കട്ടപ്പനയിൽ നിന്ന് മടങ്ങുംവഴി അപകടം
വിനീതിനെയും അമലിനെയും പോലീസ് കസ്റ്റഡിയിലെടുത്ത് ചോദ്യം ചെയ്യുകയാണ്.തിരുവനന്തപുരം മെഡിക്കല്‍ കോളേജ് എംപ്ലോയീസ് ക്രെഡിറ്റ് യൂണിയനു കീഴിലുള്ളതാണ് ആംബുലന്‍സ്. രോഗിയുമായി ഇടുക്കി കട്ടപ്പനയിലേയ്ക്ക് പോയ ശേഷം തിരുവനന്തപുരത്തേയ്ക്ക് മടങ്ങി വരുമ്പോഴാണ് അപകടമുണ്ടായത്. എവിടെ വച്ചാണ് വാഹനം അമലിന് കൈമാറിയതെന്നും എന്താണ് അപകടകാരണമെന്നും പോലീസ് ചോദിച്ചുവരികയാണ്.
ഡ്രൈവർ ഉറങ്ങിയതെന്ന് ആദ്യ നിഗമനം
അമലിന് ലൈസന്‍സ് ഉണ്ടോ എന്നും വ്യക്തമല്ല. ഇരുവരുടെയും മൊഴി എടുത്ത ശേഷം കൂടുതല്‍ കാര്യങ്ങള്‍ പറയാമെന്നാണ് പോലീസ് നിലപാട്. ആംബുലന്‍സ് ഡ്രൈവര്‍ ഉറങ്ങിപ്പോയതാകാം അപകടത്തിന് കാരണമെന്നാണ് പോലീസ് ആദ്യം കരുതിയിരുന്നത്. പിന്നീട് നാട്ടുകാര്‍ നല്‍കിയ സൂചനയിലാണ് ഡ്രൈവറല്ല ആംബുലന്‍സ് ഓടിച്ചതെന്ന് പോലീസിന് വ്യക്തമായത്. ഉടന്‍ തന്നെ ഇവരെ കസ്റ്റഡിയിലെടുക്കുകയായിരുന്നു.
അലങ്കൃതയുടെ നില ഗുരുതരം
ഇന്ന് രാവിലെ വെഞ്ഞാറമൂട് മുസ്ലിം പള്ളിക്ക് സമീപം ആണ് അപകടം. രാവിലെ 6.30 ഓടെയായിരുന്നു അപകടം. സ്വകാര്യ സ്‌കാനിംഗ് കേന്ദ്രത്തിലേയ്ക്ക് പ്രവേശിക്കുന്നതിനായി റോഡില്‍ നിറുത്തിയ ഇരുചക്ര വാഹനത്തിനു സമീപം നില്‍ക്കുക ആയിരുന്നു മരിച്ച ഷിബുവും മകളും. നിയന്ത്രണം വിട്ടെത്തിയ ആംബുലന്‍സ് ബൈക്കില്‍ ഇടിയ്ക്കുകയായിരുന്നു. ഇടിച്ചയുടനെ ആംബുലന്‍സ് തലകീഴായി മറിഞ്ഞു. നാട്ടുകാരും പോലീസും ഓടിയെത്തി പിരപ്പന്‍കോട് പ്ലാവിള വീട്ടില്‍ ഷിബു (36), നാലു വയസ്സുള്ള മകള്‍ അലങ്കൃത എന്നിവരെ ഗോകുലം മെഡിയ്ക്കല്‍ കോളേജിലെ തീവ്രപരിചരണ വിഭാഗത്തില്‍ പ്രവേശിപ്പിച്ചു. ഗുരുതരമായി പരിക്കേറ്റ ഷിബുവിന്റെ ജീവന്‍ രക്ഷിക്കാനായില്ല. പരിക്കേറ്റ് ചികിത്സയില്‍ കഴിയുന്ന അലങ്കൃതയുടെ ആരോഗ്യനില ഗുരുതരമാണ്.