ബിജെപി തോൽവിയിലും വളരുന്ന പാർട്ടിയെന്ന് നടൻ കൃഷ്ണകുമാർ
തോല്‍വിയിലും വളര്‍ച്ച പ്രാപിച്ചിരിക്കുന്ന പാര്‍ട്ടി
മോദിയെ സ്വീകരിക്കാന്‍ 'സ്വന്തം മേയര്‍' എന്ന പ്രചാരണം ജനം തള്ളിയതോടെ സോഷ്യല്‍ മീഡിയയില്‍ കൃഷ്ണകുമാറിനെിരെ പരിഹാസങ്ങളും ട്രോളുകളും നിറഞ്ഞു. എന്നാല്‍ തോല്‍വി കണക്കില്‍ മാത്രമാണെന്നും ബിജെപി വളരുകയാണെന്നുമാണ് കൃഷ്ണകുമാര്‍ ഇപ്പോഴും പറയുന്നത്. തോല്‍വിയിലും വളര്‍ച്ച പ്രാപിച്ചിരിക്കുന്ന പാര്‍ട്ടിയാണ് ബിജെപി എന്ന് കൃഷ്ണകുമാര്‍ 'സമയം മലയാളത്തിന്' നല്‍കിയ അഭിമുഖത്തില്‍ പറഞ്ഞു.
എന്തുകൊണ്ടു തോറ്റു?
ബിജെപി എന്തുകൊണ്ടു തോറ്റു എന്ന് എല്ലാവരും ചോദിക്കുന്നത്, ബിജെപി ഇന്ന് എവിടെ എത്തി എന്നതിന്റെ വ്യക്തമായ സൂചനയാണ്. എല്ലാം അവസാനിച്ചു എന്ന് കരുതുന്നിടത്തുനിന്നാണ് പലതും തുടങ്ങുന്നത്. പാര്‍ലിമെന്റില്‍ 2 സീറ്റില്‍ നിന്നും 300 സീറ്റിലേക്ക് കുതിച്ച ബിജെപി, കേരളത്തിലും വളര്‍ച്ചയുടെ പാതയിലാണ്. തോല്‍വി കണക്കില്‍ മാത്രമാണ്. ചിലയിടത്ത് സ്ഥാനാര്‍ഥികള്‍ ഒരു വോട്ടിനൊക്കെയാണ് തോറ്റുപോയതെന്നും, നമ്മള്‍ ഒപ്പമെത്തി കഴിഞ്ഞു എന്നതാണ് ഇതില്‍ നിന്നും മനസിലാക്കേണ്ടതെന്നും അദ്ദേഹം പറഞ്ഞു.
ന്യൂനപക്ഷങ്ങളുടെ ഭയപ്പാട് മാറി
ബിജെപി വന്നാല്‍ കുഴപ്പമാണ് എന്ന ന്യൂനപക്ഷങ്ങളുടെ ഭയപ്പാട് മാറി എന്ന് തെരഞ്ഞെടുപ്പ് ഫലം വിലയിരുത്തിയാല്‍ മനസിലാകും. അബ്ദുള്ളക്കുട്ടിയുടെ വരവ് ബിജെപിക്ക് മുസ്ലിം സമുദായത്തിനിടയിലും വലിയ നേട്ടമുണ്ടാക്കി. എന്നാല്‍ ഇപ്പേഴും ചിലര്‍ മോദിയെയും ബിജെപിയെയും ഭയത്തോടെയാണ് നോക്കിക്കാണുന്നത്. അവര്‍ മോദിക്കെതിരെ ശക്തരാര് എന്ന് നോക്കി വോട്ടുചെയ്യും. പാര്‍ലമെന്‍റ് തെരഞ്ഞെടുപ്പില്‍ കോണ്‍ഗ്രസിന് 19 സീറ്റ് ലഭിച്ചത് അങ്ങനെയാണ്.
കോണ്‍ഗ്രസ് ദുര്‍ബലമായി
പ്രധാന പ്രതിപക്ഷമായ കോണ്‍ഗ്രസ് കേരളത്തില്‍ ദുര്‍ബലമായി. ബിജെപിയെ എതിര്‍ക്കാന്‍ ശക്തനാര് എന്ന് നോക്കി ഒരുകൂട്ടര്‍ വോട്ട് ചെയ്തു. അതുകൊണ്ടാണ് സ്വര്‍ണ്ണക്കടത്ത് ഉള്‍പ്പെടെയുള്ള വിവാദങ്ങള്‍ക്കിടയിലും എല്‍ഡിഎഫിന് മികച്ച വിജയമുണ്ടാക്കാന്‍ കഴിഞ്ഞത്. എല്‍ഡിഎഫിന്‍റെ താഴേതട്ടിലുള്ള പ്രവര്‍ത്തനങ്ങള്‍ മികച്ചതാണെന്നും കൃഷ്ണകുമാര്‍ പറഞ്ഞു.
ഒ.രാജഗോപാല്‍ പറഞ്ഞത് കാര്യം
തദ്ദേശ തെരഞ്ഞെടുപ്പില്‍ ബിജെപിക്ക് പോരായ്മ ഉണ്ടായിട്ടുണ്ടെന്നും, കൂടുതല്‍ സീറ്റുകള്‍ പിടിക്കാന്‍ വേണ്ടി സിറ്റിങ് കൗണ്‍സിലര്‍മാര്‍രെ മറ്റു വാര്‍ഡുകളിലേക്ക് മാറ്റിയത് തിരുവനന്തപുരം കോര്‍പറേഷനില്‍ തിരിച്ചടിയായെന്നുമുള്ള ഒ രാജഗോപാല്‍ എംഎല്‍എയുടെ പരാതി പാര്‍ട്ടി പരിശോധിക്കുമായിരിക്കുമെന്നും കൃഷ്ണകുമാര്‍ പറഞ്ഞു. പരാജയങ്ങള്‍ കണ്ട് താമരവിരിയിച്ച ബിജെപിയുടെ സമുന്നതനായ നേതാവാണ് ഒ രാജഗോപാല്‍. അദ്ദേഹം പറയുന്ന കാര്യങ്ങള്‍ ഗൗരവമുള്ളതായിരിക്കുമെന്നും കൃഷ്ണകുമാര്‍ ചൂണ്ടിക്കാട്ടി.
ട്രോളന്മാരോട് പറയാനുള്ളത്
തനിക്കെതിരെ വരുന്ന ട്രോളുകളൊക്കെ പോസിറ്റീവ് ആയി എടുക്കുന്നു. ട്രോളന്മാരെ പ്രത്യേകം അഭിനന്ദിക്കുന്നു. സുരേഷ് ഗോപിക്കൊപ്പം ചേര്‍ത്ത് തന്നെ ട്രോളുന്നവരോട് സ്‌നേഹം മാത്രമെയുള്ളൂ. ട്രോളുകള്‍ കുറേ വിഭാഗം ആളുകള്‍ക്കൊരു ജീവിതമാര്‍ഗമാണെങ്കില്‍ അതില്‍ സന്തോഷമുണ്ടെന്ന് കൃഷ്ണകുമാര്‍ പറഞ്ഞു.