അട്ടക്കുളങ്ങര - കിള്ളിപ്പാലം ബൈപാസ് റോഡ് ഒരു മാസത്തേക്ക് അടച്ചു; ഗതാഗതത്തിന് ഈ ബദൽ റോഡുകൾ

തിരുവനന്തപുരം: അട്ടക്കുളങ്ങര കിള്ളിപ്പാലം ബൈപാസ് റോഡ് ഇന്നുമുതൽ (11 -3-24) ഏപ്രിൽ മാസം 15 വെള്ളിയാഴ്ച വരെ (15-4-24) അടച്ചിടും. അട്ടക്കുളങ്ങര ഭാഗത്തു നിന്ന് കിള്ളിപ്പാലം ഭാഗത്തേക്ക് പോകേണ്ട വാഹനങ്ങൾ കിഴക്കേക്കോട്ട - ഗണപതി കോവിൽ സെൻട്രൽ തിയേറ്റർ - പവർ ഹൗസ് -ചൂരക്കാട്ട് പാളയം വഴി പോകാൻ നിർദ്ദേശമുണ്ട്. കിഴക്കേക്കോട്ട -ഓവർ ബ്രിഡ്ജ് - തമ്പാനൂർ ചൂരക്കാട്ട് പാളയം വഴിയും പോകാം.

സ്മാർട്ട് സിറ്റി പദ്ധതിയുടെ ഭാഗമായി കിള്ളിപ്പാലം അട്ടക്കുളങ്ങര ബൈപ്പാസ് റോഡിൽ നവീകരണ ജോലികൾ നടക്കുകയാണ്. ഇക്കാരണത്താലാണ് ഗതാഗതം തിരിച്ചുവിടുന്നത്. റോഡിന്റെ രണ്ടുഭാഗത്തും ഒരേസമയം പ്രവൃത്തി നടക്കുകയാണ്. ഒരു മാസം നീളുന്ന ജോലികളാണ് ഇവിടെ പൂർത്തായാക്കാനുള്ളത്.

സ്മാർട്ട് സിറ്റി പദ്ധതിയുടെ കരാറുകാരുമായുണ്ടായ പ്രശ്നങ്ങളെത്തുടർന്ന് ഏറെ മാസങ്ങളായി തിരുവനന്തപുരം നഗരത്തിൽ പണികൾ നീങ്ങാതിരിക്കുകയായിരുന്നു. ഈയിടെയാണ് കരാറുകാരെ മാറ്റി പുതിയ കരാറുകാരെ ഏൽപ്പിച്ചത്. അട്ടക്കുളങ്ങര കിള്ളിപ്പാലം റോഡിൽ തിരക്കേറിയ ഒരു ഭാഗം പൂർണമായും കുത്തിപ്പൊളിച്ചിട്ടതോടെ ജനങ്ങൾ ദുരിതത്തിലായിരുന്നു. ഗതാഗതക്കുരുക്ക് സ്ഥിരം കാഴ്ചയായി മാറിയിരുന്നു.

ഗവ.മോഡൽ ഹയർ സെക്കൻഡറി സ്കൂൾ സ്ഥിതി ചെയ്യുന്ന ഈ റോഡിൽ രാവിലെയും വൈകീട്ടും ട്രാഫിക് ദുസ്സഹമാകും. നിലവിൽ കേരള റോഡ് ഫണ്ട് ബോർഡിനാണ് നിര്‍മാണ ചുമതല. നഗരത്തിലെമ്പാടും സ്മാർട്ട് സിറ്റി റോഡുകളുടെ നിർമ്മാണം ഗതാഗത പ്രശ്നങ്ങൾ സൃഷ്ടിക്കുന്നുണ്ട്. നിലവിൽ കരാറുകാർ പ്രശ്നമുണ്ടാക്കുന്നില്ല എന്നതും പണി വേഗത്തിൽ നടക്കുന്നുണ്ട് എന്നതുമാണ് സമാധാനം.