പൂജപ്പുര സെൻട്രൽ ജയിലിൽ ആശങ്ക വർധിക്കുന്നു; ഡോക്ടറടക്കം 53 പേർക്ക് കൂടി കൊവിഡ്

തിരുവനന്തപുരം: പൂജപ്പുര സെൻട്രൽ ജയിലിൽ കൂടുതൽ ആളുകളിലേക്ക് കൊവിഡ് വ്യാപനം. ഇന്ന് 53 പേര്‍ക്കാണ് വൈറസ് ബാധ സ്ഥിരീകരിച്ചത്. ഇതോടെ തിരുവനന്തപുരത്തെ രോഗവ്യാപനത്തിന്‍റെ മറ്റൊരു കേന്ദ്രമായി മാറുകയാണ് പുജപ്പുര സെന്‍ട്രല്‍ ജയില്‍. തടവുകാര്‍ക്ക് പുറമെ ജയില്‍ ഡോക്ടര്‍ക്കും രണ്ട് ജീവനക്കാര്‍ക്കും ഇന്ന് രോഗം ബാധിച്ചു. ഇതോടെ തിരുവനന്തപുരം സെൻട്രൽ ജയിലിൽ മാത്രം 218 പേർക്കാണ് ഇത് വരെ കൊവിഡ് സ്ഥിരീകരിച്ചത്.

Also Read: പാപനാശംകുന്ന് വീണ്ടും ഇടിഞ്ഞു; നടപ്പാത അപകട നിലയില്‍

ഒരുമിച്ചുള്ള ശുചിമുറിയും മറ്റുമാണ് രോഗം പടരുന്നതിന് കാരണമായതെന്നാണ് പ്രാഥമിക നിഗമനം. തടവുകാരെ പുറത്തുകൊണ്ട് പോയി ചികിത്സിക്കുന്നത് പ്രായോഗികമല്ലെന്നാണ് അധികൃതർ പറയുന്നത്. ജയിലിന് അകത്തുള്ള ഓഡിറ്റോറിയത്തിലും വിവിധ ബ്ലോക്കുകളിലുമായാണ് ഇവരെ ചികിത്സിക്കുന്നത്. വരും ദിവസങ്ങളിൽ കൂടുതൽ തടവുകാരെ കൂടി കോവിഡ് പരിശോധനയ്ക്ക് വിധേയരാക്കും. പ്രായമായ തടവുകാരടക്കം കൊവിഡ് പോസിറ്റീവായവരുടെ പട്ടികയിലുണ്ട്.

ഇനിയും രോഗികള്‍ കൂടിയാല്‍ ജയിലിനുള്ളിലെ നിരീക്ഷണ സൗകര്യം മതിയാകുമോയെന്നതും ആശങ്ക വര്‍ധിപ്പിക്കുന്നുണ്ട്. ഓഫീസ് ശുചീകരണത്തിന് നിയോഗിച്ച തടവുകാരും രോഗ ബാധിതരായതോടെ ജയില്‍ ആസ്ഥാനം മൂന്ന് ദിവസത്തേക്ക് അടച്ചിരിക്കുകയാണ്. ഡിഐജി ഉള്‍പ്പെടെയുള്ളവരും ക്വാറന്‍റൈനിലായി. എന്നാല്‍ പുറംലോകവുമായി സമ്പര്‍ക്കമില്ലാതെ കഴിയുന്ന ജയിലില്‍ രോഗബാധയെത്തയിത് എങ്ങിനെയെന്ന് വ്യക്തമല്ല.

Also Read: കായിക കുതിപ്പിന് കരുത്തേകാന്‍ കാലിക്കടവ് സ്റ്റേഡിയം, അന്താരാഷ്ട്ര നിലവാരത്തിലാകുന്നു, 2 കോടിയുടെ പദ്ധതി

71 വയസുള്ള തടവുകാരന്‍ കുഴഞ്ഞുവീണതോടെയാണ് രോഗബാധ തിരിച്ചറിഞ്ഞത്. തടവുകാരെ ഓരോ ദിവസവും ചികിത്സക്കായി വിവിധ ആശുപത്രികളില്‍ കൊണ്ടുപോകാറുണ്ട്. ജയില്‍ വകുപ്പിന്റെ പെട്രോള്‍ പമ്പിലും തടവുകാരാണ് ജോലി നോക്കുന്നത്. ഇതുവഴിയാവാം രോഗബാധയെന്നാണ് കരുതുന്നത്. രോഗബാധയെതുടര്‍ന്ന് ജയിലില്‍ നിന്ന് പുറത്തേക്കുള്ള ഭക്ഷണവില്‍പ്പന നിര്‍ത്തി. ജയിലിൽ രോഗവ്യാപനം ഉണ്ടാകാതിരിക്കുന്നതിനായി വലിയ രീതിയിലുളള ക്രമീകരണം ജയിൽ അധികൃതർ ചെയ്തിരുന്നതാണ്. ഇതും മറികടന്നാണ് പൂജപ്പുര സെൻട്രൽ ജയിലിൽ ആശങ്കയുണർത്തുന്ന സാഹചര്യം ഉടലെടുത്തിരിക്കുന്നത്.