തടിയുരലിൽ നെല്ലുകുത്തി അരിയാക്കി പായസമാക്കി വിളമ്പി സ്റ്റാറായി നെല്ലമ്മ

നെല്ലുകുത്തി അരിയാക്കി. അരിയിടിച്ചു പരുവമാക്കി. പരുവപ്പെട്ട അരിയെ പായസമാക്കി വിളമ്പി നെല്ലമ്മ സ്റ്റാറായി. കര്‍ഷകസംഘം ജില്ലാ സമ്മേളന ഭാഗമായി കല്ലിംഗലില്‍ ആരംഭിച്ച അഗ്രിഫെസ്റ്റില്‍ താരമായത് പനവൂര്‍ ചെല്ലഞ്ചി സ്വദേശി നെല്ലമ്മ എന്ന പാറുക്കുട്ടിയാണ്. കൃഷി ഓഫീസര്‍ സുരേഷിന്റെ നേതൃത്വത്തിലാണ് നെല്ലമ്മ തന്റെ കാര്‍ഷികോപകരണങ്ങളും നെല്ലും അനുബന്ധ സാമഗ്രികളുമായി മേളയ്ക്കെത്തിയത്. ജനക്കൂട്ടം നിറഞ്ഞ ഗ്രൗണ്ടിലൊരിടത്ത് ആദ്യം തടിയുരല്‍ സ്ഥാപിച്ചു. അതിലേക്ക് നെല്ല് പാകത്തിനു നിറച്ച്, ഉടുത്തിരുന്ന നേര്യത് ഒന്നുകൂടി ഞൊറിഞ്ഞുകുത്തി, ഉലക്ക ഉഴിഞ്ഞെടുത്ത്, കൃഷിപ്പാട്ടും മൂളി നെല്ലുകുത്താന്‍ തുടങ്ങി. നിമിഷങ്ങള്‍ക്കകം ആള്‍ക്കൂട്ടം നെല്ലമ്മയ്ക്കു ചുറ്റുമായി. അവരുടെ ആര്‍പ്പും ആവേശവും ഊര്‍ജമാക്കി നെല്ലമ്മ നെല്ലുപാറ്റി അരിയാക്കി, അരിയെ പായസമാക്കി കൂടിനിന്നവര്‍ക്കായി വിളമ്പി. അന്യമായ കാര്‍ഷിക സംസ്‌കാരവും സമൃദ്ധിയും പുതുതലമുറയെ ബോധ്യമാക്കുകയും പഴയ തലമുറയെ ഓര്‍മിപ്പിച്ച് അനുഭവിപ്പിച്ചുണര്‍ത്തുകയുമായിരുന്നു നെല്ലമ്മയുടെ ലക്ഷ്യം. ലക്ഷ്യം വിജയിച്ചതിലെ ആനന്ദം അവര്‍ മറയില്ലാതെതന്നെ ജനക്കൂട്ടത്തിനിടയില്‍ പ്രകടിപ്പിച്ചു.