണ്ണിനെ ബാധിച്ചിരിക്കുന്നത് ഗ്ലോക്കോമ എന്ന അസുഖമാണ്. നേത്രം മാറ്റിവെക്കൽ ശസ്ത്രക്രിയ നടത്തിയാലും കാഴ്ച്ച വീണ്ടെടുക്കാനാകില്ല. കാരണം ഈ അസുഖം ബാധിക്കുന്നത് നേത്രഞരമ്പുകളെയാണ്. പക്ഷേ, കാഴ്ച നഷ്ടമാകുന്നതിലും എനിക്കു സങ്കടമൊന്നുമില്ല. കാരണം അതിലും വലുതാണ് ദൈവം എനിക്കു നൽകിയ വരദാനമായ സംഗീതം.'

കഴിഞ്ഞ പത്തു വർഷക്കാലമായി ശ്രദ്ധേയമായ ഒട്ടനവധി സംഗീത പരിപാടികൾ നടത്തി നിരവധി പുരസ്കാരങ്ങൾ നേടിയിട്ടുള്ള സുമേഷിൻ്റെ പാട്ടുകൾ പലതും ഇതിനോടകം യുടൂബിലും വൈറലാണ്. ശബ്ദമാധുര്യം കൊണ്ട് ശ്രദ്ധേയനാണെങ്കിലും സുമേഷിൻ്റെ ജീവിതത്തെയും കൊവിഡ് എന്ന മഹാമാരി ബാധിച്ചിരിക്കുകയാണ്. അതിനാൽ കൊവിഡ് കാലത്ത് പരിപാടികൾ നിലച്ചതോടെ അതിജീവനത്തിൻ്റെ പാതയിലാണ് സുമേഷ്. കൊവിഡ് പ്രതിസന്ധികൾ മൂലം ജ്വല്ലറിയിലെ സെയിൽസ്മാൻ ജോലിയും നഷ്ടപ്പെട്ടു. അച്ഛൻ രഘുവിൻ്റെ തുച്ഛമായ വരുമാനം മാത്രമാണ് ഇപ്പോൾ കുടുംബത്തിൻ്റെ ഏക വരുമാനം.

കണ്ണൻ താമരക്കുളം സംവിധാനം ചെയ്ത് അനൂപ് മേനോൻ നായകനായി 'മരട് 357 ' എന്ന റിലീസിനായി കാത്തിരിക്കുന്ന സിനിമയുടെ തീം സോങ്ങ് പാടിയിരിക്കുന്നത് സുമേഷാണ്. ഉത്സവ ആഘോഷങ്ങളിലും സ്റ്റേജ് ഷോകളിലുമുള്ള സംഗീതപരിപാികളും നിലച്ചതോടെ സുമേഷും സുമേഷിനേ പോലുള്ള നിരവധി കലാകാരന്മാരുമാണ് പ്രതിസന്ധിയിലായിരിക്കുന്നത്. ഈ കൊവിഡ് എന്ന ഇരുണ്ട കാലത്തിനപ്പുറം നന്മകളുടെ സൂര്യോദയം ഉണ്ടാകുമെന്നാണ് സുമേഷ് പറയുന്നത്. സുമേഷിൻ്റെ ആ ദൃഢ നിശ്ചയവും കണ്ണുകളിലെ തിളക്കവും അതു വിളിച്ച് പറയുന്നു