അമ്മായിയമ്മ മരുമകള്‍ പോരാട്ടം
എന്‍. ഗീതാദേവി മുമ്പ് ഒരുതവണ കൗണ്‍സിലര്‍ ആയിരുന്നുവെങ്കില്‍ കന്നി അങ്കത്തിന് ഇറങ്ങുകയാണ് മരുമകള്‍. എല്‍ഡിഎഫ് കോട്ട ആയിരുന്ന നെടുമങ്ങാട് നഗരസഭ പതിനാറാം കല്ല് വാര്‍ഡ് 2010ലെ കന്നി അങ്കത്തില്‍ തന്നെ പിടിച്ചെടുത്ത ആത്മവിശ്വാസത്തിലാണ് എന്‍. ഗീതാദേവി ഇത്തവണയും പോരിനിറങ്ങുന്നത്. ഇടതുപക്ഷ കോട്ട പിടിച്ചെടുക്കാന്‍ തന്നെയാണ് വി.കൃഷ്‌ണേന്ദുവിന്റെയും പോരാട്ടം. പരുത്തിക്കുഴി വാര്‍ഡ് പിടിച്ചെടുക്കും എന്ന പൂര്‍ണ്ണ വിശ്വാസത്തിലാണ് മത്സരിക്കുന്നതെന്ന് വി.കൃഷ്‌ണേന്ദു പറയുന്നു.
ആത്മവിശ്വാസത്തില്‍ ഇരുവരും
കന്നി അങ്കമാണെങ്കിലും അമ്മായിയമ്മയില്‍ നിന്നും പഠിച്ച രാഷ്ട്രീയ പാഠങ്ങള്‍ എല്ലാം പയറ്റിയാണ് കൃഷ്‌ണേന്ദുവിന്റെ വോട്ട് പിടിത്തം. പ്രവാസിയായ കൃഷ്‌ണേന്ദുവിന്റെ ഭര്‍ത്താവ് എസ്.ജി.അനുരാഗ് തെരഞ്ഞെടുപ്പ് അടുത്തതോടെ ലീവ് എടുത്ത് നാട്ടില്‍ എത്തിയിരിക്കുകയാണ്. അമ്മായിയമ്മ മരുമകള്‍ പോരാട്ടം വ്യത്യസ്ത വാര്‍ഡുകളില്‍ ആയതുകൊണ്ട് പകുതി ആശ്വാസം എന്ന് അനുരാഗ് പറയുന്നു.
പിന്തുണച്ച് അനുരാഗ്
ക്വാറന്റീന്‍ കഴിഞ്ഞാല്‍ അമ്മക്കും ഭാര്യക്കും വേണ്ടി വോട്ട് ചോദിച്ചിറങ്ങണം. രണ്ടുപേര്‍ക്കും വേണ്ടി രണ്ടിടത്തും കൃത്യമായി വോട്ട് ചോദിച്ച് എത്തിയില്ലെങ്കില്‍ കുടുംബ പോരാകുമല്ലോ എന്ന് അനുരാഗ് പറയുന്നു. എന്തായാലും ജനവിധി വരുമ്പോള്‍ അമ്മയും ഭാര്യയും വിജയിക്കുമെന്നാണ് അനുരാഗിന്റെ വാദം. തിരുവനന്തപുരത്ത് വാശിയേറിയ പ്രചാരണത്തിലാണ് മുന്നണികള്‍. സ്ഥാനാര്‍ത്ഥി നിര്‍ണയം പൂര്‍ത്തിയാക്കി എല്‍ഡിഎഫും ബിജെപിയും മുന്നോട്ട് പോയെങ്കിലും യുഡിഎഫില്‍ തര്‍ക്കം തുടരുകയാണ്‌